វិភាគ​៖ ការទិញ​ដីឡូត៍​ជា​ឱកាស តែ​អាចមាន​ហានិភ័យ​
អចលនទ្រព្យ
អត្ថបទពាណិជ្ជកម្ម
វិភាគ​៖ ការទិញ​ដីឡូត៍​ជា​ឱកាស តែ​អាចមាន​ហានិភ័យ​
05, Aug 2019 , 9:29 am        
រូបភាព
ដោយ: ថ្មីៗ
​ការ​ពុះ​ដីឡូត៍​លក់ បានចាប់ផ្តើម​មាន​សក​ម្ម​ភាព​តាំងពី​អំឡុង​ឆ្នាំ ២០១២​មកម្ល៉េះ ហើយ​វា​បាន​រីកដុះដាល​ប​និ្ត​ច​ម្តងៗ រហូតមក​ចាប់ផ្តើម​កក្រើក​ខ្លាំង ក្នុង​ឆ្នាំ ២០១៦ មកដល់ពេលនេះ​តែម្តង​។ ដំបូង​ឡើយ សកម្មភាព​ពុះ​ដីឡូត៍​លក់​នេះ មានតែ​នៅ​ទីក្រុង​ភ្នំពេញ និង​ជាយៗ​ក្រុងភ្នំពេញ នៃ​ទឹកដី​ខេត្តកណ្តាល និង​កំពង់ស្ពឺ​ប៉ុណ្ណោះ ប៉ុន្តែ​ក្រោយមក បាន​រីក​រាលដាល​ទៅដល់​សៀមរាប ក្រុងព្រះសីហនុ បន្ទាប់មក​ធ្លាយ​ដល់​កំពត កំពង់ចាម ត្បូងឃ្មុំ តាខ្មៅ (​ខេត្តកណ្តាល​) បាវិត​(​ស្វាយរៀង​)​។ ហើយ​បច្ចុប្បន្ន បាន​រីកសាយ​គ្រប់​ខេត្ត​-​ក្រុង​ទៅហើយ ។​
 
​មូលហេតុ​ចម្បង ដែល​នាំទៅដល់​ការ​ពុះ​ដីឡូត៍​លក់​នេះ ដោយសារតែ​ម្ចាស់​ដី​មាន​ដី​ធំៗ ពិបាក​ក្នុង​ការរក​អតិថិជន​មក​ទិញ​ដី​នោះ​ទាំងអស់ ទើប​ពួកគាត់​សម្រេចចិត្ត​ពុះ​ជា​ឡូត៍​តូចៗ ដើម្បី​លក់​ជូន​សាធារណជន​វិញ​។​
 
​ដីឡូត៍​ក្នុង​មួយ​ឡូត៍ មានតម្លៃ​ចាប់ពី ១,៥០០ ដុល្លារ រហូតដល់​តម្លៃ ២០,០០០ ដុល្លារ (​គិត​ជា​មធ្យម​) អាស្រ័យ​តាម​ទីតាំង​ជិត ឬ​ឆ្ងាយ ទីតាំង​ល្អ ឬ​មិនល្អ ទីប្រជុំជន ឬ​ដាច់ស្រយាល តំបន់​អភិវឌ្ឍន៍ ឬ​មិនសូវមាន​ការអភិវឌ្ឍ​ន៍​ជាដើម​។​
 
​ការវិនិយោគ ឬ​ការទិញ​ដីឡូត៍ វា​ជា​ឱកាស​សម្រាប់​អ្នក​ខ្សត់ខ្សោយ ឬ​អ្នកមាន​ជីវភាព​ក្រោម​មធ្យម ដែល​គាត់​មាន​លុយ​បន្តិចបន្តួច អាច​ទិញ​ដីឡូត៍​យកមក​សង់​លំនៅឋាន​រស់នៅ ឬ​ទុក​លក់​យកប្រាក់​ចំណេញ​។ ប៉ុន្តែ ក៏​អាច​ក្លាយទៅជា​ហានិភ័យ​ដែរ ប្រសិនបើ​អ្នកទិញ មិនបាន​សិក្សា ឲ្យ​បានច្បាស់លាស់ និង​ស៊ីជម្រៅ ទៅលើ​គម្រោង ឬ​ដីឡូត៍​ដែល​ចង់​ទិញ ឬ​នឹង​ទិញ​នោះ​។ មានន័យថា ការទិញ​ដីឡូត៍ វា​អាចជា​ឱកាស​ផង ជា​ហានិភ័យ​ផង អាស្រ័យ​លើ​អ្នកទិញ ចេះ​ពិនិត្យ និង​វាយតម្លៃ ឲ្យ​បាន​ត្រឹមត្រូវ មុននឹង​ទិញ​ដីឡូត៍​ពី​គម្រោង​ណាមួយ​។​
 
