ទោះជីវិតលំបាកយ៉ាងណា តែហត្ថានៅតែជម្នះ រហូតក្លាយជាអ្នកនិពន្ធសៀវភៅទស្សនវិជ្ជាលេចធ្លោម្នាក់

ជាតិ

បទយកការណ៍ / បទសម្ភាសន៍

ទោះជីវិតលំបាកយ៉ាងណា តែហត្ថានៅតែជម្នះ រហូតក្លាយជាអ្នកនិពន្ធសៀវភៅទស្សនវិជ្ជាលេចធ្លោម្នាក់

28, Jul 2019 , 1:24 pm

រូបភាព

ដោយ:

ភ្នំពេញ៖ ក្នុងវ័យ២៧ឆ្នាំ កញ្ញា សែត ហត្ថា បាននិពន្ធសៀវភៅបានចំនួន៣ក្បាល ដែលកំពុងមានការគាំទ្រពីមជ្ឈដ្ឋានអ្នកអាន ខណៈដែលរូបនាងមិនមានសញ្ញាបត្រការសិក្សាខ្ពស់នោះទេ។ ជាកូនកសិករនៅខេត្តពោធិ៍សាត់ ហត្ថា ដែលឆ្លងកាត់ការលំបាកជាច្រើន បានដុះគំនិតបែបទស្សនវិជ្ជា ដែលតែងតែចង់ចែករំលែកវាទៅអ្នកដទៃ តាមរយៈសំណេរ។ បច្ចុប្បន្ន នាងជាអ្នកនិពន្ធសៀវភៅបែបលើកទឹកចិត្ត ដែលបញ្ចូលនូវទស្សនៈជាច្រើន ដើម្បីបណ្តុះគំនិតដល់យុវជន ឲ្យមានចេះវែកញែក វិភាគ និងពិចារណាបានស៊ីជម្រៅ សម្រាប់ជាប្រយោជន៍ក្នុងការរស់នៅប្រចាំថ្ងៃ។

ជាបន្តសូមអញ្ជើញស្តាប់ជីវព័ត៌មាន ដែលរៀបចំដោយ លោក រ៉ឹម ភារី អ្នកយកព័ត៌មាននៃសារព័ត៌មានថ្មីៗដូចតទៅ៖

កើតនៅក្នុងគ្រួសារក្រីក្រនៅជនបទនៅខេត្តពោធិ៍សាត់ ដែលមានឪពុកតែងតែប្រើប្រាស់ហិង្សា បានធ្វើឲ្យ កុមារី សែត ហត្ថា បាត់បង់ភាពកក់ក្តៅពីគ្រួសារ និងឈប់រៀនម្តងជាពីរដងរហូតចាកចេញពីផ្ទះ ទៅដាំបន្លែនិងឃ្វាលគោ ជាមួយដូនចាស់ម្នាក់ និងធ្វើជាកម្មករតាមផ្ទះ ដើម្បីសន្សំលុយត្រឡប់មកចូលរៀនវិញ។ រស់នៅក្រៅផ្ទះ និងត្រូវធ្វើការដ៏លំបាកលំបិនទាំងនៅកុមារភាពនេះហើយ បានធ្វើឲ្យហត្ថា មានគំនិត និងទស្សនៈជាច្រើន ក្នុងការដោះស្រាយបញ្ហា។ លើសពីនេះ នាងបានយកបទពិសោធន៍ទាំងនេះ រួមផ្សំនឹងរឿងរ៉ាវអ្នកដទៃ សរសេរជាសៀវភៅបែបទស្សនវិជ្ជា រហូតមានការគាំទ្រពីអ្នកអានកាន់តែច្រើន។

