ជាតិ
«តុម» ឬ «ប៉ោង» របស់ប្រជានេសាទម្នាក់នៅតាមបណ្តោយដងទន្លេមេគង្គ ក្នុងខេត្តកណ្តាល។ រូបភាព៖ ឈុត ឈាណា
×![]()
«តុម» គឺជាឧបករណ៍នេសាទលក្ខណៈគ្រួសារមួយប្រភេទ ដែលប្រជាជនខ្មែរប្រើប្រាស់សម្រាប់នេសាទត្រីជាយូរណាស់មកហើយ។ យើងអាចឃើញវត្តមានរបស់វា នៅតាមបណ្តាខេត្តមួយចំនួន ដូចជា៖ ខេត្តកំពង់ធំ ខេត្តកំពង់ឆ្នាំង ខេត្តកំពង់ចាម ខេត្តកណ្តាល ខេត្តក្រចេះ និងខេត្តស្ទឹងត្រែង។ អ្នកនេសាទនៅតាមបណ្តាខេត្តមួយចំនួន បានហៅឧបករណ៍នេសាទនេះថា «ប៉ោង»។
«តុម» ឬ «ប៉ោង» មានកម្ពស់ចាប់ពីបាតក្រោមដល់មាត់លើ ៥០ ទៅ ១២០ សង់ទីម៉ែត្រ និងមានអង្កត់ផ្ចិត ៤០ ទៅ ៥៥ សង់ទីម៉ែត្រ។ វាត្រូវបានច្នៃបង្កើតឡើងពីបន្ទះឫស្សី។ មាត់ខាងលើ នៃ «តុម» ឬ «ប៉ោង» មានរាងដូចមាត់ដប មានអង្កត់ផ្ទិត ១២ សង់ទីម៉ែត្រ។ ចំណែកឯបាតក្រោម មានមាត់ ឬប្រើសមូលមួយ សម្រាប់ឲ្យត្រីចូល ដែលមានអង្កត់ផ្ទិត ៤.៥ សង់ទីម៉ែត្រ។ ផ្ទុយពីឧបករណ៍នេសាទដែលបង្កើតឡើងពីឫស្សីផ្សេងៗ ទៀត «តុម» ឬ «ប៉ោង» ត្រូវបានគេដាក់វាបញ្ឈរ ដោយចងព្យូរនឹងមែឈើ ឬបង្គោលឈើ។
«តុម» ឬ «ប៉ោង» របស់ប្រជានេសាទនៅស្រុកត្បូងឃ្មុំ ខេត្តត្បូងឃ្មុំ ក្បែរស្ពាន គីហ្ស៊ូណា។ រូបភាព៖ ឈុត ឈាណា
«តុម» ឬ «ប៉ោង» ភាគច្រើន ត្រូវបានប្រជានេសាទប្រើប្រាស់នាពេលថ្ងៃ នៅកន្លែងដែលមានទឹកនឹង និងថ្លា ក្បែរមាត់ច្រាំង នៅក្នុងបឹងទន្លេសាប ទន្លេសាប តំបន់វាលទំនាបលិចទឹកនៃទន្លេមេគង្គ ទន្លេបាសាក់ និងទន្លេសមេគង្គលើ និងតាមដៃទន្លេរបស់វាផងដែរ។ ប្រជានេសាទចងព្យូរ «តុម» ឬ «ប៉ោង» ជាប់នឹងមែកឈើ បង្គោលឈើ ដោយពន្លិចទៅក្នុងទឹក ទុកតែផ្នែកមាត់ខាងលើត្រឹមករបស់វា នៅលើផ្ទៃទឹក។ នៅក្នុង «តុម» ឬ «ប៉ោង» គេដាក់នុយដូចជា៖ គ្រាប់ល្ងលីង កន្ទក់ បំណែកសម្បុកកណ្តៀរ ឬប្រហុក ដើម្បីទាក់ទាញត្រីឲ្យចូល។