​ជា​ប្រការ​ល្អ​បំផុត​សម្រាប់​អ្នកទិញ​ដីឡូត៍ មុននឹង​ទិញ​ត្រូវ​ស្វែងរក​អ្នកជំនាញ​ឲ្យ​ជួយផ្តល់​ប្រឹក្សា​យោបល់ ប្រសិនបើ​ពួកគេ​មិនចេះ​ស្រាវជ្រាវ​ដោយ​ខ្លួនឯង ឬ​មិនដឹងថា ត្រូវធ្វើ​យ៉ាងម៉េច ដើម្បី​ទិញ​បាន​ដីឡូត៍​ល្អ​។​
 
​ដើម្បី​ទិញ​ដីឡូត៍​ឲ្យ​បាន​ត្រឹមត្រូវ និង​ជៀសវាង​ការចាញ់បោក​គេ ឬ​ហានិភ័យ​ផ្សេងៗ ដែល​អាច​នឹង​កើតឡើង​ជាយថាហេតុ អ្នកទិញ​ត្រូវ​ចេះ​សាកសួរ​ព័ត៌មាន​ពី​ម្ចាស់​គម្រោង និង​ស្រាវជ្រាវ​ឲ្យ​បានច្បាស់លាស់​ពី​ប្រភព​ផ្សេងៗ នូវ​ព័ត៌មាន និង​មូលដ្ឋាន​ដូចខាងក្រោម​៖
 
១) ប្លង់ដី ឬ​ប័ណ្ណកម្មសិទ្ធិ​ដីធ្លី​
 
​តើ​ដី​ទាំងមូល​ដែល​គេ​យកមក​ពុះ​ជា​ឡូត៍​លក់​នោះ ជា​ដី​ប្លង់រឹង ឬ​ប្លង់​ទន់​? ហើយ​ប្រសិនជា​ប្លង់រឹង​វិញ  ពេល​គេ​លក់​ឲ្យ​យើង​(​អ្នកទិញ​)​គេ​បំបែក​ក្បាលដី ជា​ប្លង់រឹង​ឲ្យ ឬ​អត់​? ឬ​គេ​កាត់ឈ្មោះ​ត្រឹម​ស្រុក​-​ខណ្ឌ ឬ​ឃុំ​-​សង្កាត់​? ។​
 
«​អ្នក​ត្រូវ​សិក្សា និង​សួរ​ឲ្យ​បាន​ច្បាស់ ពី​បញ្ហា​ប្លង់ដី​។ ដើម្បី​ប្រសិទ្ធភាព​ខ្ពស់ អ្នក​គួរ​ទិញ​តែ​ដីឡូត៍​ណា​ដែលមាន​ប្លង់រឹង ហើយ​កាត់ឈ្មោះ​ជូន​អតិថិជន​ជា​ប្លង់រឹង​ដែរ​។ ជារួម អ្នកទិញ​មិនគួរ​ទិញ​ដីឡូត៍​ពី​គម្រោង​ណាមួយ ដែលមាន​ត្រឹមតែ​ប្លង់​ទន់​នោះទេ ពីព្រោះ​វា​អាច​នឹងមាន​ហានិភ័យ​ច្រើនណាស់ ប្រសិនបើ​លោកអ្នក មិន​ស្គាល់​ច្បាស់​ពី​ម្ចាស់​គម្រោង ឬ​គម្រោង​នោះ​ច្បាស់លាស់​»​។​
 
២) តើ​ដី​ដែល​គេ​យកមក​ពុះ​ដីឡូត៍​លក់​នោះ ជា​ដី​ផ្ទាល់​របស់​ម្ចាស់​គម្រោង ឬ​ទិញ​ពី​គេ​? ហើយ​បើ​ទិញ​ពី​គេ តើ​បង់លុយ​ថ្លៃ​ទិញ​ដី​នោះ​ផ្តាច់ ហើយ​ឬ​នៅ​? ឬ​នៅ​បង់​ជា​ដំណាក់កាល​ទៀត​? 
 
