អន្តរជាតិ
នយោបាយអន្តរជាតិ
ត្អូញត្អែរដែលចូលស្រុកវិញមិនរួច ថាក់ស៊ីន នៅតែចិញ្ចឹមចិត្តបម្រើជាតិ និងជួយសេដ្ឋកិច្ចថៃឲ្យរីកចម្រើន
×![]()
អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ បានថ្លែងហួសចិត្តនឹងដំណើរការប្រជាធិបតេយ្យរបស់ថៃបច្ចុប្បន្ន ដែលធ្វើឲ្យលោក មិនអាចធានាបានពីការវិលត្រឡប់ចូលប្រទេសវិញ។ ទោះយ៉ាងណា ក៏ដោយលោកនបានប្រកាសថាខ្លួនត្រៀមលក្ខណៈជាស្រេចជួយស្រុកទេសជាពិសេសជួយបង្កើនកំណើនសេដ្ឋកិច្ចជាតិ និងបម្រើប្រជាជននិងប្រជាជាតិថៃឌ។
ដូចសព្វមួយដងរៀងរាល់ថ្ងៃកំណើត លោកអតីតនាយករដ្ឋមន្ត្រី ថាក់ស៊ីន ស៊ីណាវ៉ាត់ តែងតែមានការសន្ទនាវីដេអូមួយ ជាមួយនឹងអ្នកគាំទ្ររបស់លោក ដើម្បីបង្ហាញពីការនឹករលឹក និងការគាំទ្រឥតងាករេរបស់អ្នកគាំទ្រលោក ដែលតែងតែចង់បានលទ្ធិប្រជាធិបតេយ្យពិតប្រាកដត្រឡប់មករាជាណាចក្រថៃវិញ ។
តាមការចុះផ្សាយរបស់សារព័ត៌មានថៃ Bangkok Post នាឱកាសប្រារព្ធខួបកំណើត ៧០ ឆ្នាំពីទីក្រុងឌូប៉ៃ នៅថ្ងៃ២៩ កក្កដា លោក ថាក់ស៊ីន បានប្រាប់អ្នកគាំទ្ររបស់លោកថា ដោយសារភាពមិនច្បាស់លាស់នៃប្រជាធិបតេយ្យថៃ ទើបលោកត្រូវនិរទេសចេញពីប្រទេស។ លោក អះអាងទៀតថា ក្រុមប្រឆាំង តែងតែឆ្លៀតឱកាសបំផ្លាញលោក និងអ្នកគាំទ្ររបស់លោក រាប់បញ្ចូលទាំងតាមរយៈការបន្លំក្នុងការបោះឆ្នោត ក៏ប៉ុន្តែលោក តែងតែឈ្នះជានិច្ច។
នៅពេលដែលអ្នកគាំទ្រសាកសួរថាតើពេលណាលោកវិលត្រឡប់មករាជាណាចក្រថៃវិញ អតីតមេដឹកនាំដ៏មានប្រជាប្រិយភាពរបស់ថៃរូបនេះ បានថ្លែងថា លោក គ្មានយោបល់នោះទេ ហើយនោះ ក៏ព្រោះតែលោក យល់ឃើញថា ច្បាប់ និងយុត្តិធម៌របស់ថៃ បានបាត់បង់អស់ទៅហើយ។
តែទោះយ៉ាងណាក៏ដោយ លោក អះអាងថា លោកពិតជាចង់បម្រើជាតិ និងប្រជាជនថៃ និងបានត្រៀមខ្លួនរួចជាស្រេចក្នុងការផ្តល់យោបល់ និងជាដំណោះស្រាយសម្រាប់ជួយឲ្យមានកំណើនសេដ្ឋកិច្ចជាតិ។ មួយវិញទៀតលោក បន្ថែមថា លោក ក៏មិនចង់ឲ្យប្រធានសន្តិសុខ ក្លាយជាអគ្គនាយកដែរ។ លោកនាយករដ្ឋមន្ត្រី មិនលម្អិត និងពន្យល់បន្ថែមថា លោកសំដៅលើមេដឹកនាំរូបណា ដែលប្រែក្លាយពីអ្នកគ្រប់គ្រងសន្តិសុខទៅជាអគ្គនាយកនោះទេ។
គួររម្លឹកផងដែរថា លោក ថាក់ស៊ីន ស៊ីណាវ៉ាត់ គឺជាអតីតមេដឹកនាំថៃមួយរូប ដែលមានប្រជាប្រិយភាព ជាពិសេសមានការគាំទ្រខ្លាំងពីសំណាក់កសិករ។ លោក ត្រូវបានទម្លាក់ពីតំណែងតាមរដ្ឋប្រហារយោធាក្នុងឆ្នាំ២០០៦ ក្រោមហេតុផល និងបទចោទពីការប្រព្រឹត្តអំពើពុករលួយ និង ប្រើប្រាស់អំណាចខុសច្បាប់។ ក្នុងឆ្នាំ ២០០៨ លោកត្រូវតុលាការថៃកាត់ទោសពន្ធនាគារ៕
Tag:
ថៃ
អាស៊ាន
© រក្សាសិទ្ធិដោយ thmeythmey.com
