ជាតិ
ព្រះមហាក្សត្រ
ព្រះមហាក្សត្រនឹងយាងចូលរួមព្រះរាជពិធីគ្រងរាជសម្បត្តិព្រះចៅអធិរាជជប៉ុន
ព្រះអង្គ Naruhito ធ្លាប់បំពេញព្រះដំណើរទស្សនកិច្ចនៅកម្ពុជាកាលពីឆ្នាំ២០១២ ។ រូបថត AFP
×![]()
ដោយ: ធឿន បញ្ញាឬទិ្ធ
ភ្នំពេញ៖ ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រកម្ពុជា នឹងយាងទៅចូលរួមព្រះរាជពិធីឡើងគ្រងរាជសម្បត្តិរបស់ព្រះចៅអធិរាជជប៉ុន ណារ៉ូហ៊ីតុ នៅថ្ងៃទី២២ តុលាខាងមុខ។ នេះបើតាមលោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ដែលបានប្រាប់ទៅរដ្ឋមន្ត្រីការបរទេសជប៉ុនលោក តារ៉ូ កូណូ កាលពីថ្ងៃទី១ សីហា ក្រោយពីកិច្ចប្រជុំរដ្ឋមន្ត្រីការបរទេសជាមួយដៃគូសន្ទនារបស់អាស៊ាន។
ឆ្លើយតបនឹងព័ត៌មាននេះលោក តារ៉ូ កូណូ បាននិយាយថា រដ្ឋាភិបាលលោកនឹងរង់ចាំទទួលព្រះរាជវត្តមានរបស់ព្រះមហាក្សត្រកម្ពុជា។ «ថ្លែងអំណរគុណថ្វាយចំពោះព្រះករុណាព្រះមហាក្សត្រ និងរំពឹងរង់ចាំព្រះរាជដំណើរនេះ»។ នេះបើតាមសេចក្តីថ្លែងការណ៍ក្រសួងការបរទេស ដែលបានស្រង់សម្តីលោក តារ៉ូ កូណូ។
រជ្ជទាយាទជប៉ុន ព្រះចៅអធិរាជជប៉ុន ណារ៉ូហ៊ីតុ បានក្លាយជាអធិរាជទី១២៦ របស់ជប៉ុនដោយស្នងតំណែងពីបិតារបស់ទ្រង់ គឺអធិរាជ អាគីហ៊ីតុ ដែលដាក់រាជ្យជាផ្លូវការ កាលពីថ្ងៃទី៣០ មេសាកន្លងមក។ កម្មវិធីគ្រងរាជ្យដ៏អធិកអធមជាសាធារណៈដែលចូលរួមប្រមុខរដ្ឋ-ប្រមុខរដ្ឋាភិបាលពិភពលោកជាច្រើន នឹងធ្វើនៅថ្ងៃទី២២ ខែតុលា។
រជ្ជកាលថ្មីរបស់ព្រះចៅអធិរាជ ណារ៉ូហ៊ីតូ ត្រូវបានគេកំណត់ឈ្មោះថា “Reiwa” ដែលមានន័យថា វប្បធម៌នឹងត្រូវបានរីកលូតលាស់ឡើង នៅពេលដែលដួងចិត្តរបស់ប្រជាជនរួមគ្នាជាធ្លុងមួយប្រកបដោយសុខុដុមរមនា។តាមរយៈអគ្គរាជទូតជប៉ុនប្រចាំកម្ពុជា ធ្លាប់បានលើកឡើងថា ៖«ខ្ញុំសង្ឃឹមថា នៅរជ្ជកាល Reiwa ប្រជាជនជប៉ុន និងកម្ពុជា បន្តលើកស្ទួយមិត្តភាព និងការផ្លាស់ប្តូរវប្បធម៌ទៅវិញទៅមក»។
ទំនាក់ទំនងរវាងព្រះរាជវង្សានុវង្សកម្ពុជា និងជប៉ុន បានចាប់ផ្តើមកំឡុងពេលព្រះរាជទស្សនកិច្ចរបស់ព្រះករុណា ព្រះបាទសម្តេចព្រះ នរោត្តម សីហនុ ព្រះមហាក្សត្រកម្ពុជា បានយាងទៅកាន់ប្រទេសជប៉ុននៅឆ្នាំ១៩៥៣។ បន្ទាប់មក ព្រះរាជវង្សានុវង្សនៃប្រទេសទាំងពីរ បានយាងបន្តផ្លាស់ប្តូរទំនាក់ទំនងជាញឹកញាប់។ នៅឆ្នាំ២០១០ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា បានយាងព្រះរាជទស្សនកិច្ចផ្លូវរដ្ឋទៅកាន់ប្រទេសជប៉ុន។ នេះបើតាមស្ថានទូតកម្ពុជា៕
Tag:
ព្រះមហាក្សត្រ
ជប៉ុន
ការទូត
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
