លទ្ធផលបឋមនៃជំរឿនបង្ហាញថា ប្រជាជនខ្មែរមិនសូវកើនព្រោះការផ្តល់កំណើតថយចុះ និងចំណាកស្រុក

ជាតិ

សង្គមជាតិ

លទ្ធផលបឋមនៃជំរឿនបង្ហាញថា ប្រជាជនខ្មែរមិនសូវកើនព្រោះការផ្តល់កំណើតថយចុះ និងចំណាកស្រុក

08, Aug 2019 , 8:39 pm

រូបភាព

ដោយ:

ភ្នំពេញ៖ លទ្ធផលបឋមនៃជំរឿនឆ្នាំ២០១៩ បង្ហាញថា អត្រាប្រជាជនកម្ពុជាប្រចាំឆ្នាំ បានថយចុះពី ១,៥ភាគរយ ក្នុងចន្លោះឆ្នាំ១៩៩៨ និង ឆ្នាំ២០០៨ មកនៅត្រឹម ១,២ភាគរយ ក្នុងចន្លោះឆ្នាំ២០០៨ និង ឆ្នាំ២០១៩។

អត្ថបទទាក់ទង

លទ្ធផលបឋមនៃជំរឿនបង្ហាញថា ពលរដ្ឋខ្មែរ មានជាង១៥លាននាក់

អត្រាថយចុះនៃកំណើនប្រជាជន ដោយសារតែលទ្ធភាពបង្កើតកូនថមថយ និងការធ្វើចំណាកស្រុកទៅក្រៅប្រទេស មានការកើនឡើង។ សទ្ទរកថារបស់សម្តេច ស ខេង រដ្ឋមន្ត្រីក្រសួងមហាផ្ទៃ ស្តីពីលទ្ធផលបឋមនៃជំរឿន បានសរសេរថា៖«តាមតួលេខបណ្តោះអាសន្ននេះ យើងពិនិត្យឃើញថា ចំនួនប្រជាជនកម្រិតថ្នាក់ជាតិ មាននិន្នាការកើនឡើងយឺត ដោយសារអត្រាផ្តល់កំណើតនិងអត្រាកំណើនប្រជាជន បានថយចុះ...»។

លទ្ធផលបឋមនៃជំរឿន បានឲ្យដឹងថា ប្រជាជនកម្ពុជាសរុប មាន ១៥.២៨៨.៤៨៩ នាក់ ក្នុងនោះប្រុស មាន ៧.៤១៨.៥៧៧នាក់ ហើយស្រី ៧.៨៦៩.៩១២ នាក់។ ចំនួននេះ គឺគិតតែនៅក្នុងប្រទេសប៉ុណ្ណោះ ចំណែក ពលរដ្ឋខ្មែរនៅក្រៅប្រទេស មិនទាន់ត្រូវបានរាប់បញ្ចូលឡើយ។ បើតាមរបាយការណ៍ពីក្រសួងការងារឆ្នាំ២០១៨ (មិនមែនលទ្ធផលជំរឿន) ពលរដ្ឋខ្មែរ មានជាង១,២លាននាក់ ដែលកំពុងរស់នៅនិងធ្វើការ នៅក្រៅប្រទេស។

តួលេខបណ្តោះអាសន្ននៃជំរឿន បញ្ជាក់ថា អត្រាកំណើនប្រជាជនខ្ពស់បំផុត មានត្រឹម២.២ ភាគរយក្នុងមួយឆ្នាំ។ ចំពោះតំបន់ដែលមានអត្រាកំណើនប្រជាជនច្រើនជាងគេ មាននៅតំបន់ខ្ពង់រាបនិងភ្នំ ដូចជា ខេត្តព្រះវិហារ មាន៣,៥ភាគរយ ខេត្តមណ្ឌលគិរី មាន៣,៤ភាគរយ ខេត្តរតនគិរី មាន២,៨ភាគរយ ខេត្តស្ទឹងត្រែង មាន៣,២ភាគរយ ឧត្តរមានជ័យ មាន៣,១ភាគរយ ដែលជាកន្លែងសម្រាប់ឲ្យពលរដ្ឋតាំងលំនៅថ្មី ដើម្បីធ្វើកសិកម្ម និងបង្កើនចំណូល។

សម្រាប់រាជធានីភ្នំពេញ និងខេត្តព្រះសីហនុ ក៏ជាកន្លែងប្រមូលផ្តុំដោយការអភិវឌ្ឍផ្នែកសេដ្ឋកិច្ច សំណង់អាគារ ទេសចរណ៍ និងអប់រំ ដែលជាមូលហេតុឲ្យពលរដ្ឋផ្លាស់ទីលំនៅ ដើម្បីទៅបណ្តុះបណ្តាលវិជ្ជាជីវៈ និងរកការងារ។

តួលេខបង្ហាញទៀតថា ខេត្តដែលមានប្រជាជនច្រើនជាងគេគឺ រាជធានីភ្នំពេញ ដែលមាន ជាង២,១លាននាក់ ហើយខេត្តកែប មានកំណើនប្រជាជនតិចជាងគេ គឺជាង៤,១ម៉ឺននាក់។
ផ្អែកលើតួលេខដដែល ជាមធ្យម ក្នុងមួយគ្រួសារ មានចំនួន៤,៦នាក់។ ចំណែក ដង់ស៊ីតេប្រជាជន គឺស្មើនឹង៨៦នាក់ ក្នុងមួយគីឡូម៉ែត្រការ៉េ ដែលមានន័យថា ជាមធ្យម ទំហំដីមួយគីឡូម៉ែត្រការ៉េ មានប្រជាជន៨៦នាក់។

ការធ្វើជំរឿនលើកទី៣នេះ មានរយៈពេល១១ថ្ងៃ គឺចាប់ពីថ្ងៃទី៣ ដល់ថ្ងៃទី១៣ ខែមីនា ឆ្នាំ២០១៩ ដោយប្រើថវិកាជាតិជាង៨លានដុល្លារ។ ការងារជំរឿនប្រជាជនកម្ពុជា ត្រូវបានធ្វើឡើង២ដងរួចមកហើយ គឺនៅឆ្នាំ១៩៩៨ និងឆ្នាំ២០០៨ ដែលស្របតាមច្បាប់ស្តីពីស្ថិតិ ដោយកំណត់នូវកាតព្វកិច្ច របស់ប្រជាពលរដ្ឋម្នាក់ៗ ត្រូវចូលរួមសហការ ក្នុងការធ្វើជំរឿន។ ការធ្វើជំរឿនកន្លងមក មានការជួយជ្រោមជ្រែងពីអង្គការដៃគូ ដូចជាអង្គការ UNFPA អង្គការ JICA រដ្ឋាភិបាលជប៉ុន និង ប្រទេសអាល្លឺម៉ង់។

ការធ្វើជំរឿននេះរៀបចំឡើងក្នុងមួយទស្សវត្សរ៍ម្តង។ កម្ពុជាធ្វើលើកដំបូងកាលពីឆ្នាំ១៩៩៨ មានពលរដ្ឋ ១១.៤៣៧.៦៥៦នាក់ ហើយឡើងដល់ ១៣.៣៩៥.៦៨២នាក់ នៅឆ្នាំ២០០៨៕