មានវ័យ ២៧ឆ្នាំ កញ្ញា សែត ហត្ថា ជាកូនច្បងក្នុងចំណោមបងប្អូន៥នាក់។ តាមពិតទៅ នាងគ្មានក្តីស្រមៃថានឹងធ្វើជាអ្នកនិពន្ធសោះឡើយ ខណៈជីវិតកុមារភាពរបស់ខ្លួន រកតែភាពស្រណុកស្រួលមួយថ្ងៃសឹងតែមិនបានផងនោះ។ តែផ្ទុយទៅវិញ ភាពលំបាក និងភាពស្មុគស្មាញចិត្ត ដែលពិបាកនឹងរកអ្នកស្តាប់នេះហើយ ដែលជំរុញឲ្យ ហត្ថា ផ្តើមបង្ហូរសេចក្តីទុក្ខសោកចេញពីខ្លួនតាមរយៈសំណេរ។ នាងបានរម្លឹកយ៉ាងដូច្នេះថា៖ «ខ្ញុំមិនដែលគិតថា ខ្ញុំក្លាយជាអ្នកនិពន្ធនោះទេ។ ប៉ុន្តែរឿងដែលជំរុញឲ្យខ្ញុំសរសេរ គឺដោយសារខ្ញុំមានរឿងច្រើនដែលខ្ញុំចង់និយាយ តែខ្ញុំមិនមានឱកាសនិយាយ។ វាមានរឿងនៅក្នុងចិត្តជាច្រើន ដែលសំឡេងយើងមិនអាចនិយាយឲ្យអ្នកផ្សេងឮ ហើយខ្ញុំតែងតែចែករំលែកជាមួយសៀវភៅ។ ខ្ញុំបានស្គាល់ពិភពលោក តាមរយៈការអាន។ ខ្ញុំជាក្មេងម្នាក់កើតមកក្នុងគ្រួសារក្រីក្រ ហើយអត់មានលទ្ធភាព ដើម្បីមើលពិភពលោកឲ្យបានទូលំទូលាយ មិនមានអ្នកលើកទឹកចិត្តយើងនៅក្នុងការទទួលបានការអប់រំ។ យើងខ្វះគំរូភាពល្អៗមើល។ អ៊ីចឹង ជីវិតហ្នឹង យើងមានរឿងច្រើនចង់និយាយ តែយើងអត់ដឹងថា និយាយប្រាប់នរណា? នេះជាមូលហេតុដែលខ្ញុំផ្តើមសរសេររឿងក្នុងចិត្តរបស់ខ្ញុំ»។

តាមពិតទៅ ហត្ថា រៀនមិនបានខ្ពស់នោះទេ។ នាងរៀនបានត្រឹមថ្នាក់ទី១២ និងទទួលបានអាហារូបករណ៍ពីអង្គការបារាំងមួយនៅភ្នំពេញ ដោយទទួលបានការបណ្តុះបណ្តាលរយៈពេល២ឆ្នាំលើជំនាញព័ត៌មានវិទ្យា ភាសាអង់គ្លេស និងជំនាញទន់។

ទោះមិនមានសញ្ញាបត្រការសិក្សាថ្នាក់ខ្ពស់មែន តែស្ត្រីមាឌល្អិតរូបនេះ បានសរសេរសៀវភៅបានចំនួន៣ក្បាល ដែលសុទ្ធតែជាសៀវភៅបែបលើកទឹកចិត្ត និងបណ្តុះអ្នកអានរបស់នាង ឲ្យពិចារណាបានស៊ីជម្រៅ។ សៀវភៅរបស់នាង បានលក់ដាច់ខ្លាំងនៅក្នុងទីផ្សារកម្ពុជា ស្របពេលដែលសង្គមមួយនេះ មានចំនួនអ្នកអានតិចតួចនៅឡើយ។

មានសម្បុរខ្មៅ សក់រួញ ហត្ថាដែលអង្គុយក្បែររូបសំណាក សម្តេចសង្ឃរាជ ជួន ណាត ក្នុងទីធ្លាសាកលវិទ្យាល័យភូមិន្ទភ្នំពេញ បាននិយាយផង និងធ្វើកាយវិការផង ដើម្បីសង្ខេបពីខ្លឹមសារសៀវភៅរបស់នាងយ៉ាងដូច្នេះថា៖ «ទី១. សៀវភៅ វិញ្ញាសាជីវិត ដែលជាសៀវភៅបែបជំរុញទឹកចិត្តអ្នកអាន។ ស្ទើរតែ៩០ភាគរយក្នុងសៀវភៅនេះ ខ្ញុំសរសេរពីបញ្ហាអ្នកអាន ព្រោះកាលណោះ គាត់អត់ស្គាល់ថាខ្ញុំជានរណា ប៉ុន្តែគាត់តែងតែផ្ញើសារមកសួរខ្ញុំពីបញ្ហារបស់គាត់។ ហើយអ្នកខ្លះ មានបញ្ហាស្ទើរតែទៅសម្លាប់ខ្លួន។ ខ្ញុំតែងតែចំណាយពេលច្រើនជាមួយពួកគាត់ដើម្បីប្រឹក្សាយោបល់។ ទី២. សៀវភៅ កាដូជីវិត ដែលសរសេរពីរឿងរ៉ាវឈឺចាប់ខ្លះៗ ទាក់ទងនឹងការតស៊ូក្នុងការសិក្សា ការជួបបញ្ហាក្នុងជីវិតនានារបស់ខ្ញុំ ដែលមានរហូតដល់៦០ទៅ៧០ភាគរយ។ ឯ៣០ ឬ៤០ភាគរយទៀត គឺជាអត្ថបទអំពីអ្នកអានដូចគ្នា។ ទី៣. សៀវភៅខ្យល់ដង្ហើម ដែលមិនបានដកស្រង់ពីបទពិសោធន៍ជីវិតខ្លួនឯង និងបទពិសោធន៍ជីវិតនរណាឡើយ។ ប៉ុន្តែអត្ថបទហ្នឹង ខ្ញុំអត់ដែលជួបនៅឯណា ខ្ញុំអត់ដែលអានសៀវភៅប្រទះឃើញនៅណា។ អត្ថបទហ្នឹង វាជាឃ្លាមួយដែលខ្ញុំនឹកឃើញ ពេលខ្ញុំធ្វើដំណើរតាមឡាន ឬពេលខ្ញុំធ្វើអ្វីមួយ…»។

