អន្តរជាតិ
បាតុករហុងកុង តវ៉ានៅព្រលានយន្តហោះដើម្បីទាក់ទាញការគាំទ្រពីអ្នកដំណើរអន្តរជាតិ បាតុករហុងកុងតវ៉ានៅព្រលានយន្តហោះហុងកុង។ រូបភាព AFP
× ក្រុមបាតុករហុងកុង ដែលជួបជុំគ្នាតាមផ្លូវរហូតធ្វើឲ្យញាប់ញ័រទីក្រុងហិរញ្ញវត្ថុនេះជាច្រើនសប្ដាហ៍មកនេះ បានដាក់គោលដៅតវ៉ាថ្មី។ នៅថ្ងៃទី៩ ខែសីហានេះ ក្រុមបាតុករ បានប្រមូលផ្ដុំគ្នានៅព្រលានយន្តហោះអន្តរជាតិហុងកុង ដើម្បីទាក់ទាញការគាំទ្រពីអ្នកដំណើរអន្តរជាតិដែលឆ្លងកាត់ព្រលានយន្តហោះដ៏មមាញឹកមួយនេះ។ ក្រុមហ៊ុនអាកាសចរណ៍ជាច្រើន បានស្នើឲ្យអ្នកដំណើរប្រញាប់មកកាន់ព្រលាន បើមិនចង់ខកដំណើរ។
បាតុកររាប់រយនាក់ដែលខ្លះស្លៀកពាក់ខ្មៅ និងពាក់ម៉ាស់ផងនោះ បានប្រមូលគ្នានៅសាលមកដល់របស់ព្រលានយន្តហោះហុងកុងដើម្បីធ្វើបាតុកម្មអង្គុយរយៈពេលបីថ្ងៃ ដែលគ្រោងបញ្ចប់នៅថ្ងៃចុងសប្ដាហ៍ខាងមុខនេះ។ បាតុករហុងកុងដែលធ្វើឲ្យទីក្រុងនេះជាប់គាំងអស់ប៉ុន្មានសប្ដាហ៍មកហើយនោះ បានជ្រើសរើសព្រលានយន្តហោះដ៏រវល់មួយរបស់ពិភពលោកក្នុងគោលដៅទាក់ទាញសមានចិត្តពីអ្នកដំណើរបរទេសឲ្យយល់ពីចលនារបស់ពួកគេ។
ការផ្លាស់ប្ដូរទីតាំងតវ៉ា ស្ថិតក្រោមការឃ្លាំមើលយ៉ាងម៉ត់ចត់ដោយប៉ូលិសហុងកុង ដែលត្រូវបានក្រុមបាតុករចោទថា ប្រើអំពើហិង្សាលើពួកគេ។ បើតាមកាសែតហុងកុង South China Morning Post អ្នករៀបចំការតវ៉ាអង្គុយមួយកន្លែងនេះ មិនអាចផ្ដល់ចំនួនអ្នកចូលរួមជាក់លាក់ឡើយ តែរំពឹងថា មានអ្នកចូលរួមខ្ទង់ពាន់នាក់ឯណោះ។ អ្នករៀបចំម្នាក់ត្រកូល Lee និយាយថា ពួកគេបានធ្វើការជាមួយបុគ្គលិកព្រលានដើម្បីធានាពីការតវ៉ាដោយសន្តិភាព និងសង្ឃឹមថា ប៉ូលិសនឹងគោរពការប្រមូលនេះ។
«ជួយសង្គ្រោះហុងកុងពីអំពើផ្ដាច់ការ និងភាពឃោរឃៅរបស់ប៉ូលិស។ សូមសួរខ្ញុំពីហុងកុង។» នេះជាសំណេរលើបដាលើដែលដោយបាតុករនៅឯអាកាសយានដ្ឋានហុងកុង។
អ្នកដំណើរខ្លះដែលឆ្លងកាត់ព្រលានយន្តហោះមមាញឹកនេះ ភ្ញាក់ផ្អើលនឹងការតវ៉ា។ អ្នកដំណើរជនជាតិជប៉ុនឈ្មោះ Mio Tomoda និយាយថា ការតវ៉ារបស់ពលរដ្ឋហុងកុង ជារឿងត្រឹមត្រូវ ព្រោះហុងកុងមិនមែនជាចិនឡើយ។ ចំណែកអ្នកជនជាតិបារាំងឈ្មោះ Clara Boudehen បានហៅការតវ៉ារបស់ប្រជាជនហុងកុង ជារឿងសំខាន់ដែលប្រជាជនបានតស៊ូដើម្បីប្រជាធិបតេយ្យ។
ដើម្បីដោះស្រាយបញ្ហាអំឡុងបាតុកម្មនេះ អាជ្ញាធរព្រលានយន្តហោះហុងកុង បានដាក់ចេញវិធានការដើម្បីបញ្ចៀសការកកស្ទះរបស់អ្នកដំណើរ ពិសេសអ្នកដំណើរដែលត្រូវចាកចេញពីហុងកុង។ ទោះមានវិធានការក្ដី អ្នកដំណើរក៏ត្រូវបានស្នើឲ្យទៅដល់ព្រលានយន្តហោះឲ្យបានលឿន កុំឲ្យខកជើងហោះហើររបស់ពួកគេ ខណៈចំនួនអ្នកចូលរួមតវ៉ា ទំនងកើនឡើងថែមទៀតនៅចុងសប្ដាហ៍ខាងមុខព្រោះជាថ្ងៃសម្រាក៕
© រក្សាសិទ្ធិដោយ thmeythmey.com