ជាតិ
សង្គមជាតិ
នាយករដ្ឋមន្ត្រី៖ មិនត្រូវឲ្យនាំសំរាមចូលកម្ពុជាដាច់ខាត
× សម្តេចនាយករដ្ឋមន្ត្រី សម្តេច ហ៊ុន សែន បានបង្ហាញពីម៉ឺងម៉ាត់ មិនឲ្យមានការលួចនាំសំរាមពីបរទេស ចូលមកកម្ពុជា។ សម្តេចនាយករដ្ឋមន្ត្រី បានប្រើភាសាបែបដាច់ណាត់នេះ នៅក្នុងកិច្ចប្រជុំគណៈរដ្ឋមន្ត្រី នាព្រឹកថ្ងៃទី២ ខែសហា ឆ្នាំ២០១៩។
សេចក្តីប្រកាសព័ត៌មានស្តីពីលទ្ធផលនៃកិច្ចប្រជុំគណៈរដ្ឋមន្ត្រី បានសរសេរពីសម្តីរបស់ប្រមុខរដ្ឋាភិបាល យ៉ាងដូច្នេះថា៖«កម្ពុជា មិនអនុញ្ញាតដាច់ខាតឲ្យមានការនាំចូលសំរាមពីបរទេស ដើម្បីកែច្នៃឬផលិតជាថាមពលអគ្គិសនីនោះទេ»។
ប៉ុន្តែ ប្រមុខរដ្ឋាភិបាល បានលើកទឹកចិត្តឲ្យមានការកែច្នៃសំរាមក្នុងស្រុកវិញ ដើម្បីផលិតជាថាមពលអគ្គិសនីបន្ថែម ដែលអាចការពារបរិស្ថាន និងដោះស្រាយបញ្ហាសំរាម ក៏ដូចជាដោះស្រាយកន្លែងចាក់សំរាម ជាពិសេសនៅរាជធានីភ្នំពេញ និង ខេត្តព្រះសីហនុ។
បញ្ជារបស់មេដឹនាំ ឲ្យទប់ស្កាត់ការនាំចូលសំរាម គឺធ្វើឡើងបន្ទាប់ពីអាជ្ញាធរ រកឃើញសំរាមប្លាស្ទិក៨៣កុងតឺន័រ ដែលមានទម្ងន់ជិត១៦០០តោន នៅកំពង់ផៃស្វយ័តក្រុងព្រះសីហនុ កាលពីថ្ងៃទី១៧ ខែកក្ដដា ដោយក្រសួងបរិស្ថាន អះអាងថា មានប្រភពមកពីកាណាដានិងអាមេរិក។
ក្រុមហ៊ុនមួយឈ្មោះ Chungyuen ជាអ្នកនាំសំរាមទាំងនោះ ចូលមកកម្ពុជា។ រដ្ឋាភិបាលកម្ពុជា បានដាក់កំហិតឲ្យក្រុមហ៊ុន Chungyuen នាំសំរាមទាំងនោះ ចេញពីកម្ពុជា យ៉ាងយូរ ត្រឹមថ្ងៃទី២៤ ខែសីហា៕
© រក្សាសិទ្ធិដោយ thmeythmey.com