អត្ថបទ៖ ស៊ីធី
ឪពុករបស់កីឡាករ Giorgio Petrosyan លោក Andrei គឺជាប្រភពគាំទ្រដ៏សំខាន់បំផុតក្នុងការពង្រឹងភាពជោគជ័យបន្តបន្ទាប់ និង ការលើកទឹកចិត្តខ្លាំងបំផុតដើម្បីឲ្យរូបគេស្ថិតនៅជាកំពូលកីឡាករនាពេលបច្ចុប្បន្ន។ កូនកាត់អាមេនី-អ៊ីតាលី ត្រូវតតាំងជាមួយ Jo Nattawut នៅវគ្គពាក់កណ្ដាលផ្ដាច់ព្រ័ត្រ ONE Featherweight Kickboxing World Grand Prix នៅសង្វៀន ONE: DREAMS OF GOLD នាថ្ងៃសុក្រទី ១៦ ខែ សីហា ចុងសប្ដាហ៍នេះនៅក្រុងបាងកកប្រទេសថៃ។
អ្នកឈ្នះនឹងឡើងទៅវគ្គផ្ដាច់ព្រ័ត្រដែលមានប្រាក់រង្វាន់ ១ លានដុល្លា។ ជើងខ្លាំងរូបនេះទទួលបានការគាំទ្រយ៉ាងធំធេងពីសំណាក់លោកឪពុករបស់ខ្លួន តាំងពីមុនឈានជើងចូលទីលានហ្វឹកហាត់ម្ល៉េះ។
វីដេអូ៖ Giorgio Petrosyan ឈ្នះ Petchmorakot នៅវគ្គ៨នាក់ចុងក្រោយ៖
VIDEO
ជើងឯកពិភពលោកក្នុងការប្រកួត kickboxing ៥សម័យកាលបានធ្វើឲ្យគោលដៅក្លាយជាការពិត ប៉ុន្តែ លោក Andrei រឹតតែសំខាន់ក្នុងភាពជោគជ័យរបស់ខ្លួន។ «ប៉ារបស់ខ្ញុំជាមនុស្សពិសេសណាស់។ ខ្ញុំជំពាក់គុណរបស់គាត់លើសលប់ដែលលោកធ្វើឲ្យខ្ញុំអាចដល់ចំណុចកំពូលរហូតដល់ពេលនេះ។ ខ្ញុំចូលហាត់ប្រដាល់តាំងពីអាយុ ៧ ទៅ ៨ ឆ្នាំ ព្រោះគាត់ជឿជាក់លើខ្ញុំ ហើយ គាត់ធ្លាប់និយាយថា ខ្ញុំអាចនឹងឡើងដល់កីឡាករលេខ១ក្នុងលោក។ នេះជាតម្លៃមិនអាចកាត់ថ្លៃបាន»។ Petrosyan គូសបញ្ជាក់បែបនេះ។
Andrei បាននាំគ្រួសារទៅរស់នៅអ៊ីតាលី ក្នុងឆ្នាំ ១៩៩៩ និងស្វែងរកកន្លែងល្អប្រសើរដើម្បីអនាគតក្រុមគ្រួសារ ពេល ប្រទេស អាមេនី មានសង្គ្រាមហែកហួរគ្នា។ នោះជារឿងលំបាកមួយដោយសារអត់មានផ្ទះសម្បែង និង អត់មានការគាំទ្រ ប៉ុន្តែ ពួកគេទទួលបានជំនួយពីសប្បុរសធម៌ និង ការផ្ដួចផ្ដើមគំនិតជាថ្មីដើម្បីរស់រាន។ Giorgio ជាអ្នកតាមដានរឿងភាពយន្តក្បាច់គុន ហើយ និមិត្តរូប (idol) របស់គេគឺ Bruce Lee។ Giorgio តែងតែចិញ្ចឹមចិត្តចង់ដូចវីរបុរសរបស់ខ្លួន និង បង្កើតអាជីពជាមួយក្ដីស្រលាញ់។ មុនពេលរកបានក្លិបហ្វឹកហាត់ក្បាច់គុន ឳពុករបស់ Giorgio បានលើកទឹកចិត្តគេឲ្យធ្វើអ្វីដែលខ្លួនស្រលាញ់ និង បំពេញបំណងមួយនេះ។
«The Doctor» បានរំលឹកថា៖«Kickboxing មិនមែនជារឿងល្អទេនៅ អាមេនី ហើយ ខ្ញុំហ្វឹកហាត់កីឡាផ្សេង។ ពេលយើងមកអ៊ីតាលី ខ្ញុំក៏អស់សង្ឃឹមរកកន្លែងហ្វឹកហាត់ហ្វឹកហាត់ប្រដាល់ ព្រោះ Gorizia ជាទីក្រុងតូចមួយ និង មិនងាយស្រួលក្នុងការរកទីតាំងហ្វឹកហាត់ប្រដាល់ទេ»។