នៅក្នុងចំណោមសៀវភៅទាំង៣ក្បាលនេះ សៀវភៅវិញ្ញាសាជីវិត បានលក់ដាច់ច្រើនជាងគេ ព្រោះ ត្រឹមតែរយៈពេលជិត២ឆ្នាំ នាងបានលក់វាបានរហូតដល់១ម៉ឺន ៤ពាន់ក្បាល។

អ្នកនិពន្ធមាឌល្អិតរូបនេះ បានបន្តរៀបរាប់តាមបែបអ្នកប៉ិនវោហារទៀតថា ការសរសេរសៀវភៅបែបទស្សនវិជ្ជា គឺដោយសារតែនាងចង់ផ្តល់របៀបគិតមួយបែបពិចារណា ទៅដល់យុវជន ដើម្បីឲ្យពួកគេព្យាយាមដោះស្រាយបញ្ហានៅក្នុងជីវិតប្រចាំថ្ងៃ។ សម្រាប់ សែត ហត្ថា នាងមិនសរសេរសៀវភៅអំពីរឿងស្នេហា ឬមនោសញ្ចេតនា ព្រោះនាងយល់ថា វានឹងធ្វើឲ្យយុវជនមានគំនិតរវើរវាយ មិនអាចដោះស្រាយបញ្ហាអ្វីបាន។

អ្នកនិពន្ធ សែត ហត្ថា ពន្យល់បន្ថែម៖ «អ្វីដែលយើងឆ្លៀតធ្វើ គឺយើងចង់បញ្ចូលទស្សនៈឲ្យបានច្រើន ព្រោះ យើងគិតថា វាជាគំនិតមួយ ជាអាហារផ្លូវចិត្តមួយ ដែលជួយដល់ការគិតរបស់គាត់ ជួយផ្លាស់ប្តូរផ្នត់គំនិតរបស់គាត់ ដែលនេះជាការបំភ្លឺផ្លូវដល់គាត់។ យើងមិនចង់ឲ្យគាត់វក់វី នឹងអារម្មណ៍មនោសញ្ចេតនា ស្នេហាអូនបង។ ពេលខ្លះវាដូចជាពង្វក់ ខណៈយើងកំពុងស្មុគស្មាញ វារកច្រកចេញអត់ឃើញ ពេលអានរឿងមនោសញ្ចេតនា អារម្មណ៍អីហ្នឹង ក្រញ៉ាញ់នៅហ្នឹង ទៅណាអត់រួចទេ»។

កញ្ញា សែត ហត្ថា ដែលមានឈ្មោះក្រៅថា «កូនចាបមាស» មិនបានទទួលការបណ្តុះបណ្តាលលើមុខវិជ្ជាទស្សនវិជ្ជា និងផ្នែកការតែងនិពន្ធនោះទេ។ ប៉ុន្តែនាងសរសេរសៀវភៅទាំងនេះ ដោយផ្នែកតាមបទពិសោធន៍ជីវិតរបស់នាង ដែលសន្សំតាំងពីអតីតកាល បទពិសោធន៍អ្នកដទៃ ការសង្កេតបញ្ហានានានៅក្នុងសង្គម ភាពឧស្សាហ៍ក្នុងការពិចារណា និងការអានច្រើន។ ជាពិសេស នាងទទួលចំណេះដឹងពីវត្តអារាម ដ្បិតនាងបានអានសៀវភៅជាច្រើននៅវត្ត ដូចជា ព្រះត្រៃបិដក ជាដើម។ នាង អត្ថាធិប្បាយថា ការសរសេរសៀវភៅ មិនមែនសម្រាប់តែអ្នកមានសញ្ញាបត្រខ្ពស់នោះទេ។ ប៉ុន្តែ វាអាស្រ័យលើសមត្ថភាពបុគ្គល ដែលអាចសរសេរឲ្យអ្នកអានគាំទ្រ និងទទួលស្គាល់ស្នាដៃទាំងនោះ។

