ជាតិ
រូបភាពពីទំព័រហ្វេសប៊ុក ធុងបរិស្ថាន
×![]()
ដោយ: ឡាយ សុភាវតី
ភ្នំពេញ៖ សិប្បកម្មធ្វើធុងសំរាម ពីកង់ឡានចាស់ៗ ដែលមានទីតាំងនៅក្នុងស្រុក ព្រៃឈរ នៅខេត្តកំពង់ចាម ទទួលបានការគាំទ្រច្រើនគួរសមពីអតិថិជន រហូតដល់ផលិតមិនទាន់តម្រូវការផង។ បើតាម អ្នកនាង សឿន សុថារី ដែលជាម្ចាស់សិប្បកម្ម ក្នុងមួយថ្ងៃ អ្នកស្រី ទទួលបានការបញ្ជាទិញ ពី២០ ទៅ៣០ធុង ប៉ុន្តែសមត្ថភាពផលិតរបស់សិប្បកម្ម បានមិនដល់ ១០ ធុងសំរាមផងក្នុងមួយថ្ងៃ ដោយសារកង្វះខាតបច្ចេកទេសផលិត។
លោក ហ៊ន៉ វ៉ាន់ថា ជាមេជាងនៅក្នុងសិប្បកម្មកែច្នៃធុងសំរាមនេះ ជាង៤ឆ្នាំមកហើយ។ មេជាងវ័យ៤២ឆ្នាំរូបនេះ ពន្យល់ពីបញ្ហាក្នុងចង្វាក់ផលិតកម្មដូច្នេះ៖«ពិបាកលើបច្ចេកទេសធ្វើ ដោយសារប្រើកម្លាំងដៃ និងកាំបិត សម្រាប់ចៀរកង់ឡាននៅឡើយ។ ជាងក្នុងសិប្បកម្មមានតែ ៦នាក់ ហើយក្នុងមួយថ្ងៃ ជាទូទៅ អាចធ្វើបានត្រឹមតែ៦ធុង។ ខ្ញុំជោគជ័យ អាចយកសំបកកង់ឡានធ្វើជាធុងសំរាមបាន និងមានទីផ្សារធ្វើមិនទាន់ ប៉ុន្តែការប្រឈម គឺមិនទាន់រកឧបករណ៍មកជំនួសកាំបិត ចៀរកង់ឡាន»។
រូបភាពពីទំព័រហ្វេសប៊ុក ធុងបរិស្ថាន
លោក វ៉ាន់ថា រៀបរាប់ដំណើការនៃការធ្វើធុងសំរាមនេះដូច្នេះ៖«ដំបូង ត្រូវដើរទិញសំបក់កង់ឡានពីតាមភូមិស្រុក។ បន្ទាប់មក ត្រូវចាំងក្រឡាកងឡាន រួចចៀរ ដែលធុងសំរាមមួយត្រូវប្រើសំបកកង់ឡានពីរ។ ក្រោយពីចៀររួច ត្រូវពន្លាត់និងដុត រួចទើបចាប់ខ្ចៅធ្វើគម្រប ហើយចុងក្រោយទើបលាងសម្អាត និងបាញ់ថ្នាំ»។
បើតាមលោក វ៉ាន់ថា កង់ឡានមួយ លោកទិញពីគេតម្លៃ ១៥,០០០រៀល។ ចំណែកឯការដឹកជញ្ជូន ក៏ត្រូវគេតាំងពីដឹកពីកន្លែងទិញ មកសិប្បកម្ម និងដឹកពីទីតាំងសិប្បកម្ម នៅកំពង់ចាម មកចែកចាយលក់នៅរាជធានីភ្នំពេញផងដែរ។ ចំណែកឯតម្លៃលក់ចេញវិញ ចន្លោះ ២៥ ដុល្លារ ទៅ៣៤ដុល្លារ។
ដ្បិតតែរអ៊ូមិនដាច់ពីមាត់ ថាការងានេះលំបាក និងសូវចំណេញ ប៉ុន្តែលោកថា មិនបោះបង់ចោលនោះទេ ដោយសារតែជាកិច្ចការដែលនៅមួយកន្លែង ខណៈដែលបច្ចុប្បន្នផលិតផលរបស់ខ្លួន មានការគាំទ្រច្រើនផងនោះ៕
Tag:
ធុងសំរាម
កង់ឡាន
កំពង់ចាម
© រក្សាសិទ្ធិដោយ thmeythmey.com
