មន្ត្រីបរិស្ថានលើកទឹកចិត្តឱ្យពលរដ្ឋនិងអាជីវករធ្វើសកម្មភាពសម្អាតបរិស្ថាន

ជាតិ

សង្គមជាតិ

មន្ត្រីបរិស្ថានលើកទឹកចិត្តឱ្យពលរដ្ឋនិងអាជីវករធ្វើសកម្មភាពសម្អាតបរិស្ថាន

28, Jul 2019 , 8:59 am

រូបភាព

ដោយ: អុីសា រ៉ហានី (Isa Rohany)

សៀមរាប៖ ការចូលរួមបង្កើតកម្មវិធីឬយុទ្ធនាការសម្អាតបរិស្ថាននៅតាមសហគមន៍ឬតំបន់ដែលខ្លួនរស់នៅ ជារូបភាពដ៏ល្អមួយ ដែលមន្ត្រីនៃក្រសួងបរិស្ថានលើកសរសើរនិងលើកទឹកចិត្តឱ្យធ្វើបន្តទៀត។ នេះជាស្មារតីចូលរួមរបស់ប្រជាពលរដ្ឋ ក្នុងបំណងដើម្បីឱ្យបរិស្ថានក្នុងសង្គមមានសោភណ្ឌភាព។

អត្ថបទទាក់ទង

លោក នេត្រ ភក្ដ្រា៖ កម្ពុជាមានសំរាមប្រមាណ៤លានតោនក្នុងមួយឆ្នាំ

លោក នេត្រ ភក្ដ្រា រដ្ឋលេខាធិការក្រសួងបរិស្ថាន ក្នុងយុទ្ធនាការកាត់បន្ថយការប្រើប្រាស់ថង់ប្លាស្ទិកក្នុងខេត្តសៀមរាប នាថ្ងៃទី២៧ កក្កដា លើកឡើងយ៉ាងដូច្នេះថា៖« ក្នុងនាមក្រសួង ខ្ញុំសុំថ្លែងការកោតសរសើរចំពោះសង្កាត់សាលាកំរើកដែលបានធ្វើសកម្មភាពដែលបងប្អូនប្រជាពលរដ្ឋ ម្ចាស់ភោជនីយដ្ឋាន អ្នករស់នៅក្នុងសង្កាត់ទាំងអស់ បានធ្វើសកម្មភាពប្រមូលនូវសំរាម សម្អាតនៅក្នុងសង្កាត់របស់ខ្លួនដោយមិនចាំបាច់មាននរណាប្រាប់ គឺយើងទាំងអស់គ្នាជាអ្នកដែលទទួលខុសត្រូវនៅក្នុងការសម្អាតអនាម័យបរិស្ថានជុំវិញខ្លួនយើង ហើយពេលបរិស្ថានស្អាត គឺមិនមែនមកពីខាងណាទេ គឺផ្តើមពីខ្លួនយើងទាំងអស់គ្នានេះឯង»។

ការលើកឡើងរបស់លោក នេត្រ ភក្ដ្រា គឺជាការឆ្លើយតបទៅនឹងក្រុមអ្នករកស៊ី និងប្រជាពលរដ្ឋក្នុងសង្កាត់សាលាកំរើក កាលពីថ្ងៃទី២០ កក្កដាកន្លងទៅ បានធ្វើយុទ្ធនាការសម្អាតបរិស្ថានដ៏ធំមួយដែលមានអ្នកចូលរួមប្រមាណ ៧៥០នាក់ បំណងដើម្បីឱ្យសង្កាត់ខ្លួនមានភាពស្អាតនិងបៃតង និងដើម្បីបង្កើតជាអត្ដសញ្ញាណថ្មីមួយដល់សង្កាត់សាលាកំរើក ឱ្យក្លាយជាសង្កាត់ដែលគ្មានសំរាមប្លាស្ទិកទៅថ្ងៃអនាគត។ យុទ្ធនាការនេះមានការចូលរួមពីជនជាតិបរទេស និងខ្មែរដែលមានទាំងម្ចាស់អាជីវកម្មសណ្ឋាគារ ភោជនីយដ្ឋាន សាលារៀន និងមានការគាំទ្រយ៉ាងពេញទំហឹងពីអាជ្ញាធរមូលដ្ឋានផងដែរ៕