ជាតិ
សេដ្ឋកិច្ច
ផ្លូវជាតិលេខ៥៥ ដ៏ស្រស់ស្អាតរបស់ខេត្តពោធិ៍សាត់ ជិតដាក់ឲ្យដំណើរការហើយ រូបពីក្រសួងសាធារណការ និងដឹកជញ្ជូន
× ភ្នំពេញ៖ ក្រសួងសាធារណការ និងដឹកជញ្ជូន នឹងស្នើសុំគោលការណ៍ពីរដ្ឋាភិបាល ដើម្បីដាក់ឲ្យដំណើរការផ្លូវជាតិលេខ៥៥នៅខេត្តពោធិ៍សាត់ នាពេលឆាប់ខាងមុខនេះ។
«ជាផ្លូវសេដ្ឋកិច្ច ផ្លូវទេសចរណ៍ ផ្លូវមានធម្មជាតិស្រស់បំព្រង គ្រោងសុំគោលការណ៍ពីរាជរដ្ឋាភិបាល ដើម្បីដាក់ដំណើរការ ក្នុងពេលឆាប់ខាងមុខនេះ»។ នេះជាការជូនដំណឹង ដែលក្រសួងសាធារណការ និងដឹកជញ្ជូនបានផ្សព្វផ្សាយលើទំព័រហ្វេសប៊ុក នៅថ្ងៃទី១៩ខែកក្កដានេះ។
ផ្លូវជាតិលេខ៥៥ ដែលត្រូវសាងសង់ថ្មីនេះ មាន៩ម៉ែត្រ និងប្រវែង ១៨២គីឡូម៉ែត្រ ដោយតភ្ជាប់ចេញពីទីរួមខេត្តពោធិ៍សាត់ ទៅស្រុកវាលវែង ដល់ថ្មដា ច្រកព្រំដែនកម្ពុជា-ថៃ ។ ក្រៅពីផ្សារភ្ជាប់សកម្មភាពសេដ្ឋកិច្ច ផ្លូវដែលកោងបត់បែន កាត់ជួរភ្នំនេះ អមដោយធម្មជាតិដ៏ស្រស់ស្អាតផងដែរ។ ផ្លូវក៏មានសក្ដានុពលក្នុងភូមិសាស្ត្រខេត្តពោធិ៍សាត់មួយនេះ ត្រូវបានបើកការដ្ឋានសាងសង់ តាំងពីពាក់កណ្ដាលឆ្នាំ២០១៥ ក្រោមកម្ចីពីរដ្ឋាភិបាលចិនប្រមាណ ១៣២លានដុល្លារ។
លោក វ៉ាស៊ឹម សុរិយា អ្នកនាំពាក្យក្រសួងសាធារណការ និងដឹកជញ្ជូន ប្រាប់សារព័ត៌មានថ្មីៗនៅថ្ងៃនេះ ផ្លូវជាតិលេខ៥៥នេះ ត្រូវបានសាងសង់បញ្ចប់រួចរាល់ហើយ ដោយរង់ចាំរដ្ឋាភិបាលដាក់សម្ពោធ។ លោក សុរិយា ប្រាប់ថា ក្រសួងនឹងស្នើសុំរដ្ឋាភិបាលបើកដំណើការផ្លូវមួយខ្សែនេះក្នុងពេលឆាប់ខាងមុខនេះ តែលោកមិនអាចបញ្ជាក់បានថាសំណើរនឹងត្រូវដាក់នៅថ្ងៃណានោះទេ។
គួរបញ្ជាក់ថា ផ្លូវជាតិលេខ៥៥ ត្រូវតភ្ជាប់ចេញពីផ្លូវជាតិលេខ៥ ទៅព្រំដែន ខណៈផ្លូវជាតិលេខ៥ ដែលជាផ្លូវមេចេញពីរាជធានី កំពុងស្ថិតក្រោមការសាងសង់ពង្រីក និងគ្រោងបញ្ចប់នៅឆ្នាំ២០២២ ខាងមុខនេះ។
ខាងក្រោមនេះជាវីឌីអូទិដ្ឋភាពផ្លូវជាតិលេខ៥៥ ដែលក្រសួងចេញផ្សាយកាលពី ឆ្នាំ២០១៨ ៖
© រក្សាសិទ្ធិដោយ thmeythmey.com