លោក ហ៊ូ ក្រើន៖ កូនបៅទឹកដោះគោ បង្កគ្រោះថ្នាក់ដល់ស្លាប់ កើនឡើង៥ដង

ជាតិ

សង្គមជាតិ

លោក ហ៊ូ ក្រើន៖ កូនបៅទឹកដោះគោ បង្កគ្រោះថ្នាក់ដល់ស្លាប់ កើនឡើង៥ដង

28, Jul 2019 , 10:00 am

រូបភាព

លោក ហ៊ូ ក្រើន អនុប្រធានអង្គការ Helen Keller ប្រចាំកម្ពុជា( ប្រភពរូប ពីAKP)

ដោយ: អ៊ូ សុខមាន (OU Sokmean)

ភ្នំពេញ៖ ការបំបៅកូនដោយទឹកដោះគោ បង្កហានិភ័យដល់ជីវិតកើនឡើង៥ដង បើធៀបទៅនឹងការបំបៅកូនដោយទឹកដោះម្តាយ។ នេះបើតាមទីភ្នាក់ងារសារព័ត៌មានជាតិកម្ពុជា(KAP) ដែលបានស្រង់សម្តីលោក ហ៊ូ ក្រើន អនុប្រធានអង្គការ Helen Keller ប្រចាំកម្ពុជា នៅក្នុងវគ្គបណ្តុះណ្តាលអ្នកសារព័ត៌មាន ស្តីពីការបំបៅកូនដោយទឹកដោះម្តាយ និងអាហារូបត្ថម្ភ កាលព្រឹកថ្ងៃទី២៥ កក្កដា នៅសណ្ឋាគារ Sunway។

សារព័ត៌មានជាតិ(KAP) បានស្រង់សម្តី លោក ហ៊ូ ក្រើន ថា ហានិភ័យរហូតដល់ជីវិតនេះ ព្រោះការបំបៅកូនដោយទឹកដោះគោ បណ្តាលឱ្យកុមារខ្វះអាហារូបត្ថម្ភ ខ្វះសារធាតុចិញ្ចឹមធ្វើឱ្យកុមារមានបញ្ហាក្រិសក្រិន ខ្សោយសតិបញ្ញា រៀនត្រួតថ្នាក់ និងមានរាង្គកាយស្គមដែលអាចស្លាប់បាន។ ចំណែកការបំបៅកូនដោយទឹកដោះម្តាយមានសារធាតុចិញ្ចឹមជីវិតរស់នៅ និងទ្រទ្រង់រាងកាយសម្រាប់សុខភាពជាងម្សៅទឹកដោះគោ។

ការបំបៅកូនដោយទឹកដោះម្តាយ បានធ្លាក់ចុះពី ៧៣,៥ភាគរយ នៅឆ្នាំ២០១០ មកត្រឹម ៦៤,៦ភាគរយនៅឆ្នាំ២០១៤។ ការចាប់ផ្តើមបំបៅកូនដោយទឹកដោះម្តាយភ្លាមៗក្នុងអំឡុងម៉ោងដំបូងបន្ទាប់ពីសម្រាលបានធា្លក់ចុះពី ៦៥,៣ភាគរយ មកត្រឹម ៦២,៦ភាគរយ និងការបន្តបៅកូនដោយទឹកដោះម្តាយរហូតដល់អាយុ១២ខែ បានធ្លាក់ចុះពី៨៣ភាគរយ មកត្រឹម ៨០ភាគរយ។ ចំណែកការបំបៅកូនដោយដបទឹកដោះគោ មានការកើនឡើងយ៉ាងឆាប់រហ័សចាប់ពី១១,៨ភាគរយនៅឆ្នាំ២០០៥ រហូតដល់ ២៤,៧ភាគរយ នៅឆ្នាំ២០១០ និងកើនឡើងបន្ថែមរហូតដល់ ៣១ភាគរយនៅឆ្នាំ២០១៤។ នេះបើតាមលោក ហ៊ូ ក្រើន។

លោកបានបញ្ជាក់ថា មូលហេតុដែលធ្វើឱ្យថយចុះនៃអត្រាបំបៅកូនដោយទឹកដោះម្តាយនេះ គឺបណ្តាលមកពីការរីករាលដាលនៃការផ្សព្វផ្សាយលក់ផលិតផលម្សៅទឹកដោះគោជំនួសទឹកដោះម្តាយ។ ម្យ៉ាងទៀតបណ្តាលមកពីកង្វះចំណេះដឹងអំពីការបំបៅកូនដោយទឹកដោះម្តាយ ខ្វះខាតការគាំទ្រពីសមាជិកគ្រួសារ មិត្តភក្តិ និងសង្គម រួមទាំងបញ្ហាម្តាយទៅធ្វើការងារក្រោយសម្រាលកូនជាដើម៕