ជាតិ
សេដ្ឋកិច្ច
សេដ្ឋកិច្ចកម្ពុជាមានស្ថានភាពល្អក្នុងឆ្នាំ២០១៩ ប៉ុន្តែអាចជួបហានិភ័យនៅថ្ងៃអនាគត បើមិនធ្វើពិពិធកម្មសេដ្ឋកិច្ច
×![]()
ដោយ: ភួង វ៉ាន់ថា
ភ្នំពេញ៖ កំណើនសេដ្ឋកិច្ចកម្ពុជា នៅតែស្ថិតក្នុងស្ថានភាពរឹងមាំ ៧,១ ភាគរយ ក្នុងឆ្នាំ២០១៩នេះ បើទោះបីជាកំណើនសេដ្ឋកិច្ចពិភពលោក បានថមថយល្បឿន ដោយសារការថយចុះនៃសកម្មភាពពាណិជ្ជកម្មអន្តរជាតិក្តី។ លោកស្រី ជា សិរី នាយិកាបច្ចេកទេសនៃធនាគារជាតិ បានលើកឡើងបែបនេះក្នុងកម្មវិធី បូកសរុបលទ្ធផលការងារប្រចាំឆមាសទី១ និងទិសដៅការងារឆមាសទី២ឆ្នាំ២០១៩ របស់ធនាគារជាតិ កាលពីថ្ងៃទី២៧ ខែកក្កដា ឆ្នាំ២០១៩។
នាយិកាបច្ចេកទេសនៃធនាគារជាតិ បាននិយាយថា ក្នុងឆ្នាំ២០១៩នេះ សេដ្ឋកិច្ចកម្ពុជានឹងមានកំណើន ៧,១ ភាគរយ ព្រោះមានការគាំទ្រដោយវិស័យសំខាន់ៗ ដូចជា វិស័យឧស្សាហកម្ម ១០,៥ ភាគរយ, សេវាកម្ម ៦,៦ ភាគរយ ហើយគួបផ្សំនឹងការកើនល្បឿនបន្តិចនៃវិស័យកសិកម្ម ១,៤ ភាគរយ។បើតាមលោកស្រី ជា សិរី ជញ្ជីងទូទាត់កម្ពុជា ត្រូវបានប៉ាន់ស្មានថាមានស្ថានភាពល្អប្រសើរ និងបន្តអតិរេក ៥,៥ ភាគរយនៃផលិតផលក្នុងស្រុកសរុប (៧៤១ លានដុល្លារអាមេរិក)។ ប៉ុន្តែសេដ្ឋកិច្ចកម្ពុជាក៏ងាយនឹងជួបហានិភ័យផងដែរនាថ្ងៃអនាគត ដែលតម្រូវកម្ពុជាត្រូវតែធ្វើពិពិធកម្មលើសេដ្ឋកិច្ច លើគ្រប់វិស័យ។
នាយិកាបច្ចេកទេសនៃធនាគារជាតិរូបនេះ បាននិយាយដូច្នេះថា៖«បើយើងពិនិត្យជារួមសេដ្ឋកិច្ចក្នុងតំបន់អាស៊ីយើងនឹងនៅបន្តដឹកនាំកំណើនសេដ្ឋកិច្ចអន្តរជាតិ ដោយសារនៅក្នុងសហរដ្ឋអាមេរិកក្តី នៅអឺរ៉ុបក្តី នៅជប៉ុនក្តីកំណើនកើនឡើងដែរប៉ុន្តែក្នុងកម្រិតទាប។ ដោយឡែកក្នុងតំបន់អាស៊ីកំណើននឹងកាន់តែខ្ពស់»។
លោកស្រី សិរី ក៏សង្កត់ធ្ងន់ថា កម្ពុជា ជាប្រទេសពឹងផ្អែកលើវិស័យតិចតួច ដែលងាយប្រឈមនឹងភាពផុយស្រួយដល់កំណើនសេដ្ឋកិច្ច ដែលនាំឲ្យមានហានិភ័យណាមួយកើតឡើង ទៅលើវិស័យទាំងនោះ រួមមាន កសិកម្ម កាត់ដេរ និងសំណង់ជាដើម។
