អន្តរជាតិ
នយោបាយអន្តរជាតិ
ប្រធានាធិបតីទុយនីស៊ីដែលចាស់ជាងគេលើលោក ស្លាប់ក្នុងអាយុ៩២ឆ្នាំ លោក Beji Caid Essebsi ថ្លែងនៅក្នុងក្នុងសន្និសីទសារព័ត៌មាននៅក្នុងខែវិច្ឆិកាឆ្នាំ ២០១៨ (AFP)
× លោក Beji Caid Essebsi ប្រធានាធិបតីទុយនីស៊ី បានទទួលមរណភាពក្នុងអាយុ៩២ឆ្នាំ បន្ទាប់ពីព្យាបាលនៅមន្ទីរពេទ្យចាប់តាំងពីចុងខែមិថុនាមក។ នេះបើតាមការបញ្ជាក់របស់ខុទ្ទកាល័យប្រធានាធិបតី។
លោក Beji Caid Essebsi មានស្ថានភាពជំងឺដ៏ធ្ងន់ធ្ងរ មុនពេលទទួលមរណភាព។ លោកជាប្រធានាធិបតីក្នុងតំណែងដែលមានវ័យចំណាស់ជាងគេលើលោក តែជាប្រមុខរដ្ឋដែលចាស់ជាងគេទីពីរ បន្ទាប់ពីម្ចាស់ក្សត្រី អេលីហ្សាបែតទី២។
លោក Beji បានឡើងកាន់តំណែងក្រោយការបោះឆ្នោតនៅឆ្នាំ ២០១៤ រយៈពេលបីឆ្នាំបន្ទាប់ពីអតីតមេដឹកនាំផ្តាច់ការ Zine El Abidine Ben Ali ត្រូវបានទម្លាក់ពីតំណែងក្នុងចលនាបដិវត្តន៍អារ៉ាប់។
កន្លងមកនេះ បញ្ហាយ៉ាប់យឺននៃសុខភាពរបស់ប្រមុខរដ្ឋទុយនីស៊ី បានបង្កើតជាក្តីបារម្ភសម្រាប់ប្រជាជនគ្រប់ស្រទាប់វណ្ណៈ។ នេះក៏ដោយសារការទំនេរនៃកៅអីប្រធានាធិបតីអាចបង្កើតជាការប្រទាញប្រទង់នយោបាយ មុនការបោះឆ្នោតប្រធានាធិបតីដែលមកដល់ខែវិច្ឆិកាដែរ។
បើតាមរដ្ឋធម្មនុញ្ញដែលបង្កើតឡើងឆ្នាំ ២០១៤ ករណីដែលកៅអីប្រធានាធិបតីនៅទំនេរ នាយករដ្ឋមន្ត្រីនឹងមានអំណាចទទួលខុសត្រូវការងារប្រធានាធិបតី និងការសម្រេចចិត្តនានាក្នុងរយៈពេលមិនយូរជាង ៦០ថ្ងៃឡើយ។ ក្នុងករណីដែលកៅអីនេះនៅទំនេរយូរជាង ៦០ថ្ងៃ ប្រធានសភានឹងត្រូវផ្តល់សេចក្តីទុកចិត្តកាន់កាប់តំណែងប្រធានាធិបតីនេះ ប៉ុន្តែមិនឲ្យលើសពី ៩០ថ្ងៃទេ។
© រក្សាសិទ្ធិដោយ thmeythmey.com