អន្តរជាតិ
ស្ត្រីម្នាក់យក Laptop គប់ក្បាលប្តី ដោយសារខឹងគាត់មើលស្រីផ្សេងលើយន្តហោះ
× ស្ត្រីម្នាក់ខឹងសម្បារយ៉ាងខ្លាំង បន្ទាប់ពីឃើញស្វាមីខ្លួន សម្លឹងនារីម្នាក់ផ្សេងទៀតដោយមិនដាក់ភ្នែកក្នុងដំណើរលើយន្តហោះ American Airlines កាលពីពេលថ្មីៗកន្លងមកនេះ។ ទិដ្ឋភាពជម្លោះនោះ ត្រូវអ្នកដំណើរផ្សេងទៀតលួចថត ហើយបង្ហោះនៅលើបណ្តាញសង្គម។
យោងតាមការផ្សាយរបស់ Fox News ស្វាមី-ភរិយាពាក់ព័ន្ធនោះ ធ្វើដំណើរពីអាកាសយានដ្ឋាន Miami International Airport ទៅកាន់ Los Angeles។ តាមសំដីក្នុងវីដេអូ ដែលថតបាននោះ បង្ហាញថា ស្ត្រីជាភរិយាខឹងស្វាមីខ្លួន មើលស្រីដទៃ ហើយបានប្រើប្រាស់ភាសាអសុរសជាច្រើន។
បុគ្គលបម្រើការយន្តហោះព្យាយាមទប់កំហឹងស្ត្រីនោះ ដោយនិយាយថា មានក្មេងនៅក្នុងយន្តហោះផងដែរ ប៉ុន្តែគាត់មិនស្តាប់ឡើយ ហើយថែមទាំងបន្តជេរស្វាមីខ្លួនដោយសំឡេងខ្លាំងៗផ្អើលអ្នកដំណើរផ្សេងទៀត។
ក្រោយមក បុគ្គលិកបម្រើការលើយន្តហោះ បានបំបែកស្វាមីឲ្យទៅអង្គុយខាងមុខ។ បុរសនោះធ្វើតាមសំណូមពរ ប៉ុន្តែនៅពេលដែលគាត់ដើរចេញ ភរិយាបានយក Laptop ទៅគប់ដាក់ក្បាលតែម្តង។
បុរសជាស្វាមីត្រូវបាននាំចេញពីយន្តហោះ ខណៈភរិយារបស់ខ្លួនត្រឡប់ទៅយកកាបូបរបស់ខ្លួន។ មន្ត្រីនៅលើយន្តហោះបានព្រមានថា គាត់ប្រឈមការចោទប្រកាន់ពីបទប្រើហិង្សា ប៉ុន្តែស្ត្រីរូបនោះ ថា មិនខ្វល់នោះឡើយ។
អ្នកនាំពាក្យ American Airlines បានអះអាងប្រាប់ Fox News ថា ជាគោលការណ៍បុគ្គលទាំងពីរត្រូវនាំចេញពីយន្តហោះដើម្បីកុំឲ្យរំខានដល់អ្នកដទៃ។ ប៉ូលិសក៏បានបញ្ជាក់ផងដែរថា បុគ្គលិកយន្តហោះម្នាក់ និងអ្នកដំណើរម្នាក់ទៀត ក៏ត្រូវ Laptop ខ្ទាតចំផងដែរ ប៉ុន្តែមិនមានអ្នកណាដាក់ពាក្យប្តឹងនោះឡើយ។
អ្នកបម្រើលើយន្ត និងអ្នកដំណើរម្នាក់ដែលរងការប៉ះទង្គិចនោះ អាចឡើងយន្តហោះវិញ ទាន់ពេលវេលា ខណៈបុរសដែលជាស្វាមី ត្រូវឡើងយន្តហោះវ៉ុលបន្ទាប់ទៀត។ ក្រោយចេញពីយន្តហោះ ស្ត្រីបង្ករហេតុបានដើរចេញទៅកន្លែងផ្សេងដោយគ្មានអ្នកដឹង ហើយ American Airlines ក៏មិនបានបញ្ជាក់ថា គាត់បានកក់សំបុត្រឡើងវិញ ឬយ៉ាងណានោះឡើយ៕
© រក្សាសិទ្ធិដោយ thmeythmey.com