ជាតិ
នយោបាយជាតិ
កម្ពុជា នឹងបញ្ជូនលោក កៅ គឹមហួន ទៅកាន់តំណែងអគ្គលេខាធិការអាស៊ាន លោក កៅ គឹមហួន
× ឆ្នាំ២០២៣ គឺជាវេនកម្ពុជា ដែលត្រូវកាន់តំណែងអគ្គលេខាធិការអាស៊ាន។ សម្តេច ហ៊ុន សែន ប្រមុខរដ្ឋាភិបាលកម្ពុជា ប្រកាសថា លោក កៅ គឹមហួន រដ្ឋមន្ត្រីអមនាយករដ្ឋមន្ត្រី ជាបេក្ខជន សម្រាប់តំណែងនេះ។
ក្នុងពិធីពិនិត្យការដ្ឋានសាងសង់ពហុកីឡដ្ឋានជាតិមរតកតេជោ នាព្រឹកថ្ងៃទី២៩ ខែកក្កដា ឆ្នាំ២០១៩នេះ ប្រមុខរដ្ឋាភិបាលកម្ពុជា បញ្ជាក់ថា៖«ខ្ញុំ នឹងបញ្ជូនបេក្ខជនមួយនេះ [ទៅ]។ [ខ្ញុំ] ប្រាប់ទៅលោក ប្រាក់ សុខុន ឲ្យត្រៀម»។
សម្តេចនាយករដ្ឋមន្ត្រី ប្រកាសថា មុនដំបូង សម្តេច សម្លឹងឃើញបេក្ខជនដល់ទៅបីរូប។ ពីររូបទៀត គឺអ្នកស្រី សឿង រដ្ឋចាវី ដែលបច្ចុប្បន្ន ជាឯកអគ្គរាជទូតកម្ពុជាប្រចាំនៅអង់គ្លេស និងជាអតីតរដ្ឋលេខាធិការក្រសួងការបរទេស ហើយក៏ធ្លាប់ធ្វើជាអគ្គលេខាធិការរងអាស៊ានផងដែរ និង លោក សុក ស៊ីផាន់ណា ជាទីប្រឹក្សាក្រសួងការបរទេស និងជាអ្នកការទូតផ្នែកពាណិជ្ជកម្ម។
លោក កេត សោផាន់ អ្នកនាំពាក្យក្រសួងការបរទេស បញ្ជាក់បន្ថែមថា ក្នុងចំណោមឥស្សរជនទាំងបីរូបនោះ ប្រមុខរដ្ឋាភិបាលកម្ពុជា បានសម្រេចជ្រើសរើសយកលោក កៅ គឹមហួន។ លោក បន្តថា ចំពោះឥស្សរជនពីររូបទៀត ដែលប្រមុខរដ្ឋាភិបាលលើកឡើងក្នុងពិធីខាងលើ គឺជាការគិតគូររបស់ប្រមុខរដ្ឋាភិបាល មុននឹងសម្រេចចុងក្រោយថាត្រូវជ្រើសរើសយកអ្នកណា។ លោក ប្រាប់សារព័ត៌មានថ្មីៗតាមទូរសព្ទ បែបនេះថា៖«ឥឡូវ យើង សម្រេចហើយ ថានឹងបញ្ជូនឯកឧត្តម កៅ គឹមហួន ទៅ»។
អ្នកនាំពាក្យរូបនេះ ពុំបានលើកឡើងពីគុណសម្បត្តិរបស់លោក កៅ គឹមហួន ឡើយ។ ប៉ុន្តែ លោក លើកពីគោលការណ៍ខ្លះៗថា ដើម្បីអាចឈរឈ្មោះជាបេក្ខជនអគ្គលេខាធិការអាស៊ានបាន គឺទាមទារឲ្យមានចំណេះដឹងខ្ពស់និងមានបទពិសោធច្រើនក្នុងកិច្ចការអាស៊ាន ហើយមានឋានៈចាប់ពីអនុរដ្ឋមន្ត្រីឡើ់យទៅ។ លោក សង្កត់ធ្ងន់ដូច្នេះថា៖«ប្រមុខរដ្ឋាភិបាល ឈ្វេងយល់ច្បាស់ហើយ គឺបេក្ខជននោះ ត្រូវមានសមត្ថភាព»។
Dato Paduka Lim Jock Hoi អតីតមន្ត្រីជាន់ខ្ពស់ផ្នែកពាណិជ្ជកម្ម និងជាអតីតអ្នកការទូតរបស់ព្រុយណេ គឺជាអគ្គលេខាធិការអាស៊ាន នាពេលបច្ចុប្បន្ន។ អាណត្តិរបស់អគ្គលេខាធិការអាស៊ាន មានរយៈពេល៥ឆ្នាំ។ ការប្តូរអគ្គលេខាធិការអាស៊ាន គឺធ្វើទៅតាមអក្ខរក្រមនៃប្រទេសទាំង១០ក្នុងតំបន់អាស៊ាន គឺចាប់ A ទៅ Z ។ ទីស្នាក់ការអគ្គលេខាធិការអាស៊ាន គឺស្ថិតនៅទីក្រុងហ្សាកាតា ប្រទេសឥណ្ឌូណេស៊ី៕
Tag:
កេត សោផាន់
កៅ គឹមហួន
អាស៊ាន
© រក្សាសិទ្ធិដោយ thmeythmey.com