អត្ថបទពាណិជ្ជកម្ម
ទីប្រឹក្សាផែនការជីវិត AIA លំដាប់ COT ២រូបពីកម្ពុជាបានការទទួលស្គាល់ចំពោះភាពជោគជ័យដ៏អស្ចារ្យរបស់ខ្លួន
×![]()
ដោយ: ថ្មីៗ
ប្រទេសអូទ្រីស ថ្ងៃទី០៦ ខែសីហា ឆ្នាំ២០១៩ – The President Club គឺជាព្រឹត្តិការណ៌ប្រចាំឆ្នាំដែលរៀបចំដោយសម្ព័ន្ធក្រុមហ៊ុនធានារ៉ាប់រងអាយុជីវិត អេ អាយ អេ ដែលឆ្នាំនេះត្រូវបានធ្វើឡើងនៅរដ្ឋធានីវីយេន នៃប្រទេសអូទ្រីសនាពេលថ្មីៗនេះ ដើម្បីទទួលអបអរភាពជោគជ័យរបស់ទីប្រឹក្សាផែនការជីវិតរបស់ខ្លួន។ ក្នុងព្រឹត្តិការណ៍ដ៏អធិកអធមនេះ លោកស្រី កែវ សុចិន្តា និងលោកស្រី ថន សូផានីទីល ដែលជាទីប្រឹក្សាផែនការជីវិតឆ្នើមរបស់ក្រុមហ៊ុនធានារ៉ាប់រងអាយុជីវិត អេ អាយ អេ (ខេមបូឌា) ឡាយហ្វ៍ អ៊ិនសួរេន ម.ក (“អេ អាយ អេ ខេមបូឌា”) បានការទទួលស្គាល់ចំពោះការក្លាយជាសមាជិក Court of the Table (“COT”) ដែលមានកិត្យានុភាពខ្ពស់បំផុតមួយនៃស្ថាប័ន Million Dollar Round Table (“MDRT”)។
ដើម្បីអាចក្លាយជាសមាជិកលំដាប់ COT ទីប្រឹក្សាផែនការជីវិតទាំងអស់ចាំបាច់ត្រូវមានផលិតភាពអាជីវកម្មរបស់ខ្លួន ៣ដងខ្ពស់ ជាងលំដាប់ MDRT ដែលនេះមានន័យថាស្ត្រីទាំងពីរនាក់នេះទទួលបានភាពជោគជ័យដ៏គួរឲ្យកត់សម្គាល់ ក្នុងរយៈពេលត្រឹមតែ២ឆ្នាំ បន្ទាប់ពីការសម្ពោធជាផ្លូវការរបស់ អេ អាយ អេ នៅកម្ពុជា។ ស្របគ្នានេះដែរ អេ អាយ អេ ខេមបូឌា ក៏មានទីប្រឹក្សាផែនការជីវិតជាច្រើនទៀត ដែលបានក្លាយជាសមាជិក MDRT សម្រាប់ឆ្នាំនេះ។
សមាជិកភាព MDRT ត្រូវបានទទួលស្គាល់ជាអន្តរជាតិថាជាបទដ្ឋាននៃឧត្តមភាពក្នុងវិស័យធានារ៉ាប់រងអាយុជីវិត និងសេវាកម្មហិរញ្ញវត្ថុ ហើយត្រូវបានផ្តល់ជូនដោយផ្អែកលើចំណេះដឹងវិជ្ជាជីវៈដ៏ម៉ត់ចត់ អាកប្បកិរិយាប្រកបដោយក្រមសីលធម៌ម៉ឹងម៉ាត់ និងសេវាកម្មអតិថិជនដ៏ល្អឥតខ្ចោះ។ លោកស្រី សុចិន្តា និងសូផានីទីល បានចូលរួមព្រឹត្តិការណ៍នេះ ជាមួយទីប្រឹក្សាផែនការជីវិតជាន់ខ្ពស់ដទៃទៀត ដែលត្រូវបានទទួលស្គាល់ដោយ MDRT។ សូមបញ្ជាក់ថា អេ អាយ អេ ជាក្រុមហ៊ុនលំដាប់ទី១ លើបញ្ជីសមាជិកភាព MDRT សម្រាប់រយៈពេល៥ឆ្នាំជាប់ៗគ្នា។
