ក្រសួងអប់រំនឹងរៀបចំការប្រឡងរើសគ្រូបឋម១៦០០នាក់ និងគ្រូមតេ្តយ្យ២០០នាក់

ជាតិ

ក្រសួងអប់រំនឹងរៀបចំការប្រឡងរើសគ្រូបឋម១៦០០នាក់ និងគ្រូមតេ្តយ្យ២០០នាក់

11, Aug 2019 , 9:39 pm

រូបភាព

ដោយ៖ ហួ ឆេងស៊ីម

ភ្នំពេញ៖ នៅថ្ងៃទី២៩ ខែកក្កដា ឆ្នាំ២០១៩ ក្រសួងអប់រំ យុវជន និង កីឡា មានគម្រោងជ្រើសរើសគ្រូបឋមសិក្សាចំនួន១៦០០នាក់ និងគ្រូមត្តេយ្យសិក្សាចំនួន២០០នាក់ ដែលមានរយៈពេលបណ្តុះបណ្តាល២ឆ្នាំ និង៤ឆ្នាំ ចាប់ពីថ្ងៃទី១៦ ខែធ្នូ ឆ្នាំ២០១៩ នៅតាមវិទ្យាស្ថានគរុកោសល្យ សាលាគរុកោសល្យ និងវិក្រឹតការខេត្ត និងសាលាមធ្យមសិក្សាគរុកោសល្យមត្តេយ្យមជ្ឈិម។

តាមសេចក្តីប្រកាស បេក្ខជនដែលមានបំណងក្នុងការប្រឡងត្រូវមានសញ្ជាតិខ្មែរ មានជីវប្រវត្តិច្បាស់លាស់ មានសុខភាពល្អ និងមិនទាន់មានការងារក្នុងក្របខណ្ឌរដ្ឋ។ បេក្ខជនត្រូវមានកម្រិតវប្បធម៌ចាប់ពីសញ្ញាបត្រមធ្យមសិក្សាទុតិយភូមិចំណេះទូទៅ ឬសញ្ញាបត្រដែលមានតម្លៃសមមូលឡើងទៅ និងមានអាយុចាប់ពី១៦ឆ្នាំ ដល់២៥ឆ្នាំ។

ចំពោះគ្រូជាប់កិច្ចសន្យា អាចប្រឡងប្រឡងចូលក្របខណ្ឌរដ្ឋបាន ដោយដាក់ពាក្យសុំចុះឈ្មោះប្រឡងជ្រើសរើសគ្រូបឋមសិក្សា និងគ្រូមត្តេយ្យសិក្សា តាមរាជធានីខេត្ត និងតាមលក្ខខណ្ឌជ្រើសរើសដូចបេក្ខជនដទៃទៀត។

បេក្ខជនដែលចាប់អារម្មណ៍ក្នុងការប្រឡងអាចដាក់ពាក្យចាប់ពីថ្ងៃផ្សាយដំណឹងនេះរហូតដល់ថ្ងៃទី២១ខែតុលា ឆ្នាំ២០១៩។ ការប្រឡងនឹងប្រព្រឹត្តទៅនៅថ្ងៃទី២១២ ខែវិច្ឆិកា ឆ្នាំ២០១៩។

ចំពោះវិញ្ញាសាប្រឡងមាន៣ ដូចជា វប្បធម៌ទូទៅ អក្សរសាស្ត្រខ្មែរ និងគណិតវិទ្យា ដែលមុខវិជ្ជានីមួយៗនឹងប្រព្រឹត្តទៅរយៈពេល២ម៉ោង។ នេះបើតាមសេចក្តីប្រកាសរបស់ក្រសួងអប់រំ យុវជន និង កីឡា៕