“​ប្រសិនបើ​អ្នកទិញ​រកឃើញថា គម្រោង​ទាំងមូល​នោះ​ជា​ដី​ទិញ​ពី​គេ ហើយ​មិនទាន់​បង់លុយ​ដាច់​ឲ្យ​ម្ចាស់​ដើម អ្នក​ត្រូវតែ​ប្រុងប្រយ័ត្ន​ខ្ពស់ ហើយ​មិនគួរ​ទិញ​ជាដាច់ខាត ព្រោះ​អាច​នឹងមាន​បញ្ហា​នៅពេលដែល​គម្រោង​ដីឡូត៍​នេះ លក់​មិន​ដាច់​សោះ ឬ​លក់​មិនបាន​គ្រប់​ចំនួន​លុយ ដែល​ត្រូវ​យកទៅ​ទូទាត់​ជូន​ម្ចាស់​ដី​ដើម ឬ​ម្ចាស់​ដី​ដើម​រករឿង ដោយសារតែ​ការទូទាត់​លុយ​ថ្លៃ​ទិញ​ដី​នោះ​យឺតយ៉ាវ ឬ​មិន​ទៀងទាត់​។ ដែល​ការណ៍​នេះ នាំ​ឲ្យ​ម្ចាស់​ដី​ដើម​នោះ មិន​សប្បាយចិត្ត បង្អាក់​ការអភិវឌ្ឍន៍ ឬ​បញ្ចប់​កិច្ចសន្យា​ជាមួយ​ម្ចាស់​គម្រោង ដែល​ធ្វើ​ឲ្យ​ប៉ះពាល់​ដល់​យើង ដែលជា​អ្នកទិញ​ដីឡូត៍​នោះ​។ 
 
៣) មានច្បាប់​អនុញ្ញាត​ត្រឹមត្រូវ ហើយ​ឬ​នៅ​? 
 
​មុនពេល​ទិញ​ដីឡូត៍​ពី​គម្រោង​ណាមួយ ត្រូវ​សាកសួរ​ពី​ច្បាប់ទម្លាប់ ដែល​ម្ចាស់​គម្រោង​ត្រូវតែមាន និង​ត្រូវតែ​បង្ហាញ​ពី​ភាពស្របច្បាប់​នៃ​គម្រោង​របស់ខ្លួន ដល់​អតិថិជន ដែល​នឹង​ទិញ ដីឡូត៍​ពី​គម្រោង​របស់ខ្លួន​។ ជាគោលការណ៍ ម្ចាស់​គម្រោង​ត្រូវ​ដាក់តាំង​រាល់​លិខិតអនុញ្ញាត ឲ្យ​ធ្វើ​អាជីវកម្ម​ពុះ​ដីឡូត៍ ពី​ស្ថាប័ន​មាន​សមត្ថកិច្ច នៅ​ការិយាល័យ​លក់ ឬ​រៀបចំ​ទុក​ក្នុង Dosé ឲ្យ​បាន​ត្រឹមត្រូវ ដើម្បី​ទុក​បង្ហាញ​អតិថិជន ករណី​មានការ​ស្នើសុំ​មើល​។ បច្ចុប្បន្ន ការ​ពុះ​ដីឡូត៍ លក់​ត្រូវ​ស្នើសុំ​ច្បាប់​នៅ​ថ្នាក់ស្រុក ឬ​ខណ្ឌ ដែល​គម្រោង​នោះ ស្ថិតនៅ គម្រោង​ដីឡូត៍​ទាំងមូល ត្រូវតែ​មានការ​គូរ​ប្លង់​ដោយ​មន្ត្រី​ជំនាញ នៅ​ភូមិបាល ស្រុក​ខណ្ឌ មិនអាច​ចេះតែ​គូរ ដោយ​ខ្លួនឯង ឬ​ជួល​អ្នកផ្សេង ក្រៅពី​មន្ត្រី​មក​សុរិយោដី​ឡើយ​។​
 
​តាម​ការណែនាំ​របស់​ក្រសួង​សេដ្ឋកិច្ច និង ហិរញ្ញវត្ថុ បាន​ណែនាំ​ឲ្យ​អ្នកទិញ ត្រូវ​សាកសួរ ឬ​សុំ​មើល ឯកសារ ដូចខាងក្រោម​៖
 