ជាមនុស្សនឹងធឹង សម្តីសំដៅត្រង់ៗ និងមុតស្រួច ហត្ថាបានបរិយាយយ៉ាងដូច្នេះ៖ «សម្រាប់អ្នកអាន ដែលអានស្នាដៃមួយយល់ មិនមែនអ្នកនិពន្ធនោះ ខ្ពស់ផុតគាត់បាត់នោះទេ។ បើខ្ពស់ផុតគាត់ពេក ក៏គាត់តាមអត់ទៅដល់ទេ។ សំខាន់ តើអ្នកនិពន្ធនោះសរសេរប៉ះគាត់អត់? សរសេរប៉ះហ្នឹងអ៊ីចេះ! ឧបមាថា អ្នកនិពន្ធខ្លះប្រើពាក្យដូចៗគ្នា។ ហេតុអ្វីអ្នកនិពន្ធខ្លះ ប្រើពាក្យហ្នឹងដែរ ធ្វើឲ្យប៉ះដល់អ្នកអាន? បើកន្លែងហ្នឹងអ្នកនិពន្ធឈឺចាប់ អ៊ីចឹងធ្វើឲ្យអ្នកអានដល់ត្រង់ហ្នឹង ឈឺចាប់អួលណែនដែរ។ វាមកពីរបៀបនៃការផ្ទេរ របៀបនៃការនិយាយ របៀបប្រើពាក្យពេចន៍ សិល្ប៍វិធីរបស់ខ្លួនឯងហ្នឹង ដែលធ្វើឲ្យប៉ះអ្នកអាន។ ខ្ញុំមិនគិតថា ទាល់តែអ្នករៀនខ្ពស់ដាច់គេ ទើបអាចនិពន្ធបាន ព្រោះបទពិសោធន៍ក្នុងជីវិត គ្មាននរណាខ្ពស់ដាច់នោះទេ វាឆ្លងកាត់ស្រដៀងគ្នាហ្នឹង»។

កញ្ញា សែត ហត្ថា មិនត្រឹមតែចេះនិពន្ធនោះទេ តែស្ត្រីខ្មែររូបនេះ មានជំនាញរចនា (ឌីស្សាញ) និងមានបទពិសោធន៍ធ្វើការផ្នែកទីផ្សារឌីជីថល (Digital Marketing) ២ឆ្នាំជាមួយក្រុមហ៊ុនឯកជនមួយនៅភ្នំពេញ។ ជំនាញទាំងនេះ បានជំរុញឲ្យស្នាដៃសៀវភៅរបស់នាង មានភាពលេចធ្លោ និងលក់ដាច់ខ្លាំងក្នុងបណ្តាញសង្គមហ្វេសប៊ុក តាមតូបលក់សៀវភៅ និងបណ្ណាគារជាច្រើននៅទូទាំងប្រទេសកម្ពុជា។

ក្រៅពីសរសេរសៀវភៅ ហត្ថា បានបង្កើតក្រុមហ៊ុនគ្រឹះស្ថានបោះពុម្ពផ្សាយ ដើម្បីសម្រួលដល់អ្នកនិពន្ធផ្សេងទៀត ឲ្យមានឱកាសបោះពុម្ពស្នាដៃរបស់ខ្លួនទៅកាន់អ្នកអាន និងការពារកម្មសិទ្ធិបញ្ញាឲ្យអ្នកនិពន្ធទៀតផង។ ប៉ុន្តែ សម្រាប់គ្រឹះស្ថានបោះពុម្ពរបស់ហត្ថា និងស្ថាបនិក៣រូបទៀត គឺបោះពុម្ព និងលក់តែប្រភេទសៀវភៅបែបទស្សនវិជ្ជាប៉ុណ្ណោះ ដើម្បីផ្តល់ការគិតដល់អ្នកអានជាប្រយោជន៍សម្រាប់អ្នកអាន និងសង្គមជាតិ។

បើតាម កញ្ញា សែត ហត្ថា បច្ចុប្បន្ន ចំណូលពីការលក់សៀវភៅ និងការងាររបស់នាង បានធ្វើឲ្យគ្រួសាររបស់ខ្លួនបានចាកផុតពីភាពក្រីក្រ និងក្លាយជាគ្រួសារគំរូក្នុងការជំរុញកូនៗទៅរៀនទៀតផង។ នៅថ្ងៃអនាគត ស្ត្រីមាឌល្អិត តែចិត្តធំរូបនេះ មានបំណង បង្កើត App ដើម្បីលក់សៀវភៅជា PDF និងសំឡេង ដើម្បីបង្កើតភាពងាយស្រួលក្នុងការចែកចាយសៀវភៅទៅកាន់មនុស្សឲ្យបានកាន់តែច្រើន៕