ជាតិ
បាក់ឌុប
បាក់ឌុប៖ គ្មានអ្នកសង្កេតការណ៍ស្ម័គ្រចិត្ត ក្រសួងអប់រំពឹងផ្អែកទាំងស្រុងលើភ្នែកមន្ត្រីរបស់ខ្លួន ការត្រួតពិនិត្យសិស្សនាសម័យប្រឡងបាក់ឌុបឆ្នាំ២០១៨។ រូបថត ThmeyThmey
×
ដោយ៖ សុវណ្ណ ស្រីពេជ្រ
អង្គភាពប្រឆាំងអំពើពុករលួយ (ACU) ក៏ដូចជាសហភាពសហព័ន្ធយុវជនកម្ពុជា នឹងមិនពង្រាយអ្នកសង្កេតការណ៍ស្ម័គ្រចិត្តរបស់ខ្លួន សម្រាប់សម័យប្រឡងសញ្ញាបត្រមធ្យមសិក្សាទុតិយភូមិ ថ្ងៃទី១៩ ខែសីហា ខាងមុននេះឡើយ។ ទោះបីជាយ៉ាងណាក៏ដោយ ក្រសួងអប់រំ យុវជន និងកីឡា ជឿជាក់លើសមត្ថភាពមន្ត្រីរៀបចំការប្រឡងរបស់ខ្លួន តាមរយៈការពង្រឹងវិន័យ និងបទប្បញ្ញត្តិផ្សេងៗ ជាពិសេសមន្ត្រីអប្បមាទ។
«ការបំពេញកាតព្វកិច្ចរ៉ាប់រងសេវា គោរពម៉ោងធ្វើការ ការគោរពឋានុក្រម ការគោរពការសម្ងាត់វិជ្ជាជីវៈ គិតគូផលប្រយោជន៍ទូទៅ និងភក្តីភាពចំពោះការងារ»។ ទាំងនេះ ជាវិន័យដែលមានចែងនៅក្នុងប្រកាសចុះកាលពីថ្ងៃទី២៨ ខែមិថុនា ស្តីពីការដាក់ឲ្យអនុវត្តនូវកម្រងភារកិច្ច គណៈមេប្រយោគ និងគណៈកម្មការនានានៅមណ្ឌលសំណេរ កំណែ និងបូកពិន្ទុ សម្រាប់ការប្រឡងសញ្ញាបត្រមធ្យមសិក្សាទុតិយភូមិ។
ប្រកាសដែលបន្ថែមពី លើច្បាប់ផ្សេងៗស្តីពីមន្ត្រីរាជការស៊ីវិល មានគោលបំណងជាពិសេសក្នុងការលុបបំបាត់អំពើអសកម្មនានាក្នុងដំណើរការប្រឡងបាក់ឌុប នាពេលខាងមុខ ដោយអ្នកប្រព្រឹត្តខុសបទបញ្ជា ទាំងមន្ត្រីជាបុគ្គលិក និងបេក្ខជន នឹងត្រូវរងការពិន័យ និងទោស។
ការប្រឡងបាក់ឌុប សម័យប្រឡងថ្ងៃទី១៩ ខែសីហា ខាងមុខ ក្រសួង នឹងពង្រាយមន្ត្រីរបស់ខ្លួន គរុសិស្ស និងគរុនិស្សិត ធ្វើជាអប្បមាទ និងជំនួយការអប្បមាទ សម្រាប់តាមដាន ដំណើរការប្រឡង។ ទោះបីជាគ្មានវត្តមានអ្នកសង្កេតស្ម័គ្រចិត្តក៏ដោយ លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានបញ្ជាក់ថា ក្រសួងនៅតែបន្តសហការជាមួយ ACU ដើម្បីដោះស្រាយបញ្ហា និងចាត់វិធានការរាល់សកម្មភាពដែលចាត់ទុកថាជាអំពើពុករលួយក្នុងពេលប្រឡង។
សូមបញ្ជាក់ថា សម័យប្រឡងបាក់ឌុបខាងមុខ មានបេក្ខជនប្រឡងសរុបចំនួន ១១៩,២១៧នាក់ ក្នុងនោះមានស្រីចំនួន ៦១,០៣១នាក់។ តាមតួលេខពីក្រសួងអប់រំ ឆ្នាំនេះបេក្ខជនប្រឡងថ្នាក់វិទ្យាសាស្ត្រ ៤៥,៤១៤នាក់(ស្រី២,៥៥២៦នាក់) និងថ្នាក់វិទ្យាសាស្ត្រសង្គម ចំនួន៧៣,៨០៣នាក់ (ស្រី៣៥,៥៣៨នាក់)។ ចំណែកមណ្ឌលប្រឡង មានចំនួន ២០២ មណ្ឌល (កើន៦មណ្ឌល)៕
© រក្សាសិទ្ធិដោយ thmeythmey.com