ជាតិ
សេដ្ឋកិច្ច
លោក ម៉ុង ឫទ្ធី ស្នើមិនឲ្យមានការបង្ហោះសារបំភ័យអ្នកបរិភោគសាច់ជ្រូក
×
ភ្នំពេញ៖ ជំងឺប៉េស្តជ្រូកអាហ្វ្រិកបានផ្ទុះក្នុងតំបន់មួយចំនួននៅកម្ពុជា និងធ្វើឲ្យការលក់សាច់ជ្រូកលើទីផ្សារថយចុះ ដោយសារប្រជាពលរដ្ឋមួយចំនួនខ្លាចរអានឹងបរិភោគសាច់ជ្រូក។ លោក ម៉ុង ឫទ្ធី អ្នកជំនួញក្នុងវិស័យកសិកម្ម និងជាម្ចាស់កសិកដ្ឋានចិញ្ចឹមជ្រូកផងនោះ បានអំពាវនាវមិនឲ្យមានការបង្ហោះសារបំភ័យអ្នកបរិភោគសាច់ជ្រូក ខណៈជំងឺនេះមិនឆ្លងពីជ្រូកទៅមនុស្សនោះទេ។
ប្រសាសន៍លោក ម៉ុង ឫទ្ធី ដែលបានថ្លែងប្រាប់សារព័ត៌មានថ្មីៗ នៅថ្ងៃទី២០ខែកក្កដានេ៖
«បើយើងមិនចេះបច្ចេកទេសជំងឺសត្វនោះទេ នៅឲ្យស្ងៀមទៅ មិនហូប មិនហូបខ្លួនឯងទៅ កុំបង្ហោះ(សារ) អ៊ីចឹង វាធ្វើឲ្យប៉ះពាល់សតិអារម្មណ៍អ្នកបរិភោគ ប៉ះពាល់អាជីវកម្មរបស់កសិកររបស់យើង»។ លោក ម៉ុងឫទ្ធី លើកឡើងបែបនេះ។
ម្ចាស់ក្រុមហ៊ុនកសិដ្ឋានចិញ្ចឹមជ្រូក M’s Pig រូបនេះ ប្រាប់ថា ជំងឺប៉េស្តនេះអាចនឹងបន្តជាបញ្ហាសម្រាប់វិស័យចិញ្ចឹមជ្រូកដល់ទៅ៥ ឯណោះ។ លោកថ្លែងដូច្នេះថា៖«ជំងឺនៅចាំបំផ្លាញយើងប្រហែលជាបួនប្រាំឆ្នាំឯណោះ ព្រោះចាប់ពីឆ្លងមក ទ្រុងហ្នឹង មិនអាចដាក់ជ្រូកបានទៀតទេ ដាក់ទៅឆ្លងទៀត»។
លើសពីនេះទៅទៀត ទោះបញ្ហាជំងឺប៉េស្តជ្រូកអាហ្វ្រិកនេះបញ្ចប់នៅពេលណាមួយ ក៏វិស័យនេះនៅតែអាចប្រឈមបញ្ហាមួយទៀត គឺខ្វះជ្រូករស់ ហើយសាច់ជ្រូកឡើងថ្លៃខ្ពស់។ រឿងនេះបានកើតឡើងនៅប្រទេសចិនសព្វថ្ងៃនេះ។ លោក ម៉ុង ឫទ្ធី លើកឡើងដូចនេះថា៖«នៅកម្ពុជាយើង ពេលអស់ជ្រូករបស់កសិករ ហើយជ្រូកខ្នាតមធ្យមនោះទៅ ក៏អាចឡើងថ្លៃដូចតែគ្នាដែរ»។
Tag:
ជ្រូក
ប៉េស្ដជ្រូកអាហ្វ្រិក
© រក្សាសិទ្ធិដោយ thmeythmey.com