មន្ត្រីយោធា២នាក់ បាត់ខ្លួនក្នុងឧបទ្ទវហេតុបាក់ស្ពាននៅខេត្តស្ទឹងត្រែង

ជាតិ

សង្គមជាតិ

មន្ត្រីយោធា២នាក់ បាត់ខ្លួនក្នុងឧបទ្ទវហេតុបាក់ស្ពាននៅខេត្តស្ទឹងត្រែង

25, Jul 2019 , 3:37 pm

រូបភាព

ប្រភពរូបថត៖ វ៉ិបសាយក្រសួងព័ត៌មាន

ដោយ: អ៊ូ សុខមាន (OU Sokmean)

ភ្នំពេញ៖ មកដល់ពេលនេះ ពោលគឺរយៈពេល២ថ្ងៃទៅហើយ សមត្ថកិច្ចខេត្តស្ទឹងត្រែងនៅតែមិនទាន់រកឃើញមន្ត្រីយោធាពីររូបដែលបាត់ខ្លួនជាមួយម៉ូតូ ក្នុងឧបទ្ទវហេតុបាក់ស្ពាននោះឡើយ។ គ្រោះថ្នាក់បានកើតឡើងកាលពីថ្ងៃរសៀលថ្ងៃទី២៤ ខែកក្កដា ដោយជនរងគ្រោះបាននាំគ្នាជិះម៉ូតូកាត់ ចំពេលដែលដី និងស្ពានបានបាក់ដោយសារតែកម្លាំងទឹកបុកខ្លាំង។ នេះបើតាមរូបភាពវីដេអូខ្លីមួយ ដែលថតបានដោយចៃដន្យ។

លោក ម៉ៅ តារា ស្នងការនគរបាលខេត្តស្ទឹងត្រែង បានបញ្ជាក់ប្រាប់សារព័ត៌មាន ThmeyThmey ថា ស្ពានឆ្លងកាត់ «អូរម៉ា» ដែលស្ថិតនៅក្នុងភូមិញុំងស៊ុ ឃុំថ្មកែវ ស្រុកសៀមប៉ាង ខេត្តស្ទឹងត្រែងនោះ ជាស្ពានបណ្តោះអាសន្នដើម្បីឲ្យពលរដ្ឋឆ្លងកាត់ប្រចាំថ្ងៃខណៈដែលស្ពានថ្មីធ្វើពីថ្មសាងសង់មិនទាន់រួចនៅឡើយ។

លោកស្នងការខេត្ត បានបន្ថែមថា មន្ត្រីយោធាទាំងពីររូប ដែលមានឈ្មោះ សុខ សុវណ្ណឌី និង ភី ណាក់ដាលី ជាមន្ត្រីយោធា បម្រើការងារជួរមុខក្នុងអង្គភាពវរសេនាតូច ប្រចាំការនៅភូមិសាស្ត្រអូរអាឡៃនៃព្រំដែនកម្ពុជា-ឡាវ។ ពួកគាត់ស្ថិតក្នុងដំណើរទៅកាន់មន្ទីរពេទ្យ មុនពេលជួបគ្រោះថ្នាក់ដោយចៃដន្យ។

គិតត្រឹមម៉ោងជិត៤រសៀល ថ្ងៃទី២៥កក្កដានេះ មិនត្រឹមតែយុវជនទាំង២នាក់នោះ រកមិនទាន់ឃើញទេ សូម្បីតែម៉ូតូ ដែលបានធ្លាក់នៅក្នុងអូរម៉ា ក៏មិនទាន់រកឃើញដែរ។ លោក ម៉ៅ តារា បាននិយាយដូច្នេះ៖«រយៈពេល៣-៤ថ្ងៃនេះ មានភ្លៀងធ្លាក់ខ្លាំង ហើយទឹកអូរម៉ានេះ ក៏ហូរខ្លាំងណាស់ផងដែរ។ មូលហេតុនៃការបាក់ស្ពាននេះ គឺបណ្តាលមកពីភ្លៀង ធា្លក់ខ្លាំងពេកធ្វើឱ្យច្រោះដីផ្នែកខាងក្រោម ហើយស្របនឹងទម្ងន់ទាំង២នាក់នោះ រួមជាមួយទម្ងន់ម៉ូតូ ស្រាប់តែបណ្តាលឲ្យបាក់ស្រុត ធ្វើឲ្យពួកគេធ្លាក់ចូលទឹកទាំងមនុស្ស និងម៉ូតូតែម្តង»៕