ជាតិ
សេដ្ឋកិច្ច
GMAC ស្វាគមន៍ការកាត់ចំនួនថ្ងៃឈប់សម្រាក ដែលនឹងជួយបង្កើនភាពប្រកួតប្រជែង
×![]()
ភ្នំពេញ៖ សមាគមរោងចក្រកាត់ដេរនៅកម្ពុជា (GMAC) បានប្រកាសស្វាគមន៍ការកាត់បន្ថយថ្ងៃឈប់សម្រាករបស់មន្ត្រីរាជការ កម្មករនិយោជិត ដែលនៅមកត្រឹម២២ថ្ងៃ សម្រាប់ឆ្នាំ២០២០ ។ នេះបើតាមសេចក្ដីថ្លែងការណ៍របស់ GMAC នៅថ្ងៃទី៧ខែសីហា។
GMAC លើកឡើងថា មិនត្រឹមតែសមាគមខ្លួននោះទេ តែវិស័យឯកជនទូទៅនឹងគាំទ្រការកាត់បន្ថយចំនួនថ្ងៃឈប់សម្រាកនេះ ព្រោះនេះជាអ្វីដែលវិស័យឯកជនចង់បាន មិនត្រឹមតែវិស័យកាត់ដេរនោះទេ។
សមាគមនេះអះអាងថា ការបន្ថយចំនួនថ្ងៃឈប់សម្រាក នឹងជួយលើកកម្ពស់ភាពប្រកួតប្រជែងរបស់កម្ពុជាលើការផលិតនាំចេញទៅអន្តរជាតិ។ GMAC ឲ្យដឹងដូច្នេះថា៖«ការកាត់បន្ថយថ្ងៃឈប់សម្រាកមួយចំនួន ដែលកន្លងមកមានចំនួនច្រើនលើសលុប បើធៀបនឹងប្រទេសនានាក្នុងតំបន់ និងពិភពលោក ជាពិសេសប្រទេសដែលជាដៃគូប្រកួតប្រជែងផ្នែកសេដ្ឋកិច្ចរបស់កម្ពុជា គឺជាការសម្រេចប្រកបដោយគតិបណ្ឌិតរបស់រដ្ឋាភិបាល»។
GMAC បន្តដូច្នេះថាទៀតថា៖«ផ្ទុយទៅវិញ ការរក្សាទុកចំនួនថ្ងៃឈប់សម្រាកច្រើនលើសលុប និងមិនសមហេតុផលទៅវិញទេ ដែលជាហានិភ័យដល់សេដ្ឋកិច្ច និបង្កឲ្យប៉ះពាល់អវិជ្ជមានដល់ភាពប្រកួតប្រជែងរបស់យើង ហើយនឹងអាចនាំឲ្យធ្លាក់ចុះកំណើនសេដ្ឋកិច្ច និងការបាត់បង់ការងារ»។
ក្នុងរយៈពេលប៉ុន្មានខែមុននេះ រដ្ឋាភិបាលបានដោះស្រាយបញ្ហាស្មុគស្មាញក្នុងការធ្វើពាណិជ្ជកម្មមួយចំនួន ដូចជាការលុបកាំកុងត្រូលនៅមាត់ច្រក លុបភ្នាក់ងារកាំសាប បន្ទាបតម្លៃនៅកំពុងផែ ជាដើម។ ហើយការកាត់បន្ថយថ្ងៃឈប់សម្រាកនេះ ក៏ស្ថិតក្នុងវិធានការរបស់រដ្ឋាភិបាល ក្នុងការសម្រួលការធ្វើធុរកិច្ច ទាក់ទាញវិនិយោគ និងពង្រឹងភាពប្រកួតប្រជែងនេះដែរ៕
Tag:
GMAC
កាត់ដេរ
ថ្ងៃឈប់សម្រាក
© រក្សាសិទ្ធិដោយ thmeythmey.com
