ជាតិ
សេដ្ឋកិច្ច
មន្ត្រីជាន់ខ្ពស់ក្រសួងសេដ្ឋកិច្ច៖ «បើដឹងថាខ្លួនឈឺហើយមិនខំព្យាបាល នឹងជួបគ្រោះថ្នាក់រយៈពេលវែង»
លោក វង្សី វិស្សុត រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ (រូបភាពពី The GNO forum on Cambodia)
×![]()
ដោយ: ភួង វ៉ាន់ថា
ភ្នំពេញ៖ សេដ្ឋកិច្ចកម្ពុជានឹងថយចុះពី ៧,១ ភាគរយ មកត្រឹម ៦,៥ ភាគរយ នាឆ្នាំ២០២០ ខាងមុខនេះ។ ក្នុងនោះវិស័យសំខាន់ៗមួយចំនួននៅមានកំណើនល្អ ប៉ុន្តែវិស័យកាត់ដេរ ដែលជាវិស័យស្នូលនៃសេដ្ឋកិច្ចនឹងមានកំណើនយឺត ពី៧,១ ភាគរយ ក្នុងឆ្នាំ២០១៩ មកត្រឹម ៣,៥ ភាគរយ ក្នុងឆ្នាំ២០២០។ វាជាបញ្ហាប្រឈម ដែលរដ្ឋាភិបាលត្រូវមានវិធានការច្បាស់លាស់ ដើម្បីទប់ស្កាត់ និងដោះស្រាយបញ្ហាធ្លាក់ចុះសេដ្ឋកិច្ចនេះ។ នេះជាការលើកឡើងរបស់មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ ។
«បើដឹងថាខ្លួនឈឺហើយមិនខំព្យាបាល នឹងជួបគ្រោះថ្នាក់រយៈពេលវែង ហើយ(អ្នក)ទាំងអស់គ្នាគ្មាននរណាគេចរួចទេ»។ នេះជាការលើកឡើងរបស់លោក វង្សី វិស្សុត រដ្ឋលេខាធិការនៃក្រសួងសេដ្ឋកិច្ច ដែលបានបន្ថែមថា បញ្ហាសេដ្ឋកិច្ចកម្ពុជា ធ្លាក់ចុះនៅឆ្នាំ២០២០ខាងមុខ គឺបណ្ដាលមកពីកត្តាខាងក្នុង និងខាងក្រៅ។ ដ្បិតមិននិយាយចំៗក្តី ប៉ុន្តែលោក វង្សី វិស្សុត បានអះអាងថា កត្តាខាងក្នុងនោះ គឺមកពីកង្វះការយកចិត្តទុកដាក់កំណែទម្រង់ឲ្យដល់កម្រិត ទើបនាំឲ្យកម្ពុជាប្រឈមមុខនឹងបញ្ហាដកប្រព័ន្ធអនុគ្រោះពន្ធ។ ចំណែកកត្តាខាងក្រៅ ដែលលោក វិស្សុត យល់ឃើញវិញនោះ គឺមកពីបញ្ហាសង្គ្រាមពាណិជ្ជកម្មរវាងប្រទេសមហាអំណាច និងការប្រកួតប្រជែងផលិតផលស្ដង់ដារនៅក្នុងទីផ្សារជាដើម។
ថ្លែងក្នុងសិក្ខាសាលាសភាដើម្បីឈ្វេងយល់ពីការកសាងក្របខ័ណ្ឌគោលនយោបាយម៉ាក្រូសេដ្ឋកិច្ច និងគោលនយោបាយ ហិរញ្ញវត្ថុសាធារណៈ សម្រាប់រៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២០ រដ្ឋលេខាធិការក្រសួងសេដ្ឋកិច្ចរូបនេះ បាននិយាយថា៖«អ្វីដែលជាកត្តាសំខាន់មិនមែនកត្តាពួកប្រឆាំងធ្វើបាបយើងនោះទេ កត្តាខ្លួនយើងនោះទេ បើយើងគ្រប់គ្រងសេដ្ឋកិច្ចបានល្អ ធ្វើកំណែទម្រង់បានល្អ បម្រើរាស្ត្របានល្អ មិនមានអ្វីគួរឲ្យបារម្ភនោះទេ ។ដូច្នេះកត្តាសន្តិសុខជាតិយើងនេះមិនទាក់ទងនឹងពួកប្រឆាំងប៉ុន្មាននោះទេ។ បញ្ហាផ្ទៃក្នុងរបស់យើងគឺដោយសារ EBA ដែលអាចជំរុញឲ្យមានហានិភ័យបន្ថែមកាន់តែខ្ពស់។ ក្នុងករណី EBA នៅ ហើយយើងកែទម្រង់បានដល់កម្រិត EBA គឺវានឹងជួយសេដ្ឋកិច្ចយើងឲ្យរស់បានរយៈពេលវែង ប៉ុន្តែបើ EBA មកហើយយើងមិនធ្វើអ្វី ហើយនៅដដែលអ៊ីចឹង វានឹងប៉ះ(ដល់សេដ្ឋកិច្ច)ប៉ះច្រើន»។
