ជាតិ
ក្រសួងធនធានទឹក៖ខេត្តព្រះសីហនុ កោះកុង និងកំណាត់ផ្លូវជាតិលេខ៤ ប្រឈមនឹងជំនន់ទឹកភ្លៀង រូបភាពពីហ្វេសប៊ុកក្រសួងធនធានទឹក និងឧតុនិយម
× ភ្នំពេញ៖ កម្ពុជា កំពុងរងនូវឥទ្ធិពលសម្ពាធទាបនៃព្យុះចំនួន៣ ដែលបង្កឲ្យមានភ្លៀងធ្លាក់ ពិសេសខេត្តជាប់សមុទ្រមានភ្លៀងធ្លាក់ខ្លាំង។ បើតាមសេចក្ដីជូនដំណឹងថ្មី របស់ក្រសួងធនធានទឹក និងឧតុនិយម នៅថ្ងៃទី៤ ខែសីហានេះ ខេត្តកោះកុង ព្រះសីហនុ និងផ្លូវជាតិលេខ៤ ប្រឈមនឹងជំនន់ទឹកភ្លៀង ចាប់ពីថ្ងៃទី៤ ដល់ថ្ងៃទី១០ ខែសីហា។
សេចក្ដីជូនដំណឹងដដែល បានបញ្ជាក់ថា ខេត្តកំពង់ស្ពឺ កំពង់ឆ្នាំង តាកែវ កណ្ដាល មណ្ឌលគិរី និងរាជធានីភ្នំពេញ មានភ្លៀងធ្លាក់ក្នុងកម្រិតខ្សោយ ទៅមធ្យម។ រីឯខេត្តព្រៃវែង ស្វាយរៀង កំពង់ចាម ត្បូងឃ្មុំ កំពង់ធំ ក្រចេះ ស្ទឹងត្រែង រតនគិរី និងព្រះវិហារ ភ្លៀងធ្លាក់ក្នុងកម្រិតមធ្យម ទៅបង្គួរ។ ដោយឡែក ចាប់ពីថ្ងៃទី ៨ និងទី៩ ខែសីហា បណ្ដាខេត្ត ប៉ៃលិន បាត់ដំបង សៀមរាប បន្ទាយមានជ័យ និងឧត្តរមានជ័យ នឹងមានភ្លៀងក្នុងកម្រិតតិចទៅមធ្យម។ ប៉ុន្តែចាប់ពីថ្ងៃទី៩-១០ ខែសីហា នឹងមានភ្លៀងកម្រិតធ្យមទៅបង្គួរ។
ឥទ្ធិពលសម្ពាធទាប (ITCZ ) លាតសន្ធឹងក្នុងទឹកដីថៃ ឡាវ និងវៀតណាម ភ្ជាប់នឹងព្យុះទី៧ ដែលបានរលាយខ្លួននៅថ្ងៃទី៤ ខែសីហានេះ។ ព្យុះទី៨ ឈ្មោះ ហ្វ្រង់ស៊ីសកូ ដែលស្ថិតឆ្ងាយក្នុងមហាសមុទ្រនៅឡើយ។ ព្យុះនេះ មិនមានឥទ្ធិពលមកលើកម្ពុជានោះទេ ដោយនឹងមានឥទ្ធិពលលើឧបទ្វីបកូរ៉េ។ ប៉ុន្តែ នៅភាគខាងកើតហ្វីលីពីន នឹងកើតព្យុះមួយទៀតទី៩ ឈ្មោះ ឡេគីម៉ា នឹងមានឥទ្ធិពលមកលើកម្ពុជា។
ជាមួយគ្នានេះក្រសួងធនធានទឹក អំពាវនាវ ឲ្យសាធារណជនបង្កើនការប្រុងប្រយ័ត្នចំពោះ ឥទ្ធិពលនៃល្បឿនខ្យល់ខ្លាំងក្នុងកម្រិតពី១៥-២០ ម៉ែត្រក្នុងមួយវិនាទី និងរលកសមុទ្រធំ មានកម្ពស់ពី១-២ម៉ែត្រ៕
រូបភាពពីហ្វេសប៊ុកក្រសួងធនធានទឹក និងឧតុនិយម
Tag:
អាកាសធាតុ
ភ្លៀង
ព្យុះ
ទឹកជំនន់
© រក្សាសិទ្ធិដោយ thmeythmey.com