ប្រជានេសាទប្រើ «តុម» ឬ «ប៉ោង» នេះ ទៅតាមកាលវេលា និងទីកន្លែងផ្សេងៗ ដូចជា៖ នៅក្នុងបឹងទន្លេសាប និងទន្លេសាប គេប្រើប្រាស់វាចាប់ពីខែមិថុនា ដល់ខែធ្នូ។ នៅតាមតំបន់វាលទំនាបនៃទន្លេមេគង្គ និងទន្លេបាសាក់ គេប្រើប្រាស់វា ចាប់ពីខែមិថុនា ដល់ខែតុលា។ នៅតាមដៃទន្លេនៃទន្លេមេគង្គលើ គេប្រើប្រាស់វា ចាប់ពីខែ កក្កដា ដល់ខែកញ្ញា។
ឧបករណ៍នេសាទ «តុម» ឬ «ប៉ោង» នេះ ភាគច្រើន អាចចាប់បានពពួកត្រីតូចៗ ដូចជា៖ ត្រីចង្វា ត្រីចង្វាឆឺត ត្រីចង្វាតូច ត្រីចង្វាស ត្រីចង្វាមូល ត្រីចង្វាផ្កាឈូក ត្រីចង្វាភ្លៀងស្រែ ត្រីចង្វាភ្លៀងឆ្នូត ត្រីចង្វាភ្នំ ត្រីចង្វាភ្លៀងភ្នំ ត្រីចង្វាភ្លៀងភ្នំឆ្នូត ត្រីចង្វាអង្កត់ ត្រីចង្វាអង្កត់ធំ ត្រីចង្វាស្រលូង ត្រីចង្វាស្រលូងឆ្នូត ត្រីចង្វាពោត ត្រីចង្វាពោតតូច ត្រីចង្វាល្អិត ត្រីចង្វាក្រហម ត្រីចង្វាឆ្នូតពីរ (Rasbora spp.); ត្រីស្លឹកឬស្សី (Oxygaster pointoni) ត្រីស្លឹកឬស្សីធំ ត្រីស្លឹកឬស្សីតូច (Paralaubuca spp.); ត្រីរៀលតុប ត្រីរៀលអង្កាម ត្រីរៀលអំពិល (Gymnostomus spp.); ត្រីចន្ទាសភ្លុក ត្រីចន្ទាសភ្លុកព្រុយ ត្រីចន្ទាសភ្លុប្រាក់ ត្រីចន្ទាសភ្លុកពោត ត្រីចន្ទាសភ្លុក ត្រីចន្ទាសភ្លុកស (Parachela spp.) និងត្រីកំភ្លាញភ្លុក ត្រីកំភ្លាញស្រែ (Trichopodus spp.)។
ដោយសារការប្រែប្រួលអាកាសធាតុ ការនេសាទហួសកម្រិតពីអតីតកាល និងបច្ចុប្បន្ន ការប្រើប្រាស់ឧបករណ៍នេសាទខុសច្បាប់ផ្សេងៗ ពិសេសឧបករណ៍នេសាទដែលមានភ្ជាប់ចរន្តអគ្គិសនី បានបង្កបញ្ហារប្រឈមដ៏ខ្លាំងបំផុត ចំពោះមច្ឆជាតិទូទៅ។ បន្ថែមពីលើនេះ ការសាងសង់ទំនប់វារិអគ្គីសនី ក៏អាចជាបញ្ហាប្រឈម ដល់ផ្លូវធ្វើចរាចរផ្លាស់ទីរបស់ពួកវា ដើម្បីពង-កូនផងដែរ។ សូមជួយថែរក្សាការពារធនធានមច្ឆជាតិ ដើម្បីទុកឲ្យកូនចៅជំនាន់ក្រោយរបស់យើងទាំងអស់គ្នា!
© រក្សាសិទ្ធិដោយ thmeythmey.com
