ជាតិ
សង្គមជាតិ
រដ្ឋមន្ត្រីយុត្តិធម៌ ផ្អាកតំណែងប្រធានអយ្យការខេត្តរតនគិរី ក្រោយប្រព្រឹត្តអំពើ «ផិតក្បត់»
លោក ជា ពេជ្រ ប្រធានអយ្យការខេត្តរតនគិរីដែលត្រូវផ្អាកតំណែង
×![]()
ដោយ: ថ្មីៗ
ភ្នំពេញ៖ លោក ជា ពេជ្រ ព្រះរាជអាជ្ញា និងជាប្រធានអយ្យការអមសាលាដំបូងខេត្តរតនគិរី ត្រូវបានលោក អង្គ វង្ស វឌ្ឍនា រដ្ឋមន្ត្រីក្រសួងយុត្តិធម៌ សម្រេចដកតំណែងនិងផ្អាកការងារជាបណ្តោះអាសន្ន ក្រោយពីមានវីដេអូខ្លីបមួយ បានបង្ហាញថា លោកមានរឿងអាស្រូវផិតក្បត់ប្រពន្ធ។ រដ្ឋមន្ត្រីយុត្តិធម៌ បានតែងតាំងលោក ងិន ពេជ ព្រះរាជអាជ្ញារង ឲ្យធ្វើជាព្រះរាជអាជ្ញានិងជាប្រធានស្តីទីនៃអយ្យការអមសាលាដំបូងខេត្តរតនគិរី។ 
លោក អង្គ វង្ស វឌ្ឍានា បានបញ្ជាក់ថា លោក ជា ពេជ្រ ត្រូវបានចោទប្រកាន់ពីបទផិត តាំងពីឆ្នាំ២០១៧ រហូតដល់២០១៩ ដែលមានចែងក្នុងច្បាប់ស្តីពីឯកពន្ធភាព។ ពេលណាតុលាការភ្នំពេញ សម្រេចអំពីទោសជាស្ថាពរលើលោក ជា ពេជ្រ រួចហើយ រដ្ឋមន្ត្រីយុត្តិធម៌ នឹងមានសេចក្តីសម្រេចតាមក្រោយទៀត។
លោក ជិន ម៉ាលីន អ្នកនាំពាក្យក្រសួងយុត្តិធម៌ ប្រាប់សារព័ត៌មានថ្មីៗថា ពាក្យផិត គឺសំដៅលើការផិតក្បត់ភរិយា/ស្វាមី ដោយលួចទៅមានទំនាក់ទំនងជាមួយអ្នកផ្សេង ខណៈខ្លួន នៅជាប់ចំណងអាពាហ៍ពិពាហ៍ផ្លូវច្បាប់ជាមួយភរិយា/ស្វាមី។ លោក លើកឡើងថា ភរិយារបស់លោក ជា ពេជ្រ បានដាក់ពាក្យបណ្តឹងទៅតុលាការភ្នំពេញ ប្តឹងពីបទផិតនេះ។
អ្នកនាំពាក្យរូបនេះ បកស្រាយដូច្នេះថា៖«យើង ផ្អាកការងារគាត់ មិនមែនបញ្ឈប់ទេ។ បើតុលាការ កាត់ក្តីរួចសម្រេចថាគាត់មានទោស យើង នឹងមានវិធានការបន្តទៀត ដូចជាលុបឈ្មោះចេញក្របខណ្ឌជាដើម ហើយការទទួលព្រហ្មទណ្ឌអីគឺទៅតាមហ្នឹង។ តែបើតុលាការ សម្រេចថាគាត់ គ្មានទោសដូចការចោទប្រកាន់ទេ គាត់អាចនឹងទៅបំពេញការងារវិញ»។
កាលពីពេលថ្មីៗនេះ លោករដ្ឋមន្ត្រីយុត្តិធម៌ ក៏បានដកតំណែងលោក អ៊ង រី ព្រះរាជអាជ្ញារងនៃអយ្យការអមសាលាដំបូងខេត្តកោះកុងផងដែរ ដោយប្តូរឲ្យមកបំពេញការងារនៅក្រសួងយុត្តិធម៌វិញ ក្រោយពីភរិយារបស់លោក តាមទាន់ ពេលលោក និងស្រីកំណាន់ លួចជួបគ្នា។ ភរិយារបស់លោក បានថតវីដេអូនោះ បង្ហោះលើបណ្តាញសង្គម៕
Tag:
អង្គ វង្ស វឌ្ឍនា
ជា ពេជ្រ
© រក្សាសិទ្ធិដោយ thmeythmey.com