ចំពោះកត្តាខាងក្នុងនេះលោក វង្សី វិស្សុត បានទាមទារឲ្យរដ្ឋាភិបាលធ្វើកំណែទម្រង់ជាក់លាក់ និងមានប្រសិទ្ធភាពរយៈពេលវែង ដើម្បីឆ្លើយតបទៅនឹងបញ្ហាប្រឈមនានា ដែលកម្ពុជានឹងជួបប្រទះនាពេលខាងមុខនេះ។ បើតាមលោក វិស្សុត បើសិនរដ្ឋាភិបាលមានវិធានការច្បាស់លាស់នោះ កម្ពុជាអាចរក្សាសេដ្ឋកិច្ចបានក្នុងរង្វង ៦,៥ ភាគរយ នៅឆ្នាំ២០២០ខាងមុខ ប៉ុន្តែបើការអនុវត្តគ្មានប្រសិទ្ធភាពទេ សេដ្ឋកិច្ចកម្ពុជា អាចនឹងទាបជាងនេះ។
«យើងថា ៦,៥ ភាគរយ! ខ្ញុំសូមជម្រាបជូនឯកឧត្តមថា មិនមែនលេខ(៦,៥ភាគរយ) ដែលស្រួលរកទេ លេខ ៦,៥នេះ ក្នុងករណីដែលវិធានការខាងក្រោមនេះមានប្រសិទ្ធភាព ដោយមានថវិកាសម្រាប់ទ្រទ្រង់គ្រប់គ្រាន់ទៀត។ ប្រសិនវិធានការមិនមានប្រសិទ្ធភាពទេ លេខ៦,៥ នេះមិនទទួលបានទេ សូមនិយាយត្រង់អ៊ីចឹង»។ នេះជាការលើកឡើងរបស់រដ្ឋលេខាធិការក្រសួងសេដ្ឋកិច្ច។
បច្ចុប្បន្នប្រទេសកម្ពុជារស់បានដោយវិស័យមួយចំនួនដូចជា វិស័យកាត់ដេរ, សំណង់ និងអចលនទ្រព្យ និងទេសចរណ៍ជាដើម។ ហើយបញ្ហាប្រឈមក្នុងវិស័យនានា មានដូចជា ភាពមិនប្រាកដប្រជានៃប្រព័ន្ធអនុគ្រោះពាណិជ្ជកម្ម, បញ្ហារចនាសម្ព័ន្ធ និងសមត្ថភាពស្ថាប័ន និងធនធានមនុស្សជាដើម។ ចំណែកវិស័យដែលរងផលប៉ះពាល់ជាងគេ គឺវិស័យកាត់ដេរ ដែលទទួលឥទ្ធិពលខាងក្នុង និង ខាងក្រៅនាពេលខាងមុខ ដោយវិស័យនេះ ពឹងផ្អែកខ្លាំងទៅលើទីផ្សារសហភាពអឺរ៉ុប និងអាមេរិក។ នេះជាការបញ្ជាក់របស់លោក វង្សី វិស្សុត។
ត្រង់ចំណុចនេះលោក វិស្សុត បានសង្កត់ធ្ងន់ថា ដើម្បីរក្សាកំណើននៃវិស័យកាត់ដេរនេះ រដ្ឋាភិបាលត្រូវបន្តរក្សាទំនុកចិត្តអ្នកវិនិយោគ តាមរយៈកាត់បន្ថយថ្លៃអគ្គីសនី និងរក្សាស្ថេភាព, កាត់បន្ថយសេវាដឹកជញ្ជូន និងឡូជីស្ទីក ។ ជាពិសេសកំណែទម្រង់ស្ថាប័ន ដើម្បីលើកកម្ពស់កិច្ចសម្របសម្រួលពាណិជ្ជកម្ម និងពង្រឹងភាពប្រកួតប្រជែងក្នុងទីផ្សារជាដើម។
«ហើយរឿងនេះមិនអាចក្រសួងណាមួយអាចធ្វើតែម្នាក់ឯងបានទេ ត្រូវធ្វើជាប្រទេស ដោយប្រើកម្លាំងសរុបផ្គួបគ្នា ធ្វើឲ្យស្រុះគ្នា ហើយស្រុះគ្នាកែបាន មិនមែនត្រឹមតែដោះស្រាយរយៈពេលខ្លីត្រឹម ២ ឬ៣ ឆ្នាំទេ គឺអាចដោះស្រាយ ១០ ឬ ២០ ឆ្នាំទៅមុខទៀត »។ នេះជាការបញ្ជាក់របស់រដ្ឋលេខាធិការក្រសួងសេដ្ឋកិច្ច៕
Tag:
វង្សី វិស្សុត
សេដ្ឋកិច្ច
EBA
© រក្សាសិទ្ធិដោយ thmeythmey.com
