លោក អះម៉ាត់ យ៉ះយ៉ា និងក្មួយ ត្រូវជាប់ពន្ធនាគារ១៥ឆ្នាំ ពីបទនាំពលករខ្មែរទៅបរទេសខុសច្បាប់

ជាតិ

សង្គមជាតិ

លោក អះម៉ាត់ យ៉ះយ៉ា និងក្មួយ ត្រូវជាប់ពន្ធនាគារ១៥ឆ្នាំ ពីបទនាំពលករខ្មែរទៅបរទេសខុសច្បាប់

13, Aug 2019 , 4:17 pm

រូបភាព

លោក អះម៉ាត់ យ៉ះយ៉ា ចូលបំភ្លឺនៅតុលាការភ្នំពេញកន្លងមក

ដោយ: ថ្មីៗ

សាលាដំបូងរាជធានីភ្នំពេញ បានប្រកាសសាលក្រមនៅរសៀលថ្ងៃទី១៣ ខែសីហា ឆ្នាំ២០១៩នេះ ដោយផ្តន្ទាទោសលោក អះម៉ាត់ យ៉ះយ៉ា អតីតរដ្ឋលេខាធិការក្រសួងសង្គមកិច្ច និងក្មួយប្រុសរបស់លោកឈ្មោះ អ៊ីស្មាអែលពិន អូស្ម័ន ឲ្យជាប់ពន្ធនាគារ១៥ឆ្នាំក្នុងម្នាក់ៗ ពីអំពើលួចនាំពលករខ្មែរទៅធ្វើការនៅប្រទេសអារ៉ាប៊ីសាអូឌីតដោយខុសច្បាប់។

ក្រៅពីទោសជាប់ពន្ធនាគារ ចៅក្រម ថែមទាំងតម្រូវឲ្យអ្នកទាំងពីរ បង់ថវិកា២០០លានរៀលទៅឲ្យជនរងគ្រោះ។ អ្នកទាំងពីរ ត្រូវបានចោទប្រកាន់ តាំងពីឆ្នាំ២០០៤មកម្ល៉េះ ពីបទនាំចេញដោយមិនស្របច្បាប់សម្រាប់ការឆ្លងដែន តាមមាត្រា១១ នៃច្បាប់ស្តីពីការបង្ក្រាបអំពើជួញដូរមនុស្ស និងការធ្វើអាជីវកម្មផ្លូវភេទ។

លោក សួស វិទ្យារ៉ាឌី អនុប្រធានលេខាធិការដ្ឋានរដ្ឋបាលនៃសាលាដំបូងរាជធានីភ្នំពេញ ប្រាប់សារព័ត៌មានថ្មីៗតាមទូរសព្ទថា ក្រោយប្រកាសសាលក្រមរួច ចៅក្រមក៏បង្គាប់សមត្ថកិច្ច ឲ្យនាំអ្នកទាំងពីរទៅឃុំនៅពន្ធនាគារព្រៃស (ម១)។

ជនរងគ្រោះពីរនាក់ ដែលត្រូវបាននាំទៅកាន់ប្រទេសអារ៉ាប៊ីសាអូឌីត ត្រូវបានរាយការណ៍ថា រងការបំពាន និងការធ្វើបាបពីម្ចាស់ផ្ទះនិងថៅកែ តែក្រោយមក ត្រូវបានជួយសង្គ្រោះឲ្យបានមកកម្ពុជាវិញ។

លោក អះម៉ាត់ យ៉ះយ៉ា ត្រូវបានបញ្ចប់តំណែងពីរដ្ឋលេខាធិការក្រសួងសង្គមកិច្ច កាលពីខែកញ្ញា ឆ្នាំ២០១៧៕