•​ ​ឈ្មោះ​របស់​ម្ចាស់​គម្រោង​នៅលើ​ប័ណ្ណកម្មសិទ្ធិ នៃ​ដី​ដែល​យកមក​ពុះ​ឡូត៍​នោះ (​តើ​ជា​ឈ្មោះ របស់​ម្ចាស់​គម្រោង ឬ​របស់​អ្នកផ្សេង​)​។​
•​ ​ប្រសិនជា​អាច ត្រូវ​ចេះ​ត្រួត​ពិនិត្យមើល​ប័ណ្ណកម្មសិទ្ធិ​នោះ ថា​មាន​ជាប់​បន្ទុក ឬ​អត់​?
•​ ​លិខិតអនុញ្ញាត​ឲ្យ​អភិវឌ្ឍន៍​ដី​នោះ ចេញ​ដោយ​អាជ្ញា​ធរមាន​សមត្ថកិច្ច (​ដូចជា​៖ ថ្នាក់ស្រុក​ជាដើម​)​។​
•​ ​ឯកសារ​បង់ពន្ធ​អចលនវត្ថុ ។​
•​ ​ប័ណ្ណ​បំបែក​ក្បាលដី ។​
•​ ​ខ្លឹមសារ​លំអិត នៃ​កិច្ចសន្យាលក់​-​ទិញ ដីឡូត៍ ។​
 
៤) តើ​អ្នកទិញ​ដីឡូត៍​នោះ​ពី​ម្ចាស់​គម្រោង​ផ្ទាល់​? ឬ​ពី​ភ្នាក់ងា​លក់ ឬ​អ្នក​គួ​ក​ជេ​? 
 
​មានរឿង​រ៉ាវ​ច្រើន ពាក់ព័ន្ធ​នឹង​ការទិញ​ដីឡូត៍​ពី​ភ្នាក់ងារ​លក់ ឬ​អ្នក​គួ​ក​ជេ និង​អ្នកធ្វើ​ទីផ្សារ ដោយសារតែ​ពួកគាត់​មួយចំនួន​នោះ មិនសូវមាន​ការទទួល​ខុសត្រូវ និង​ភាគច្រើន​ចូលចិត្ត​បង្ហាញ​ព័ត៌មាន​បំប៉ោង​ច្រើន ហើយ​ខ្វះ​ការទទួលខុសត្រូវ ខ្វះ​វិជ្ជាជីវៈ ប្រឹង​លក់​ឲ្យ​តែ​ដាច់  មិនសូវ​គិត​គុ​រ​ពី​ការលំបាក​របស់​អ្នកទិញ​ដីឡូត៍​នោះ​។ ពេល​មាន​បញ្ហា​កើតឡើង ភាគច្រើន​ពួកគាត់​មិនសូវ​ជា​ចេញមុខ​ទទួលខុសត្រូវ​ឡើយ ហើយ​ច្រើនតែ​និយាយ ឬ​យក​លេស​ថា គាត់​និយាយ ឬ​ផ្សព្វផ្សាយ​លក់ តាម​ការណែនាំ​របស់​ម្ចាស់​គម្រោង​តែប៉ុណ្ណោះ​។​
 
៥)  ហេដ្ឋារចនាសម្ព័ន្ធ​
 
​តើ​គម្រោង​ទាំងមូល ស្ថិតនៅលើ​ផ្លូវរដ្ឋ ឬ​ផ្លូវ​ឯកជន ដែល​ម្ចាស់​គម្រោង​ធ្វើ​ដោយ​ខ្លួនឯង​? ផ្លូវ​ប៉ុន្មាន​ម៉ែត្រ​? មាន​ប្រព័ន្ធ​លូ ទឹក ភ្លើង ដាំ​បង្គោល​ឡូត៍ ធ្វើ​ផ្លូវ​(​ក្រាល​ថ្ម​មិច ឬ​ចាក់​បេតុង​?) នៅក្នុង​គម្រោង​មាន​រៀបចំ​អ្វីខ្លះ​បន្ថែមទៀត ដូចជា​សួន​សាធារណៈ ស្រះ​ទឹក ផ្សារ កន្លែង​ហាត់ប្រាណ កន្លែង​លម្ហែកាយ ។​ល​។​
 
