កីឡាអន្តរជាតិ
អន្តរជាតិ
Rooney យល់ព្រមចេញពី DC United សម្រាប់តំណែងកីឡាករ-គ្រូបង្វឹកនៅ Derby
× Wayne Rooney បានសម្រេចចិត្តទៅចូលរួមជាមួយ Derby County ហើយក្នុងនាមជាកីឡាករ និងគ្រូបង្វឹក ពោលគឺពីខែមករា ឆ្នាំក្រោយតទៅ។
អតីតខ្សែបម្រើក្រុមជម្រើសជាតិអង់គ្លេស និង Manchester United រូបនេះនៅសល់កិច្ចសន្យារយៈពេលជាង ២ឆ្នាំទៀត នៅលីគកីឡាបាល់ទាត់អាមេរិក MLS ក្រោយចាកចេញពី Everton ទៅចូលរួមជាមួយ DC United កាលពីខែកក្កដា ឆ្នាំ២០១៨។ រដូវកាលដំបូង Rooney បានបង្ហាញភាពលេចធ្លោខ្លាំងជាមួយនឹងទម្រង់លេងដ៏អស្ចារ្យរបស់គេសម្រាប់ DC United។
វ័យ៣៣ឆ្នាំ Rooney ដែលជាអ្នកស៊ុតបញ្ចូលទីច្រើនជាងគេឲ្យក្រុមបិសាចក្រហម និងអង់គ្លេសនឹងចូលរួមជាមួយ Derby ក្នុងកិច្ចសន្យារយៈពេល ១៨ ខែដំបូង។ លោក Mel Morris ដែលជាម្ចាស់ក្លិប Derby មើលឃើញថាវីរបុរស Man Utd រូបនេះជាកម្លាំងចលករដ៏សំខាន់ក្នុងការរុញច្រានក្លិបរបស់លោកឈានទៅកាន់ Premier League វិញ។
Rooney ដែលស៊ុតបញ្ចូលទីបាន២៣គ្រាប់ ក្នុងការបង្ហាញខ្លួន៤១ប្រកួតឲ្យ DC United បានអះអាងថារូបគេប្រាកដថាអាចចូលរួមជ្រោមជ្រែងក្រុម Derby បាន។
«បើទោះការសម្រេចចិត្តផ្លាស់ប្តូរជារឿងលំបាក តែអ្វីៗគ្រប់យ៉ាងគឺដើម្បីគ្រួសារដែលយើងស្រឡាញ់ និងដើម្បីត្រឡប់ទៅប្រទេសអង់គ្លេសវិញ។ ខ្ញុំពិតជារំភើបចំពោះឱកាសដែល Derby ផ្តល់ឲ្យខ្ញុំសម្រាប់តំណែងជាគ្រូបង្វឹកដំបូងក្នុងអាជីព។ ខ្ញុំទន្ទឹងរង់ចាំចូលរួមជាមួយ អ្នកចាត់ការទូទៅរបស់ Derby គឺលោក Phillip Cocu រួមទាំងបុគ្គលិកទាំងអស់ចាប់ពីដើមខែមករាទៅ។
ក្រុមរហស្សនាមចៀមស បានចាប់ផ្តើមរដូវកាលថ្មី ២០១៩-២០ ដ៏ល្អដោយទទួលជ័យជម្នះលើក្រុម Huddersfield ២-១ សម្រាប់ជំនួបបើកឆាកនៃក្របខណ្ឌ Championship កាលពីយប់ថ្ងៃទី៦ ខែសីហា៕
Tag:
Derby County
Wayne Rooney
© រក្សាសិទ្ធិដោយ thmeythmey.com