ជាតិ
សេដ្ឋកិច្ច
កុំភ្លេច! បុណ្យសមុទ្រលើកទី៨នៅខេត្តកំពត មាន វិថីម្ហូបអាហារ (Street Food) លោក ថោង ខុន រដ្ឋមន្ត្រីក្រសួងទេសចរណ៍(ខាងឆ្វេង) លោក ជាវ តាយ រដ្ឋបាលខេត្តកំពត។
× ភ្នំពេញ៖ បុណ្យសមុទ្រលើកទី៨ នឹងប្រារព្ធធ្វើឡើងនៅខេត្តកំពត ចាប់ពីថ្ងៃទី២០-២២ធ្នូ ឆ្នាំ២០១៩។ ក្នុងឱកាសប្រារព្ធពិធីនេះ លោក ថោង ខុន រដ្ឋមន្ត្រីក្រសួងទេសចរណ៍ បានកំណត់យកខេត្តកំពត ជាខេត្តគំរូក្នុងការរៀបចំឱ្យមាន «វិថីម្ហូបអាហារ» ដែលហៅជាភាសាអង់គ្លេស Street Food» ឱ្យបានលេចធ្លោរឡើង។
បើយោងតាមការផ្សាយរបស់ក្រសួងទេសចរណ៍ ក្រៅពីកំណត់ខេត្តកំពត ជាវិថីម្ហូបអាហារជំរុញ ក៏មានការជំរុញកឱ្យយកចិត្តទុកដាក់ពង្រឹងគុណភាពសេវាកម្ម អនាម័យចំណីអាហារ ត្រូវបានបដិសណ្ឋារកិច្ចល្អ ត្រូវមានឯកសណ្ឋានឱ្យបានត្រឹមត្រូវ និងត្រូវមានការលើកទឹកចិត្តចំពោះមូលដ្ឋានអាជីវកម្មណា ដែលអនុវត្តបានត្រឹមត្រូវតាមនីតិវិធីនៃការត្រួតពិនិត្យ វាយតម្លៃរបស់ក្រសួងទេសចរណ៍។
ជាមួយគ្នានេះ លោក ថោង ខុន បានជំរុញឱ្យរដ្ឋបាលខេត្តកំពត រៀបចំឆ្នេរខ្សាច់ថ្មី ដើម្បីបង្កើតជាផលិតផលទេសចរណ៍ទាក់ទាញបន្ថែម ជាមួយនឹងការផ្សព្វផ្សាយគោលដៅទេសចរណ៍ ពិសេសរមណីយដ្ឋានឋានសួគ៌បូកគោ តំបន់កសិទេសចរណ៍កូនសត្វ ចម្ការម្រេច និងផលិផលម្រេចកំពត ភ្នំកំពង់ត្រាច រមណីយដ្ឋានទឹកឈូ និងរមណីយដ្ឋានទេសចរណ៍ជាច្រើនទៀត ឱ្យកាន់តែទូលាយ ។
បុណ្យសមុទ្រដែលធ្វើឡើងនៅចុងឆ្នាំ២០១៩នេះ ក៏មានការរៀបចំពិព័រណ៍ផលិតផលក្នុងស្រុក ដែលជាផលិតផលកសិកម្មនាំចេញនៅនឹងកន្លែង ដូចជា ធូរេន ចេក សាវម៉ាវ ដូង ស្រកានាគជាដើម ជាមួយនឹងការ សម្តែងសិល្បៈ និងការប្រកួតកីឡាជាតិផ្សេងៗ ដើម្បីទាក់ទាញភ្ញៀវទទេសចរណ៍៕
Tag:
ទេសចរណ៍
បុណ្យសមុទ្រ
កំពត
Street Food
© រក្សាសិទ្ធិដោយ thmeythmey.com