ជាតិ
ឱកាសសិក្សា! វិទ្យាស្ថានកំពង់ឈើទាលនៅកំពង់ធំ ផ្តល់អាហារូបករណ៍១៨០កន្លែងលើ៦មុខជំនាញ
×![]()
ដោយ៖ ហួ ឆេងស៊ីម
ភ្នំពេញ៖ អាហារូបករណ៍១០០ភាគរយ ថ្នាក់បរិញ្ញាបត្ររងចំនួន១៨០កន្លែងលើ៦មុខជំនាញ មាននៅវិទ្យាស្ថានបច្ចេកវិទ្យាកំពង់ឈើទាលសម្រាប់ឆ្នាំសិក្សា២០១៩-២០២០។ វិទ្យាស្ថានបច្ចេកវិទ្យាកំពង់ឈើទាលជាគ្រឹះស្ថានឧត្តមសិក្សាសាធារណៈ នៃក្រសួងអប់រំ យុវជន និងកីឡា ដែលមានទីតាំងនៅស្រុកប្រាសាទសំបូរ ខេត្តកំពង់ធំ។ វិទ្យាស្ថាននេះផ្តល់ឱកាសដល់សិស្សប្រឡងជាប់ ឬធ្លាក់សញ្ញាបត្រមធ្យមសិក្សាទុតិយភូមិ ឬជាប់សញ្ញាបត្របច្ចេកទេស និងវិជ្ជាជីវៈ កម្រិត៣ ឬសញ្ញាបត្រសមមូល ឲ្យបានរៀនបន្តមុខជំនាញរបស់ខ្លួន។
តាមសេចក្តីជូនដំណឹងរបស់ក្រសួង អប់រំ យុវជន និង កីឡា ដែលចុះហត្ថលេខាដោយលោករដ្ឋលេខា យក់ ង៉ុយ កាលថ្ងៃទី៣១ ខែកក្កដា ឆ្នាំ២០១៩ មុខវិជ្ជាទាំង៦នោះ រួមមាន អនុភាពអគ្គិសនី វិទ្យាសាស្ត្រសត្វ វិទ្យាសាស្ត្រដំណាំ គ្រប់គ្រងទេសចរណ៍ និងសណ្ឋាគារ អេឡិចត្រូនិច និងកុំព្យូទ័រពានិជ្ជកម្ម ដោយមុខជំនាញនីមួយៗ មានការផ្តល់ជូនចំនួន៣០កន្លែង។
សិស្សដែលបានរៀនចប់មុនឆ្នាំសិក្សា២០១៨-២០១៩ ត្រូវភ្ជាប់មកជាមួយវិញ្ញាបនបត្របណ្តោះអាសន្នមធ្យមសិក្សាទុតិយភូមិ ឬវិញ្ញាបនបត្របណ្តោះអាសន្នបច្ចេកវិទ្យានិងវិជ្ជាជីវៈកម្រិត៣ ឬសញ្ញាបត្រដែលមានតម្លៃសមមូល។ ចំណែកសិស្សដែលទើបប្រឡងជាប់ ឬធ្លាក់ ក្នុងឆ្នាំសិក្សា២០១៨-២០១៩ ត្រូវភ្ជាប់មកជាមួយនូវ លិខិតបញ្ជាក់ក្នុងករណីដែលមិនទាន់ទទួលបានវិញ្ញាបនបត្របណ្តោះអាសន្ន។ ចំពោះបេក្ខជនដែលប្រឡងជាប់ជាស្ថាពរ និងមានឈ្មោះក្នុងបញ្ជីប្រកាសលទ្ធផលជាផ្លូវការទើបមានសិទ្ធិដាក់ពាក្យសុំចុះឈ្មោះចូលរៀនបាន។
ការប្រឡងនឹងប្រព្រឹត្តទៅនៅថ្ងៃទី២៨ ខែតុលា ឆ្នាំ២០១៩ នៅក្នុងបរិវេណវិទ្យាស្ថានបច្ចេកវិទ្យាកំពង់ឈើទាល ហើយវិញ្ញាសាត្រូវប្រឡងរួមមាន គណិតវិទ្យា រូបវិទ្យា ជីវវិទ្យា គីមីវិទ្យា ភូមិវិទ្យា ប្រវត្តិវិទ្យា ភាសាអង់គ្លេស និងវប្បធម៌ទូទៅ។ ចំពោះបេក្ខជនដែលមានចំណាប់អារម្មណ៍អាចមកដាក់ពាក្យចាប់ពីថ្ងៃជូនដំណឹងរហូតដល់ថ្ងៃទី១៥ ខែតុលា ឆ្នាំ២០១៩៕
Tag:
អប់រំ
អាហារូបករណ៍
និស្សិត
© រក្សាសិទ្ធិដោយ thmeythmey.com