ទីប្រឹក្សាផែនការជីវិត AIA ទទួលបានសមិទ្ធិផលដ៏គួរឲ្យកត់សម្គាល់ក្នុងរយៈពេលដ៏ខ្លីនេះ ដោយសារតាមរយៈការបណ្តុះបណ្តាល និងការគាំទ្រលំដាប់ពិភពលោក ពីក្រុមហ៊ុនធានារ៉ាប់រងអាយុជីវិតដ៏ធំបំផុតលើពិភពលោកមួយនេះ មិនថាជាការបណ្តុះបណ្តាលជំនាញអាជីវកម្មដ៏លេចធ្លោ ភាពជាអ្នកដឹកនាំ ឬជំនាញគ្រប់គ្រងជាដើម។ អេ អាយ អេ ក៏បាននាំមុខគេក្នុងទីផ្សារកម្ពុជា ដែលប្រើប្រាស់បច្ចេកវិទ្យាទំនើបបំផុតសម្រាប់ការផ្តល់ដំណោះស្រាយធានារ៉ាប់រងអាយុជីវិត និងកសាងប្រព័ន្ធប្រតិបតិ្តការអាជីវកម្មបែបឌីជីថលយ៉ាងពេញលេញ ដោយមិនមានប្រើប្រាស់ក្រដាស់ឡើយ។
អេ អាយ អេ ក៏ជាក្រុមហ៊ុនដំបូងគេនៅប្រទេសកម្ពុជាផងដែរ ដែលមានទីប្រឹក្សាផែនការជីវិតពេញម៉ោងគាំទ្រដោយប្រព័ន្ធហិរញ្ញវត្ថុរឹងមាំ ស្របគ្នាជាមួយនឹងការផ្តល់ជូននូវ AIA សម្រាប់ជីវិត ដែលជាដំណោះស្រាយធានារ៉ាប់រងលើការព្យាបាលលើជំងឺធ្ងន់ធ្ងរដំបូងគេក្នុងវិស័យនេះថែមទៀតផង។ អេ អាយ អេ ជាស្ថានប័នឈានមុខគេ ក្នុងការជួយឲ្យប្រជាពលរដ្ឋទទួលបានសុខភាព និងជីវិតកាន់តែប្រសើរ ដោយមានការគាំទ្រពីដៃគូជាច្រើនដូចជាក្លិបបាល់ទាត់ Tottenham Hotspur និងឯកអគ្គរដ្ឋទូតពិភពលោក David Beckham។
អេ អាយ អេ ផ្តល់ជូនធនធានដែលខ្លួនមានទាំងអស់ ដើម្បីជួយពង្រឹងសមត្ថភាពទីប្រឹក្សាផែនការជីវិត និងជំរុញឲ្យគាត់យល់ច្បាស់ពីសារៈសំខាន់ក្នុងការការពារជីវិត និងខិតខំប្រឹងប្រែងបំពេញតម្រូវការរបស់អតិថិជនបន្ថែមទៀត ដើម្បីទទួលបានភាពជោគជ័យកាន់តែខ្លាំង។ ទាំងអស់នេះ គឺជាការគាំទ្រឥតឈប់ឈរដល់ទីប្រឹក្សាផែនការជីវិត AIA សម្រាប់អាជីព និងអាជីវកម្មរយៈពេលវែងរបស់ពួកគេជាមួយ អេ អាយ អេ ដែលជាលទ្ធផល ក្រុមហ៊ុននេះបានកសាងសមាជិក COT ២រូបជាលើកដំបូងសម្រាប់កម្ពុជាក្នុង
រយៈពេលតែ ២ឆ្នាំប៉ុណ្ណោះនៃប្រតិបត្តិការរបស់ខ្លួន។
សមាជិក MDRT ទាំង ១២ របស់ អេ អាយ អេ ខេមបូឌា រួមទាំងសមាជិក COT ២រូបនេះផងដែរ នឹងធ្វើដំណើរទៅកាន់ទីក្រុងស៊ីដនី ប្រទេសអូស្ត្រាលី សម្រាប់ការទទួលស្គាល់ជាអន្តរជាតិរបស់ពួកគេនៅខែកញ្ញានេះ។
លោក សំរិទ្ធ មុនី ដែលជានាយកទីប្រឹក្សាផែនការជីវិត AIA បានសម្តែងការអបអរសាទរថា «ខ្ញុំមិនអាចរកពាក្យណាមកថ្លែងពីមោទនភាពដ៏ខ្លាំងក្លារបស់ខ្ញុំ ដែលបានឃើញនូវសមិទ្ធិផលដ៏អស្ចារ្យមួយទៀតរបស់ប្រទេសកម្ពុជា ដោយប្រជាជនកម្ពុជានៅលើឆាកកិត្តិយសនៃព្រឹត្តិការណ៍ The President Club ក្នុងទីក្រុងវីយែននេះ។ សម្រាប់យើងទាំងអស់គ្នា នេះគឺជាការបង្ហាញពីការតស៊ូ និងភាពវាងវៃរបស់ពួកគេទាំងពីរនាក់នេះ ដែលបានជឿជាក់ និងស្វះស្វែងសម្រេចគោលដៅរបស់ពួកគេ។ ពិតមែនហើយ ពួកគាត់បានមកដល់ទីនេះ ក្នុងថ្ងៃនេះ ហើយខ្ញុំក៏អាចមកទីនេះបាន ដោយសារតែពួកគាត់ដែរ។ ពួកគាត់សម្រេចដោយជោគជ័យ។ សូមអបអរសាទរដល់ពួកគាត់ទាំងពីរ។»
អំពី អេ អាយ អេ ខេមបូឌា
អេ អាយ អេ (ខេមបូឌា) ឡាយហ្វ៍ អ៊ិនសួរេន ម.ក (“អេ អាយ អេ ខេមបូឌា”) គឺជាបុត្រសម្ព័ន្ធ និងជាកម្មសិទ្ធិទាំងស្រុងរបស់ AIA Group Limited (“AIA”) ដែលជាសម្ព័ន្ធក្រុមហ៊ុនធានារ៉ាប់រងជីវិតធំជាងគេបំផុតនៅលើពិភពលោកដោយយោងតាមទីផ្សារមូលធននីយកម្ម។
សម្ព័ន្ធ AIA មានវត្តមាននៅក្នុងទីផ្សារចំនួន១៨នៅអាស៊ីប៉ាស៊ីហ្វិក ដែលក្នុងនោះមានសាខា និងបុត្រសម្ព័ន្ធដែលជាកម្មសិទ្ធិទាំងស្រុង នៅហុងកុង ថៃ សិង្ហបុរី ម៉ាឡេស៊ី ចិន កូរ៉េ ហ្វីលីពីន អូស្ត្រាលី ឥណ្ឌូនេស៊ី តៃវ៉ាន់ វៀតណាម ណូវែលហ្សេឡង់ ម៉ាកាវ ប្រ៊ុយណេ កម្ពុជា ព្រមទាំងបុត្រសម្ព័ន្ធដែលជាកម្មសិទ្ធិ៩៧ភាគរយនៅសិរីលង្កា ក្រុមហ៊ុនសម្ព័ន្ធអាជីវកម្ម៤៩ភាគរយនៅឥណ្ឌូនេស៊ី និងការិយាល័យតំណាងនៅមីយ៉ាន់ម៉ា។ AIA គឺជាក្រុមហ៊ុននាំមុខទីផ្សារក្នុងតំបន់អាស៊ីប៉ាស៊ីហ្វិក (លើកលែងជប៉ុន) ដោយយោងលើបុព្វលាភធានារ៉ាប់រងជីវិត និងជាក្រុមហ៊ុនឈានមុខគេនៅក្នុងទីផ្សារភាគច្រើនរបស់ខ្លួន។ AIA មានទ្រព្យសរុប២៣០ពាន់លានដុល្លាអាមេរិក គិតត្រឹមថ្ងៃទី៣១ ខែធ្នូ ឆ្នាំ២០១៨។ តាមរយៈបណ្តាញដ៏ទូលំទូលាយនៃភ្នាក់ងារ ដៃគូ និងធនធានមនុស្សនានាទូទាំងអាស៊ីប៉ាស៊ីហ្វិក AIA បម្រើម្ចាស់បណ្ណសន្យាធានារ៉ាប់រងច្រើនជាង៣៣លានបណ្ណ និងសមាជិកទទួលអត្ថប្រយោជន៍ធានារ៉ាប់រងតាមក្រុមហ៊ុននានាច្រើនជាង១៦លាននាក់។
អេ អាយ អេ ខេមបូឌា ផ្តល់ជូននូវដំណោះស្រាយ និងសេវាកម្មធានារ៉ាប់រងជីវិតឈានមុខគេក្នុងទីផ្សារ ដើម្បីបំពេញតម្រូវការលើការការពារ និងការសន្សំរយៈពេលវែង របស់ប្រជាពលរដ្ឋក្នុងប្រទេសកម្ពុជា។ អេ អាយ អេ ខេមបូឌា ប្តេជ្ញាចូលរួមលើកកំពស់ការអភិវឌ្ឍសង្គម-សេដ្ឋកិច្ច នៃព្រះរាជាណាចក្រកម្ពុជាឲ្យបានយូរអង្វែង និងជួយឲ្យប្រជាជនខ្មែរទទួលបានសុខភាព និងជីវិតកាន់តែប្រសើរ៕
Tag:
AIA (Cambodia) Life Insurance Plc
© រក្សាសិទ្ធិដោយ thmeythmey.com