«វិស័យកសិកម្មនៅតែដើរតួនាទីសំខាន់ក្នុងសេដ្ឋកិច្ចកម្ពុជា បើទោះបីជាមើលទៅមានសភាពតូចក្តី ដូច្នេះក្នុងករណីមានការបម្រែបម្រួលអាកាសធាតុ (មិនមានភ្លៀងធ្លាក់គ្រប់គ្រាន់) វានឹងធ្វើឲ្យប៉ះពាលដល់ជីវភាពកសិករយ៉ាងច្រើន។ ការរំពឹងលើវិស័យកាត់ដេរក៏ធំដែរ ខណៈវិស័យមួយនេះងាយនឹងទទួលការប្រែប្រួលនៃតម្រូវការ។ យើងធ្លាប់មានពិសោធន៍ក្នុងឆ្នាំ២០០៨ និង២០០៩ នៅពេលដែលសេដ្ឋកិច្ចអន្តរជាតិធ្លាក់ចុះ ប្រជាពលនៅក្នុងប្រទេសទាំងអស់នោះគាត់ឈប់ត្រូវការទិញខោអាវ ដូច្នេះតម្រូវការទិញខោអាវត្រូវធ្លាក់ចុះ ដែលធ្វើឲ្យការបញ្ជាទិញខោអាវពីកម្ពុជានឹងធ្លាក់ចុះផងដែរ ដែលបណ្ដាលឲ្យពលរដ្ឋកម្ពុជាប្រឈបនឹងភាពគ្មានការងារធ្វើ»។នេះជាការលើកឡើងរបស់នាយិកាបច្ចេកទេសនៃធនាគារជាតិ។
កន្លងមកលោក វង្សី វិស្សុត រដ្ឋលេខាធិការនៃក្រសួងសេដ្ឋកិច្ច ដែលនិយាយថា សេដ្ឋកិច្ចកម្ពុជា នឹងធ្លាក់ចុះនៅឆ្នាំ២០២០ខាងមុខ ដែលបណ្ដាលមកពីកត្តាខាងក្នុង និងខាងក្រៅ។ ដ្បិតមិននិយាយចំៗក្តី ប៉ុន្តែលោក វង្សី វិស្សុត បានអះអាងថា កត្តាខាងក្នុងនោះ គឺមកពីកង្វះការយកចិត្តទុកដាក់កំណែទម្រង់ឲ្យដល់កម្រិត ទើបនាំឲ្យកម្ពុជាប្រឈមមុខនឹងបញ្ហាដកប្រព័ន្ធអនុគ្រោះពន្ធ។ ចំណែកកត្តាខាងក្រៅ ដែលលោក វិស្សុត យល់ឃើញវិញនោះ គឺមកពីបញ្ហាសង្គ្រាមពាណិជ្ជកម្មរវាងប្រទេសមហាអំណាច និងការប្រកួតប្រជែងផលិតផលស្ដង់ដារនៅក្នុងទីផ្សារជាដើម។
ចំពោះកត្តាខាងក្នុងនេះលោក វង្សី វិស្សុត បានទាមទារឲ្យរដ្ឋាភិបាលធ្វើកំណែទម្រង់ជាក់លាក់ និងមានប្រសិទ្ធភាពរយៈពេលវែង ដើម្បីឆ្លើយតបទៅនឹងបញ្ហាប្រឈមនានា ដែលកម្ពុជានឹងជួបប្រទះនាពេលខាងមុខនេះ។ បើតាមលោក វិស្សុត បើសិនរដ្ឋាភិបាលមានវិធានការច្បាស់លាស់នោះ កម្ពុជាអាចរក្សាសេដ្ឋកិច្ចបានក្នុងរង្វង ៦,៥ ភាគរយ នៅឆ្នាំ២០២០ខាងមុខ ប៉ុន្តែបើការអនុវត្តគ្មានប្រសិទ្ធភាពទេ សេដ្ឋកិច្ចកម្ពុជា អាចនឹងទាបជាងនេះ។
