Barcelona បានទិញខ្សែប្រយុទ្ធវ័យក្មេងជនជាតិជប៉ុន Hiroki Abe ពី Kashima Antlers ក្នុងតម្លៃ ១,២៥លានដុល្លារអាមេរិក។ Barca ជឿជាក់ថាយុវជនដ៏មានទេពកោសល្យរូបនេះនឹងកើនតម្លៃខ្លួនដល់១០០លានដុល្លារ។ ការផ្លាស់ទៅ Camp Nou របស់ Abe ធ្វើឡើងក្រោយពី Real Madrid បាននាំយកខ្សែបម្រើ Takefusa Kubo ដែលមានរហស្សនាមថា Lionel Messi ជប៉ុនពីក្លិប FC Tokyo ទៅរួមក្រុម។
កីឡាករវ័យក្មេងទាំងពីរសុទ្ធសឹងជាយុវជនវ័យក្មេងនិងជាប់ជម្រើសជាតិឈុតធំរបស់ជប៉ុនដូចគ្នា ព្រមទាំងបានបង្ហាញខ្លួននាការប្រកួតពានរង្វាន់ Copa America ឆ្នាំ២០១៩ នៅប្រេស៊ីលកន្លងមកទៀតផង។
Hiroki Abe វ័យ២០ឆ្នាំ នឹងត្រូវទៅចូលរួមជាមួយក្រុមឈុតបម្រុងរបស់ Barca ឬ Barcelona B ដែលលេងក្នុងក្របខណ្ឌលីគទី៣របស់អេស្ប៉ាញ Spanish Segunda B។ យ៉ាងណាក៏ដោយ ម្ចាស់ជើងឯក La Liga មួយនេះបន្ទាប់ពីផ្តល់កិច្ចសន្យារយៈពេល៤ឆ្នាំបានបញ្ចេញតម្លៃទិញផ្តាច់កិច្ចសន្យា (Buyout Clause) ក្នុងតម្លៃ ៤៥លានដុល្លារ ហើយនឹងអាចនឹងកើនឡើងដល់ ១១២លានដុល្លារប្រសិនប់ខ្សែប្រយុទ្ធរូបនេះត្រូវបានតំឡើងទៅក្រុមឈុតធំ។
Hiroki Abe ដែលផ្លាស់ពី Kashima Antlers ទៅ Barca
Abe បានចាប់ផ្តើមលេងឲ្យក្រុមអាជីព Kashima Antlers នៃលីគកីឡាបាល់ទាត់កំពូលជប៉ុន J-League ក្នុងឆ្នាំ២០១៧ រហូតឆ្នាំ២០១៩នេះ ដោយបង្ហាញខ្លួនចំនួន៤៩ប្រកួត និងស៊ុតបញ្ចូលទីបាន៤គ្រាប់។
ដោយឡែក ខ្សែបម្រើ Takefusa Kubo អាយុទើប១៨ឆ្នាំក៏ត្រូវបានក្លិប Real Madrid ដែលគេដឹងថាជាគូប្រជែងដ៏ធំជាមួយ Barca ទិញយកទៅរួមក្រុម Real Madrid ឈុត B ឬ Real Madrid Castilla សម្រាប់រដូវកាលថ្មី២០១៩-២០នេះ។ Kubo ក៏ធ្លាប់ជាយុវជនរបស់ក្រុមអ្នកមានបុណ្យផងដែរ មុនរូបគេត្រឡប់ទៅកាន់ប្រទេសជប៉ុនវិញដោយចូលរួមជាមួយ FC Tokyo U-23 នៅឆ្នាំ២០១៦ និងបន្តទៅឈុតធំនៅឆ្នាំបន្ទាប់។ ខ្សែបម្រើដែលគេឲ្យរហស្សនាម Messi ជប៉ុននេះ ក៏ត្រូវបាន Yokohama F. Marinos ខ្ចីជើងមួយរដូវកាលផងដែរ។
Takefusa Kubo ដែលផ្លាស់ពី FC Tokyo កំពុងហាត់នៅ Real Madrid
ការចុះហត្ថលេខាទិញយកអ្នកទាំងពីរនេះបង្ហាញថាកីឡាករជប៉ុនកំពុងតែមានទីផ្សារខ្លាំងឡើងដោយសារតែពួកគេកាន់តែមានវត្តមានក្នុងលីគកីឡាបាល់ទាត់កំពូលទាំង ៥ នៅអឺរ៉ុបនាពេលបច្ចុប្បន្ន។
សមិទ្ធផលកីឡាករក្មេងៗជំនាន់នេះ មិនមែនជារឿងចៃដន្យនោះទេតែជាផ្លែផ្កានៃយុទ្ធសាស្ត្រដ៏ល្អរបស់សហព័ន្ធកីឡាបាល់ទាត់ជប៉ុន (JFA) ដែលបានបង្កើតឡើងនៅចុងទសវត្សរ៍ឆ្នាំ ១៩៩០ម្លេះ។
អ្វីៗទាំងអស់នេះហើយ ជាមហិច្ឆតារបស់ជប៉ុនក្នុងការដណ្តើមយកពានរង្វាន់កីឡាបាល់ទាត់ពិភពលោក World Cup ឆ្នាំ២០៥០ និងត្រួសត្រាយផ្លូវសម្រាប់លីគក្នុងស្រុករបស់ពួកគេឲ្យកាន់តែមានសមត្ថភាពគ្រប់គ្រាន់ដើម្បីប្រជែងប្រជាប្រិយភាពជាមួយលីគនៅអឺរ៉ុបក្នុងឆ្នាំ ២០៣០។
លើសពីនេះទៀត ជប៉ុនកំពុងចាប់ផ្តើមគម្រោងដោយចំណាយប្រាក់សម្រាប់កីឡាករជប៉ុនចំនួន ១៤នាក់ លេងក្នុងក្របខណ្ឌកំពូលនៅអឺរ៉ុបទាំង៥ ដែលបច្ចុប្បន្នមានកីឡាករមួយចំនួនហើយក្នុងចំណោមនោះកំពុងលេងនៅ Bundesliga, LaLiga, Premier League និង Ligue 1។
ប្រធាន J League លោក Mitsuru Murai បានចេញមុខអះអាងយ៉ាងមុតមាំថា៖«អ្វីដែលយើងធ្វើនេះក្នុងគោលបំណងដើម្បីក្លាយជាលីកធំលំដាប់ទី៤លើលោកនៅត្រឹមឆ្នាំ ២០៣០»៕