៦) ព័ត៌មាន​បំប៉ោង ឬ​ព័ត៌មាន​ខ្យល់​
 
​ជាទូទៅ ម្ចាស់​គម្រោង ភ្នាក់ងារ​លក់ ឬ​អ្នក​គួ​ក​ជេ​នីមួយៗ តែងតែ​ព្យាយាម​បំប៉ោង​ព័ត៌មាន (​ប្រើប្រាស់​ព័ត៌មាន​មិន​ពិត​) ដើម្បី​លើកកម្ពស់ និង​ផ្តល់​តម្លៃ​ឲ្យ​គម្រោង​ដីឡូត៍​របស់គេ​លក់​ឆាប់​ដាច់ ។ ឧទាហរណ៍​៖ គេ​ផ្សព្វផ្សាយ​ថា​គម្រោង​របស់គេ នឹងមាន​ធ្វើ​ផ្សារ តារាង​បាល់ទាត់ សួន​លម្ហែកាយ អាង​ហែល​ទឹក​។​ល​។ តែ​ធាតុពិត ពួកគេ​មិន​ធ្វើ​វា​ទេ គ្រាន់តែ​ផ្សព្វផ្សាយ​ដើម្បី​ទាក់ទាញ និង​លក់​គម្រោង​របស់គេ​ឲ្យ​ឆាប់​ដាច់​ប៉ុណ្ណោះ (​ទោះយ៉ាងណា ក៏មាន​គម្រោង​ខ្លះ​គេ​ធ្វើ​ពិត តាម​ការផ្សព្វផ្សាយ​ដែរ​)​។​

៧) ព័ត៌មាន​មូលដ្ឋាន​
 
​មុននឹង​ទិញ​ដីឡូត៍​ណាមួយ វា​ចាំបាច់​ណាស់ ដែល​អ្នក​មិនត្រូវ​មើលរំលង​មេភូមិ ប្រជាពលរដ្ឋ​នៅក្បែរ​គម្រោង និង​មេឃុំ ឬ​ចៅសង្កាត់ ដើម្បី​សាកសួរ​ព័ត៌មាន​ផ្សេងៗ​ពី​ពួកគាត់ លើ​គម្រោង​នោះ និង​សាកសួរ​ពី​ប្រវត្តិ​ម្ចាស់​គម្រោង​ឲ្យ​បានច្បាស់លាស់​។ ពួកគាត់​ជាម​នុស្ស​សំខាន់​ទី​១ ដែល​ផ្តល់ព័ត៌មាន​សុក្រឹត​ដល់​អ្នកទិញ ជាង​ម្ចាស់​គម្រោង ឬ​អ្នកលក់​ដីឡូត៍​ទៅទៀត ។ ម្ចាស់​គម្រោង ឬ​អ្នកលក់​ដីឡូត៍​ខ្លះ មិន​ផ្តល់ព័ត៌មាន​ពិត ឲ្យ​អ្នកទិញ​ទេ ដែលជា​កត្តា​ធ្វើ​ឲ្យ​អ្នកទិញ​ពិបាក​កំណត់ និង​វាយតម្លៃ ក្នុងការ​សម្រេច ចិត្ត​ទិញ​ដីឡូត៍​នោះ​។​
 
៨) តម្លៃថោក ឬ​ថ្លៃ​
 
​ជាការ​ពិតណាស់ ដីឡូត៍​មាន​តម្លៃថោក​សមរម្យ តាម​ទីតាំង និង​ភូមិសាស្ត្រ​របស់​គម្រោង ប៉ុន្តែ​ក៏មាន​គម្រោង​ខ្លះ លក់​ថ្លៃ​កប់​ពពក ខណៈ​ទីតាំង​ភូមិសាស្ត្រ ឬ​ស្ថានភាព​ជុំវិញ មិនសូវ​ល្អ​ឡើយ​។ ហេតុដូច្នេះ មុន​ស​ម្រេ​ចិត្ត​ទិញ​ដីឡូត៍​ណាមួយ ត្រូវ​ប្រៀបធៀប​តម្លៃ ជាមួយ​គម្រោង​ផ្សេងៗ​ជាមុនសិន ជៀសវាង​ទិញ​ចំ​ដីឡូត៍​មិនត្រូវ​ប៉ាន់ ហើយ​តម្លៃ​ថ្លៃ​ខ្លាំង​។ តម្លៃ​ទីផ្សារ​ជា​មូលដ្ឋាន ដែល​អ្នកទិញ​អាច​ផ្គូរ​ផ្គង​បាន គឺ​បើ​ដី​ឆៅ​ក្នុង​តំបន់​នោះ តម្លៃ ១​ម៉ែត្រ​ការេ ១០​ដុល្លារ ពេលដែល​គេ​ពុះ​ដីឡូត៍​លក់ តម្លៃ​ប្រហាក់ប្រហែល​ដែល​គួរ​ទទួលយកបាន​គឺ ១ ឡូត៍ តម្លៃ​ចន្លោះ​ពី ៤,០០០ ទៅ ៦,០០០ ដុល្លារ​ប៉ុណ្ណោះ​។ បើ​លក់​ថ្លៃ​ជាង​នេះ មាន ន័យ​ថា គម្រោង​នោះ លក់​ថ្លៃ​ជាងគេ​ហើយ ។​