ថ្លែងក្នុងសិក្ខាសាលាសភាដើម្បីឈ្វេងយល់ពីការកសាងក្របខ័ណ្ឌគោលនយោបាយម៉ាក្រូសេដ្ឋកិច្ច និងគោលនយោបាយ ហិរញ្ញវត្ថុសាធារណៈ សម្រាប់រៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២០ រដ្ឋលេខាធិការក្រសួងសេដ្ឋកិច្ចរូបនេះ បាននិយាយថា «បើដឹងថាខ្លួនឈឺហើយមិនខំព្យាបាល នឹងជួបគ្រោះថ្នាក់រយៈពេលវែង ហើយ(អ្នក)ទាំងអស់គ្នាគ្មាននរណាគេចរួចទេ»។
របាយការណ៍ធនាគារអភិវឌ្ឍន៍អាស៊ីបានព្យាករកាលពីខែមេសាកន្លងមកថា សេដ្ឋកិច្ចកម្ពុជានឹងមានកំណើនប្រមាណ ៧ ភាគរយក្នុងឆ្នាំ ២០១៩នេះ និង ៦,៨ ភាគរយនៅឆ្នាំ២០២០។ ប៉ុន្ថែបញ្ហាប្រឈមក៏មានច្រើនផងដែរ ហើយបញ្ហាប្រឈមដែលសំខានជាងគេ ដែលរាជរដ្ឋាភិបានត្រូវយកចិត្តទុកដាក់គឺ ដោះស្រាយបញ្ហាគម្លាតជំនាញ ដែលកើតឡើងដោយភាពមិនស៊ីគ្នារវាងជំនាញដែលពឹងលើកម្លាំងពលកម្ម និងជំនាញដែលនិយោជកត្រូវការ។
ធនាគារអភិវឌ្ឍន៍អាស៊ីបានព្យាករថា ក្នុងឆ្នាំ២០១៩នេះ វិស័យឧស្សាហកម្ម, ទេសចរណ៍ និងវិស័យកសិកម្ម របស់កម្ពុជា នឹងថយចុះជាងឆ្នាំមុន។ «កំណើនទិន្នផលឧស្សាហកម្ម ទំនងថយចុះពីប្រមាណ ១០,៨ ភាគរយ ក្នុងឆ្នាំ២០១៨ មកនៅត្រឹម១០,១ ភាគរយ ក្នុងឆ្នាំ២០១៩។ កំណើននៃវិស័យសេវាកម្មនឹងមានការថមថយបន្តិចពី៦,៩ភាគរយមក៦,៨ភាគរយ ក្នុងឆ្នាំ២០១៩។ វិស័យកសិកម្មត្រូវបានព្យាករណ៍ថា មានកំណើនប្រមាណ១,៧ភាគរយ ពោលគឺថយចុះបន្តិចពី១,៨ភាគរយ កាលពីឆ្នាំមុន។ ឱនភាពសារពើពន្ធត្រូវបានគ្រោងទុកក្នុងកម្រិត ៤,៥ភាគរយ នៃផលិតផលក្នុងស្រុកសរុប នៅឆ្នាំ២០១៩ បៀបធៀបនឹង៥,១ភាគរយ ដែលបានគ្រោងទុក កាលពីឆ្នាំ២០១៨»។ នេះបើយោងតាមរបាយការណ៍ទស្សនវិស័យអភិវឌ្ឍន៍អាស៊ីរបស់ ADB៕
© រក្សាសិទ្ធិដោយ thmeythmey.com
