អ្នកស្រី Frappart៖ Super Cup យប់​នេះ មិនមែនជា​ជំនួប​ដ៏​ធំ​ក្រោម​ការកាត់ក្តី​របស់ខ្ញុំ​ឡើយ​
កីឡាអន្តរជាតិ
អន្តរជាតិ
អ្នកស្រី Frappart៖ Super Cup យប់​នេះ មិនមែនជា​ជំនួប​ដ៏​ធំ​ក្រោម​ការកាត់ក្តី​របស់ខ្ញុំ​ឡើយ​
14, Aug 2019 , 3:55 pm        
រូបភាព
​ការប្រកួត​ដណ្តើមពាន​រង្វាន់ UEFA Super Cup រវាង Liverpool និង Chelsea នៅ​រាត្រី​ថ្ងៃទី​១៤ ខែសីហា នឹងមាន​ក្រុម​អាជ្ញាកណ្តាល​ស្ត្រី​ចូលខ្លួន​កាត់សេចក្តី​។ អាជ្ញាកណ្តាល​ស្រី្ត Stephanie Frappart ដែល​ទទួលបន្ទុក​ដឹកនាំ​ជំនួប​របស់​ក្រុម​ម្ចាស់​ជើងឯក Champions League និង Europa League អះអាងថា​នេះ​មិនមែនជា​ការប្រកួត​ដ៏​ធំ​ក្នុង​រដូវ​កាល​នេះ​ដែល​នាង​កាត់ក្តី​ឡើយ​។


 
​មន្ត្រី​អាជ្ញាកណ្តាល Frappart សញ្ជាតិ​បារាំង​នេះ នឹង​បង្កើត​ប្រវត្តិសាស្ត្រ​ថ្មី​ដោយ​ក្លាយជា​ស្ត្រី​ដំបូង​គេ​ដែល​បាន​ចូលរួម​កាត់ក្តី​ជា​ផ្លូវការ​ក្នុងការ​ប្រកួត​ក្របខណ្ឌ​អ៊ឺរ៉ុប​របស់​ក្រុម​បុរស នា​រដូវ​កាល​ថ្មី​នេះ​ក្នុង​ក្រុង Istanbul ប្រទេស​តួ​ក​គី​។​


 
​ដោយ​ធ្លាប់​ទទួលខុសត្រូវ​លើ​ការប្រកួត​វគ្គ​ផ្តាច់ព្រ័ត្រ​កីឡាបាល់ទាត់ World Cup ស្ត្រី​​កាលពី​ខែកក្កដា និង​ការប្រកួត Ligue 1 បារាំង​ចាប់តាំងពី​ចុងរដូវ​កាល​មុន​មក អ្នកស្រី Stephanie Frappart ជឿជាក់ថា​នាង​មិនមាន​សម្ពាធ​អ្វី​នោះទេ​សម្រាប់​ដឹកនាំ​ការប្រកួត Liverpool និង Chelsea នេះ​។​
 
​អាជ្ញាកណ្តាល​ស្ត្រី វ័យ​៣៥​ឆ្នាំ​រូបនេះ អះអាងថា​នាង​ទទួល​ការហ្វឹកហាត់​គ្រប់ពេល ដូច្នេះ​មិនមាន​អ្វី​គួរ​ឲ្យ​ខ្លាច​ទេ ដ្បិត​នាង​តែងតែ​ត្រៀមខ្លួន​សម្រាប់​ការប្រកួត​គ្រប់​កម្រិត​ទាំងអស់​។ យ៉ាងណា​នាង Frappart សារភាព​ទៀតថា​៖«​ជីវិត​របស់​ខ្ញុំ​បាន​ផ្លាស់ប្តូរ​ ចាប់តាំងពី​ត្រូវបានតែងតាំង​កាលពី​ដើមខែ​នេះ​សម្រាប់​ដឹកនាំ​ការប្រកួត​រវាង​ម្ចាស់​ជើងឯក Champions League និង Europa League រដូវ​កាល​មុន​»​។​
 
​ក្នុង​ជំ​នួប​នេះដែរ ក្រៅពី​អាជ្ញាកណ្តាល​លើ​ទីលាន Frappart ក៏មាន​អាជ្ញាកណ្តាល​ខ្សែបន្ទាត់​ជា​ស្ត្រី​ពីររូប​ទៀត រួមមាន​នាង Manuela Nicolosi សញ្ជាតិ​អ៊ីតាលី និង Michelle O'Neill របស់​សារ​ធា​រណរដ្ឋ​អៀរ​ឡង់​។ អាជ្ញាកណ្តាលទាំងបី​រូបនេះ​ធ្លាប់​ធ្វើការ​ជាមួយគ្នា​រួចមកហើយ​នៅឯ World Cup ស្ត្រី​នៅ​បារាំង ឆ្នាំ​២០១៩​​៕

Tag:
 UEFA Super Cup
  Liverpool
  Chelsea
© រក្សាសិទ្ធិដោយ thmeythmey.com