ជាតិ
សេដ្ឋកិច្ច
មន្ត្រីជាន់ខ្ពស់ធនាគារជាតិ ស្នើឲ្យអាជ្ញាធរចាត់វិធានការលើក្រុមហ៊ុន «ឥណទានភ្នំពេញ» ដែលគ្មានអាជ្ញាប័ណ្ណ
× ភ្នំពេញ៖ អគ្គនាយករងត្រួតពិនិត្យនៃធនាគារជាតិនៃកម្ពុជា លោក គិត សុវណ្ណារិទ្ធ បានស្នើឲ្យអាជ្ញាធរមានសមត្ថកិច្ចចាត់វិធានការលើ ក្រុមហ៊ុនផ្តល់កម្ចីមួយដែលមានឈ្មោះ «ឥណទានភ្នំពេញ» ដែលគ្មានអាជ្ញាប័ណ្ណ និងច្បាប់អនុញ្ញាតពីធនាគារជាតិនៃកម្ពុជាទេ។
លោក គិត សុវណ្ណារិទ្ធ ថ្លែងប្រាប់សារព័ត៌មានថ្មីៗនាព្រឹកថ្ងៃទី ២៧ ខែកក្កដា ឆ្នាំ២០១៩ នេះថា ប្រជាពលរដ្ឋទាំងអស់ត្រូវមានការប្រុងប្រយ័ត្ន ដើម្បីកុំឲ្យចាញ់បោកពីការខ្ចីលុយ ពីក្រុមហ៊ុនមួយនេះ ព្រោះធនាគារជាតិនៃកម្ពុជាមិនបានផ្ដល់អាជ្ញាប័ណ្ណ និងច្បាប់អនុញ្ញាតឲ្យក្រុមហ៊ុន«ឥណទានភ្នំពេញ»នោះទេ។ មិនត្រឹមតែគ្មានច្បាប់អនុញ្ញាតហើយ ក្រុមហ៊ុនឥណទានមួយនេះ ហ៊ានយករូបថ្នាក់ដឹកនាំនៃធនាគារជាតិទៅប្រើប្រាស់ផ្សព្វផ្សាយពាណិជ្ជកម្ម ដើម្បីបោកបញ្ឆោតប្រជាពលរដ្ឋទៀតផង។ នេះបើតាមលោក សុវណ្ណារិទ្ធ។
លោកបាននិយាយថា៖«ធនាគារជាតិនៃកម្ពុជា មិនបានគាំទ្រ ឬផ្ដល់អាជ្ញាបណ្ណដល់ក្រុមហ៊ុន ឥណទានភ្នំពេញ នេះឡើយ និងស្នើសមត្ថកិច្ចចាត់វិធានការតាមផ្លូវច្បាប់ ចំពោះក្រុមហ៊ុននេះ។ សូមស្នើដល់ប្រជាពលរដ្ឋ មានការប្រុងប្រយ័ត្នចំពោះក្រុមហ៊ុន «ឥណទានភ្នំពេញ» ដែលក្រុមហ៊ុននេះ បានប្រកបអាជីវកម្មផ្ដល់ឥណទាន ឬប្រាក់កម្ចីតាមប្រព័ន្ធអនឡាញ ដោយគ្មានអាជ្ញាប័ណ្ណ ឬច្បាប់អនុញ្ញាតិពីធនាគារជាតិនៃកម្ពុជានោះឡើយ»។
អគ្គនាយករងរូបនេះបន្តថា ក្រុមហ៊ុន «ឥណទានភ្នំពេញ» មិនមែនជាគ្រិះស្ថានមីក្រូហិរញ្ញវត្តុនោះទេ ជាក្រុមហ៊ុនផ្តល់កម្ចីតាមប្រព័ន្ធអនឡាញ។ លោកបន្ថែមថា ធនាគារជាតិនឹងធ្វើការសើបអង្កេតបន្ថែមទៀត នឹងចាត់ការទៅតាមច្បាប់ស្ដីពីគ្រិះស្ថានធនាគារនិងហិរញ្ញវត្ថុដែលមានចែងជាធរមាន៕
© រក្សាសិទ្ធិដោយ thmeythmey.com