វីដេអូការប្រកួតរវាង Giorgio Petrosyan និង Jo Nattawut កាលខែ មេសា ឆ្នាំមុន៖
VIDEO
Giorgio រំលឹកថា ៖«យើងស្នាក់នៅក្នុងជម្រកសប្បុរសធម៌មានឈ្មោះថា Caritas ហើយ ប៉ារបស់ខ្ញុំធ្លាប់ស្នាក់នៅជាមួយខ្ញុំដែរ។ ខ្ញុំហ្វឹកហាត់ខ្លួនឯង។ តែប៉ាខ្ញុំប្រាប់ថា កន្លែងហ្វឹកហាត់នឹងរកបានឆាប់ៗនេះ។ ខ្ញុំរៀបចំកន្លែងដាក់បាវសាក់នៅទីតាំងបាល់បោះ ហើយខ្ញុំអាចទាត់ និង បញ្ចេញកណ្ដាប់ដៃ រួមទាំងការរត់តិចៗបាន»។
មិនយូរប៉ុន្មាន លោក Andrei បានរកកន្លែងហាត់បានឲ្យកូនរបស់ខ្លួន។ លោក លើកទឹកចិត្តឲ្យ Giorgio ធ្វើដំណើរទៅមកពីកន្លែងហ្វឹកហាត់រយៈចម្ងាយប៉ុន្មានម៉ាយ និង លើកទឹកចិត្តថាកូនរបស់ខ្លួនអាចធ្វើបាន។ Petrosyan បន្តថា មុនពេលចូលគេង ឳពុករបស់ខ្លួនបានប្រាប់ឲ្យអាវ៉ង់ចំនួន ១០ ដង ដើម្បីបង្កើនកម្លាំងរៀងរាល់ថ្ងៃ។ Petrosyan សង្កត់ធ្ងន់ថា ៖«តែប៉ាខ្ញុំលើកទឹកចិត្តបន្ត ! ទេ កូនគួរធ្វើរហូតដល់អាវ៉ង់ ១១ ដងដើម្បីឲ្យកាន់តែខ្លាំងឡើង។ ខ្ញុំជឿជាក់ដូច្នេះ ខ្ញុំក៏អាវ៉ង់ ១១ដងមុនពេលចូលគេង»។
កីឡាកររហស្សនាម «The Doctor» ហក់ចូលការប្រកួតក្នុងអាយុ ១១ ឆ្នាំ ហើយបន្ទាប់មកទៀតគេធ្វើការយ៉ាងខ្លាំងក្លាមិនគួរឲ្យជឿ ដែលក្នុងនោះប្រកួតបាន ១០១ ដង និង ចាញ់តែ ២ ដងប៉ុណ្ណោះ។ លោក Andrei តែងតែដាស់តឿនកូនរបស់ខ្លួនអំពីវិន័យដែលអាចនាំឲ្យទទួលបានលទ្ធផលត្រចះត្រចង់នៅថ្ងៃអនាគត។
Petrosyan ចង្អុលបង្ហាញថា៖«ខ្ញុំស្ដាប់ដំបូន្មានរបស់គាត់ទាំងអស់។ នេះជាហេតុផលខ្ញុំអាចមកដល់កម្រិតកំពូល។ គាត់បានព្រមានអំពីការដើរលេង និង ផឹកស៊ីពេលយប់។ ប៉ុន្តែត្រូវហ្វឹកហាត់ខ្លាំងដើម្បីធ្វើខ្លួនរបស់យើងមានឈ្មោះបោះសំឡេង»។
ឥឡូវនេះ Petrosyan កំពុងតែរៀបខ្លួនជួប Nattawut ដែលធ្លាប់ឈ្នះម្ដងរួចហើយកាលខែមេសាឆ្នាំមុន។ បើសិនជា Petrosyan ឈ្នះទៀត គេនឹងបង្កើតប្រវត្តិសាស្ត្រថ្មីសម្រាប់ខ្លួនឯង ដែលអាចឈានទៅឈ្នះប្រាក់រង្វាន់រហូតដល់ ១ លានដុល្លារអាមេរិកនៅវគ្គផ្ដាច់ព្រ័ត្រ។
មុនពេលជំនួបដ៏ធំនេះ Petrosyan បានធ្វើឲ្យឪពុករបស់គេមានមោទនភាពភាព ពេលក្លាយជាកីឡាករលំដាប់ពិភពលោក។ បុរសវ័យ៣៣ឆ្នាំសង្កត់ធ្ងន់បែបនេះ ៖« គាត់សប្បាយចិត្តណាស់ ដូច្នេះខ្ញុំមានមោទនភាពសម្រាប់លោកប៉ារបស់ខ្ញុំ។ ហើយគាត់ក៏មានមោទនភាពធំធេងបំផុតចំពោះខ្ញុំដែរ»។