៩) ការបង់ថ្លៃ​ដីឡូត៍​
 
​តើ​អ្នកទិញ​បង់​ផ្តាច់ ឬ​បង់​រំលស់​? ហើយ​បើ​អ្នក​បង់​រំលស់ តើ​គេ​គិតការ​ប្រាក់​ឬ​អត់​? ប្រការនេះ​ក៏​សំខាន់​ណាស់ ពិសេស​សម្រាប់​អ្នកវិនិយោគ (​ទិញ​ទុក​លក់​យកចំណេញ​)​។ មាន​គម្រោង​ច្រើន​គួរសម​ដែរ ដែល​អនុញ្ញាត​ឲ្យ​អ្នកទិញ​បង់​រំលស់​ជាមួយ​ធនាគារ ឬ​ម្ចាស់​គម្រោង​ផ្ទាល់ ជាមួយនឹង​អត្រា​ការប្រាក់ ១% ក្នុង​មួយខែ ឬ ១២% ក្នុង​មួយឆ្នាំ​។ ប៉ុន្តែ​ក៏មាន​គម្រោង​មួយចំនួន មានការ​បង់​រំលស់​ដោយ​មិន​គិតការ​ប្រាក់ ក្នុង​រយៈពេល​ត្រឹម ២៤ ខែ ដោយ​តម្រូវ​ឲ្យ​អតិថិជន​បង់​មុន ចាប់ពី​៣០% ទៅ​៥០% ហើយ​ប្រាក់​ដែល​នៅសល់ គឺ​បង់​រំលស់​រយៈពេល ២៤ ខែ ដោយ​គ្មាន​ការប្រាក់​។ ដូច្នេះ​មានន័យថា សម្រាប់​អ្នក ទិញ​ទុក​លក់​យកចំណេញ មិនគួរ​ទិញ​ដី​ដែលមាន​គិតការ​ប្រាក់​នោះទេ ពីព្រោះថា​ភាគរយ​នៃ​ប្រាក់ចំណេញ របស់​អ្នកនឹង​ថយចុះ ឬ​គ្មាន​តែម្តង បើ​អ្នកទិញ​ដី​បង់​រំលស់​ដែលមាន​គិតការ​ប្រាក់ ។​

១០) កត្តា​ប្រៀបធៀប​
 
​តម្លៃ​ប្រៀបធៀប ទីតាំង​ប្រៀបធៀប ចំណុច​សក្តានុពល ស្ថានភាព​នៅ​ជុំវិញ​គម្រោង និង​ការអភិវឌ្ឍន៍​ផ្សេងៗ ហេដ្ឋារចនាសម្ព័ន្ធ ប្រព័ន្ធ​ទឹក​-​ភ្លើង ផ្សារ សាលារៀន ទីប្រជុំជន​។​ល​។ ជាការ​ពិតណាស់ អ្នក​ត្រូវតែ​ដឹង​ច្បាស់ ពី​តម្លៃ​ប្រៀបធៀប នឹង​គម្រោង​គេ​ផ្សេងៗ នៅ​ជិតៗ​នឹង​គម្រោង​ដែល​យើង​ទិញ ឬ​នៅ​ទីតាំង​ផ្សេងៗ ដែលមាន​ស្ថានភាព​ប្រហាក់ប្រហែល ថា​តើ​ទីតាំង​គម្រោង ដែល​យើង​ចង់​ទិញ​វា​ល្អ ឬ​អត់​? ស្ថានភាព​បច្ចុប្បន្ន មានការ​អភិវឌ្ឍ​កម្រិតណា​? ហើយ​ក្នុង​ពេលអនាគត ៣-៥ ឆ្នាំ​ខាងមុខ រំពឹងថា​នឹងមាន​ការអភិវឌ្ឍន៍​ក​ម្រិ​ត​ណា​៕
 
(​អត្ថបទ​ពាណិជ្ជកម្ម​)

© រក្សាសិទ្ធិដោយ thmeythmey.com