ជាតិ
លោក ស៊ុន ចាន់ថុល បញ្ជាឲ្យមន្ត្រីតាមដានក្រុមហ៊ុនធ្វើផ្លូវ ដើម្បីកុំឲ្យឮពាក្យ«ចាក់ស្ដើងស៊ីក្រាស់ ចាក់ក្រាស់ស៊ីស្ដើង»
រូបពីហ្វេសប៊ុកក្រសួងសាធារណការ និងដឺកជញ្ជូន
×![]()
ដោយ: ធឿន បញ្ញាឬទិ្ធ
ភ្នំពេញ៖ រដ្ឋមន្ត្រីក្រសួងសាធារណៈការ និងដឹកជញ្ជូន លោក ស៊ុន ចាន់ថុល បានប្រាប់មន្ត្រីឲ្យកសាងផ្លូវមានគុណភាពល្អ ដើម្បីបញ្ចៀសការរិះគន់ពីសំណាក់ប្រជាពលរដ្ឋ មកលើការអភិវឌ្ឍហេដ្ឋារចនាសម្ព័ន្ធនៅកម្ពុជា។
«គេថាកម្ពុជាយើង ធ្វើផ្លូវជាប់រហូត គឺជាប់រហូតមែន។ ថ្ងៃនេះធ្វើ(ផ្លូវ) មួយខែក្រោយធ្វើ(ផ្លូវ)ហ្នឹងទៀតហើយ»។ នេះជាអត្ថាធិប្បាយរបស់លោក ស៊ុន ចាន់ថុល ដែលបានលើកយកការរិះគន់លើបញ្ហាផ្លូវថ្នល់ ថ្លែងប្រាប់មន្ត្រីខ្លួន នៅខេត្តស្ទឹងត្រែង នៅថ្ងៃទី២៣ កក្កដានេះ។
លោក ស៊ុន ចាន់ថុល ដែលបានមើលឃើញពីបញ្ហាផ្លូវថ្នល់នេះ បាននិយាយថា ផ្លូវថ្នល់នៅកម្ពុជាកន្លងមក តែងតែជួសជុលឥតស្រាកស្រាន្ត រហូតដល់មានការរិះគន់ថា«ចាក់ស្ដើងស៊ីក្រាស់ ចាក់ក្រាស់ស៊ីស្ដើង» ដែលសំដៅលើផ្លូវគ្មានគុណភាព។
ដើម្បីបញ្ចៀសការរិះគន់ទាំងនេះ រដ្ឋមន្ត្រីក្រសួងសាធារណការរូបនេះ បានប្រាប់ឲ្យមន្ត្រីខ្លួនទាំងអស់ តាមដានរាល់ការសាងសងផ្លូវ របស់ក្រុមហ៊ុន ដែលទទួលបានគម្រោងអភិវឌ្ឍន៍ពីរដ្ឋាភិបាល។
«គេនិយាយទៀតចាក់ស្ដើងស៊ីក្រាស់ ចាក់ក្រាស់ស៊ីស្ដើង។ អាចាក់ក្រាស់ស៊ីស្ដើង វាមិនសូវប៉ុន្មានទេ ប៉ុន្តែអាចាក់ស្ដើងស៊ីក្រាស់ គឺសាហាវណាស់ ព្រោះវាអត់ជាប់ផ្លូវ(គ្មានគុណភាព)ហ្នឹង។ អ៊ីចឹងត្រូវធ្វើតាមនីតិវិធី គឺតាមដានការសាងសងនេះ ឲ្យបានដិតដល់ កុំពឹងផ្អែក១០០ភាគរយទៅក្រុមហ៊ុនទីផ្សារបច្ចេកទេស ដែលយើងជួលគាត់ជាភ្នែកជាច្រមុះយើង ប៉ុន្តែគាត់មិនបានធ្វើការ១០០ភាគរយទេ ដោយសារមិនមែនជាលុយរបស់គាត់»។ នេះជាការលើកឡើងរបស់លោក ស៊ុន ចាន់ថុល ដែលផ្ដាំឲ្យមន្ត្រីខ្លួន ចេះស្ដាយថវិការដ្ឋ ដែលចំណាយលើការសាងសងផ្លូវហើយ បែរជាទទួលបានផ្លូវគ្មានគុណភាពមកវិញ។
គួរបញ្ជាក់ថា រដ្ឋាភិបាលចំណាយថវិកាប្រមាណ២០០លានដុល្លារ សម្រាប់ជួសជុលផ្លូវខូចក្នុងមួយឆ្នាំៗ៕
Tag:
ស៊ុន ចាន់ថុល
ផ្លូវថ្នល់
សាធារណការ
© រក្សាសិទ្ធិដោយ thmeythmey.com
