អ្នកវិទ្យាសាស្ត្រប្រកាសថា «អេបូឡា»លែងជាជំងឺសាហាវព្យាបាលមិនសះស្បើយទៀតហើយ

អន្តរជាតិ

អ្នកវិទ្យាសាស្ត្រប្រកាសថា «អេបូឡា»លែងជាជំងឺសាហាវព្យាបាលមិនសះស្បើយទៀតហើយ

14, Aug 2019 , 12:06 pm

រូបភាព

ដោយ៖ ឈួន ឈីវអ៊ីង

អ្នកវិទ្យាសាស្ត្របានបញ្ជាក់ថា ជំងឺដ៏កាចសាហាវអេបូឡាអាចព្យាបាលបានហើយ បន្ទាប់ពីមានការស្រាវជ្រាវរកឃើញវិធីសាស្ត្រព្យាបាលដែលមានប្រសិទ្ធភាពខ្ពស់ចំនួនពីរនៅសប្តាហ៍នេះ។

ការពិសោធន៍វេជ្ជសាស្ត្រចំនួនពីរលើការព្យាបាលជំងឺអេបូជាការផ្តល់ក្តីសង្ឃឹមថ្មីសម្រាប់ប្រជាជនដែលរងគ្រោះដោយសារការរាតត្បាតនៃជំងឺនេះជាពិសេសនៅរដ្ឋអាហ្វ្រិកកុងហ្គោដែលមានប្រជាជនច្រើននាក់ស្លាប់បាត់បង់ជីវិត។

បើតាមការចុះផ្សាយរបស់សារព័ត៌មាន Washington Post ថ្នាំដែលត្រូវបានធ្វើតេស្តនិងព្យាបាលសាកល្បងអស់រយៈពេលជិត ៩ខែ មានប្រសិទ្ធភាពល្អ។ ដូច្នេះអ្នកជំនាញផ្នែកសុខភាពនឹងផ្តល់ថ្នាំនេះទៅឲ្យអ្នកជំងឺទាំងអស់នៅ ប្រទេសកុងហ្គោ។

លោកវេជ្ជបណ្ឌិតជនជាតិកុងហ្គោ Jean-Jacques Muyembe Tamfum បានចំណាយពេលស្រាវជ្រាវរកវិធីសាស្ត្រព្យាបាលជំងឺអេបូឡាបានជោគជ័យ។ លោកបានលើកឡើងថា៖«វាសឹងតែជារឿងមិនគួរឲ្យជឿដែលមានថ្ងៃនេះ ចាប់ពីពេលនេះទៅ យើងលែងនិយាយថាអេបូឡាព្យាបាលមិនជាទៀតហើយ»។

ជំងឺដ៏សាហាវបំផុតទី ពីរលើពិភពលោកនេះបានរាតត្បាយនិងឆ្លងដល់មនុស្សជិត ២,៨០០នាក់ និងបានសម្លាប់មនុស្សជិត ១.៩០០នាក់ ចាប់តាំងពីពេលដែលជំងឺនេះផ្ទុះឡើងនៅកុងហ្គោកាលពីឆ្នាំមុន។ អង្គការសុខភាពពិភពលោកបានកំណត់ថា វាជាវិបត្តិសុខភាពសាធារណៈពិភពលោកដែលគួរឲ្យព្រួយបារម្ភ កាលពីខែមុនផងដែរ។

ការព្យាបាលដែលបានរកឃើញទាំងពីរគឺ មានឈ្មោះបែបវិទ្យាសាស្ត្រថា REGN-EB3 និង mAb-114 ដែលចូលរួមដោយរារាំងប្រូតេអ៊ីនសំខាន់មួយនៅក្នុងវីរុសអេបូឡា មិនឲ្យលូតលាស់។ វាអាចជួយសង្គ្រោះអ្នកជំងឺដែលមានកម្រិតនៃការឆ្លងទាបរហូតដល់ ៩០ភាគរយ បើយោងតាមទិន្នន័យបឋមដែលបានបង្ហាញពីការសាកល្បង។

នៅគ្រប់កម្រិតនៃការឆ្លងមេរោគអ្នកជំងឺដែលបានទទួលថ្នាំ REGN-EB3 មានអត្រាមរណភាព ២៩ ភាគរយខណៈអ្នកដែលព្យាបាលដោយថ្នាំ mAb-114 មានអត្រាមរណភាព ៣៤ ភាគរយ។ អត្រាមរណភាពជាមធ្យមសម្រាប់អេបូឡាមានប្រហែល ៥០ ភាគរយ បើយោងតាមអង្គការសុខភាពពិភពលោក។

ថ្មីបើភាពជោគជ័យមានប្រាកដក៏ដោយក្នុងការដោះស្រាយបញ្ហាជំងឺអេបូឡា បញ្ហាសំខាន់គឺមិនមែនមនុស្សទាំងអស់សុទ្ធតែអាចបានទទួលការព្យាបាលទេ។ លោក Michael Ryan ដែលជានាយកប្រតិបត្តិផ្នែកសង្គ្រោះបន្ទាន់នៃអង្គការសុខភាពពិភពលោកបានលើកឡើងថា៖«យើងនៅតែឃើញមានមនុស្សជាច្រើននៅឆ្ងាយពីការព្យាបាលជំងឺអេបូឡា។ មនុស្សជាច្រើនមិនបានមកមន្ទីរពេទ្យ ហើយក៏មិនបានទទួលអត្ថប្រយោជន៍ពីការព្យាបាលទាំងនេះ ដែរ»៕