ជាតិ
បទយកការណ៍ / បទសម្ភាសន៍
បដិសេធអាហារូបករណ៍មួយចំនួន សិស្សនិទ្ទេស A សម្ផស្ស ចាប់យកអាជីពសារព័ត៌មាន!
× ភ្នំពេញ៖ យុវតី ឃុន សម្ផស្ស ជាសិស្សនិទ្ទេសA ឆ្នាំ២០១៦។ ក្រោយជាប់និទ្ទេស A យុវតី សម្ផស្ស បានបោះបង់អាហារូបករណ៍មួយចំនួន ដែលនាងទទួលបាន ហើយសម្រេចចិត្តប្រឡងចូលសិក្សានៅដេប៉ាតឺម៉ងប្រព័ន្ធផ្សព្វផ្សាយ និងសារគមនាគមន៍ (DMC)វិញ។ យុវតីវ័យ ២០ឆ្នាំរូបនេះ បានជ្រើសរើសជំនាញសារព័ត៌មានសម្រាប់ថ្នាក់បរិញ្ញាបត្រ ជាអាជីពដែលនាងស្រឡាញ់ និងចូលចិត្តតាំងពីកុមារភាព។ ក្នុងបទសម្ភាសជាមួយសារព័ត៌មានថ្មីៗ យុវតី ឃុន សម្ផស្ស លើកឡើងថា៖ «សម្រាប់ការសិក្សាផ្នែកសារព័ត៌មាននេះ ក្រុមគ្រួសារខ្ញុំ ក៏មានការព្រួយបារម្ភចំពោះរឿងនេះដែរ។ ប៉ុន្តែខ្ញុំព្យាយាមប្រាប់ពួកគាត់ថា កុំបារម្ភអី ខ្ញុំចេះការពារ និងថែរក្សាខ្លួនឯងបាន»។
ក្ដីស្រឡាញ់ចំពោះអាជីពសារព័ត៌មាន បានជំរុញចិត្ត កញ្ញា ឃុន សម្ផស្ស ឲ្យខំប្រឹងប្រែងរហូតជាប់អាហារូបករណ៍សិក្សានៅ ប៉ាតឺម៉ងប្រព័ន្ធផ្សព្វផ្សាយ និងសារគមនាគមន៍ (DMC) រយៈពេល៤ឆ្នាំ។ បច្ចុប្បន្ន យុវតី ឃុន សម្ផស្ស ជានិស្សិតឆ្នាំទី២ នៃដេប៉ាតឺម៉ងប្រព័ន្ធផ្សព្វផ្សាយ និងសារគមនាគមន៍។ បន្ទាប់ពីសិក្សាផ្នែកសារព័ត៌មានបាន២ឆ្នាំមក សម្ផស្ស នៅតែស្រឡាញ់ផ្នែកនេះ ដូចអ្វីដែលនាងប៉ងកាលពីក្មេង។
សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey ជាមួយកញ្ញា ឃុន សម្ផស្ស សិស្សនិទ្ទេស A ឆ្នាំ២០១៦ ដូចតទៅ៖
ឆ្លើយតបជាមួយទឹកមុខញញឹមតិចៗ យុវតី សម្ផស្ស បញ្ជាក់ថា៖ « ក្នុងជំនាញជាអ្នកសារព័ត៌មានម្នាក់ គឺមានតួនាទីសំខាន់ណាស់ ព្រោះអ្នកសារព័ត៌មានបានចែករំលែកព័ត៌មាន និងជាអ្នកនាំសារឲ្យពលរដ្ឋទទួលបានព័ត៌មានពិត និងច្បាស់លាស់»។ កញ្ញា សម្ផស្ស មានគំនិតសុទិដ្ឋិនិយមចំពោះការងារជាអ្នកសារព័ត៌មាន ដោយនាងយល់ឃើញថា អ្នកសារព័ត៌មាន បានដើរតួនាទីយ៉ាងសំខាន់សម្រាប់បម្រើផលប្រយោជន៍ដល់ប្រជាជន និងសង្គមជាតិទាំងមូល។
បើទោះបីជាការរៀនផ្នែកនេះ មានផលលំបាកក៏ដោយ ក៏សិស្សនិទ្ទេស A រូបនេះ បន្តប្តេជ្ញាចិត្តខំប្រឹងរៀនឲ្យបានចប់ និងបំពេញការងារជាអ្នកសារព័ត៌មានផងដែរ។ ជាមួយគ្នានេះ សិស្សនិទ្ទេស A ដែលមកពីរាជធានីភ្នំពេញរូបនេះ បានលើកទឹកចិត្ត និងជំរុញដល់សិស្សនិស្សិតដែលចង់សិក្សាផ្នែកសារព័ត៌មានទាំងអស់ ត្រូវហ៊ានស្វះស្វែងសម្រេចនូវក្តីស្រម៉ៃរបស់ខ្លួន និងជ្រើសរើសជំនាញដែលខ្លួនស្រឡាញ់៕
Tag:
និទ្ទេស A
កាសែត
DMC
© រក្សាសិទ្ធិដោយ thmeythmey.com