ភ្នំពេញ៖«អប្បមាទ» ជាពាក្យមួយដែលក្រសួងអប់រំ យុវជន និងកីឡា យកមកប្រើក្នុងសម័យប្រឡងបាក់ឌុបឆ្នាំ២០១៩ នេះ។ ពាក្យនេះនៅក្នុងវចនានុក្រមខ្មែររបស់សម្តេច ជួន ណាត បានពន្យល់លម្អិតថា ជាសេចក្តីមិនធ្វេស មិនប្រហែស ការមិនធ្វេសស្មារតី ការប្រុងប្រយ័ត្នជានិច្ច ការប្រុងមិនឲ្យភ្លាំងភ្លាត់។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានពន្យល់ពាក្យ«អប្បមាទ»សម្រាប់ប្រើនៅក្នុងការប្រឡងបាក់ឌុបថា ជាអ្នកត្រួតពិនិត្យដំណើរការប្រឡងបាក់ឌុប នៅតាមមណ្ឌលប្រឡង។
ការប្រឡងបាក់ឌុបឆ្នាំនេះ ក្រសួងមិនមានអ្នកសង្កេតការណ៍ដូចការប្រឡងបាក់ឌុបរាល់ឆ្នាំនោះទេប៉ុន្តែក្រសួង នឹងពង្រាយមន្ត្រីរបស់ខ្លួន គរុសិស្ស និងគរុនិស្សិត ធ្វើជាអប្បមាទ និងជំនួយការអប្បមាទ សម្រាប់តាមដាន ដំណើរការប្រឡងបាក់ឌុប។ នេះជាការបញ្ជាក់ពីលោក រស់ សុវាចា អ្នកនាំពាក្យក្រសួងអប់រំ ដែលបានប្រាប់សារព័ត៌មានថ្មីៗ។
នាព្រឹកថ្ងៃទី១៧ ខែកក្កដា លោក ហង់ ជួន ណារ៉ុន រដ្ឋមន្ត្រីនៃក្រសួងអប់រំ យុវជន និងកីឡា បានបង្ហាញកំណាព្យមួយ ដែលលោកនិពន្ធតាមរថយន្ត ពីខេត្តកំពង់ឆ្នាំង ទៅពោធិ៍សាត់ ដោយពន្យល់ពីតួនាទី«អប្បមាទ»។ ក្នុងកំណាព្យនេះ លោកបកស្រាយថា៖«ខ្ញុំជាអប្បមាទ នៅពេលប្រឡង បំពេញតាមកម្រងភារកិច្ច ខិតខំប្រឹងប្រែងធ្វើមិនដែលភ្លេច គឺជាកាតព្វកិច្ចដើម្បីខ្មែរ។ កំណែទម្រង់ឲ្យមានគុណភាព ឲ្យយុវជនយើងជ្រាប និងពូកែ ជាពូជសាសន៍ធ្លាប់ខ្លាំង នឹងគេដែរ យើងប្រឹងដើម្បីខ្មែរមានកិត្តិយស។ កើតមកជាតិនេះមិនដែលសោកស្តាយ ខ្ញុំសូមអភិប្រាយដើម្បីជាតិ ហើយសូមកើតមកជាខ្មែរម្តងទៀត ហើយសូមកុំឲ្យឃ្លាតពីអង្គរ។ ខ្ញុំធ្វើដោយការទទួលខុសត្រូវ ប្រឡងនាំមកនូវគុណភាពល្អ ខ្ញុំនឹងធ្វើដោយចិត្តស្មោះសរ កូនខ្មែរអនាគតល្អជាតិរុងរឿង»។
នាថ្ងៃទី១៧ ខែកក្កដានេះដែរ លោករដ្ឋមន្ត្រីអប់រំ បានណែនាំពីតួនាទី និងភារកិច្ច ទៅគណៈកម្មការអប្បមាទទូទាំងប្រទេស និងជំនួយការអប្បមាទទូទាំងប្រទេស ដើម្បីឲ្យដំណើរការប្រឡង ប្រព្រឹត្តទៅស្របតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។
សូមបញ្ជាក់ថា សម័យប្រឡងបាក់ឌុបនៅឆ្នាំនេះ នឹងប្រព្រឹត្តទៅ នៅថ្ងៃទី១៩ ខែសីហានោះ ដោយមានបេក្ខជនប្រឡងសរុបចំនួន ១១៩,២១៧នាក់ ក្នុងនោះមានស្រីចំនួន ៦១,០៣១នាក់។ តាមតួលេខពីក្រសួងអប់រំ ឆ្នាំនេះបេក្ខជនប្រឡងថ្នាក់វិទ្យាសាស្ត្រ ៤៥,៤១៤នាក់(ស្រី២,៥៥២៦នាក់) និងថ្នាក់វិទ្យាសាស្ត្រសង្គម ចំនួន៧៣,៨០៣នាក់ (ស្រី៣៥,៥៣៨នាក់)។ ចំណែកមណ្ឌលប្រឡង មានចំនួន ២០២ មណ្ឌល (កើន៦មណ្ឌល)។
គួររម្លឹកផងដែរថា ការប្រឡងបាក់ឌុបនៅឆ្នាំ២០១៨ មានបេក្ខជនប្រឡងសរុប ១១៧,០៦១នាក់ និងមានមណ្ឌលប្រឡង១៩៥មណ្ឌល។ សិស្សដែលជាប់និទ្ទេស A មានចំនួន២៩០នាក់, និទ្ទេស B មានចំនួន ១,៥៣២នាក់, និទ្ទេសC មានចំនួន ៤,៦៣១នាក់, និទ្ទេស D មានចំនួន១៣,៩៩៩នាក់ និងនិទ្ទេសE មានចំនួន ៥៤.៦០៧នាក់៕