ជាតិ
សង្គមជាតិ
មនុស្ស៤នាក់ រងរបួសធ្ងន់ស្រាល ដោយសារផ្ទុះហ្គាសនៅសៀមរាប រូបពីហ្វេសប៊ុក លោក ទិត្យ ណារ៉ុង ស្នងការដ្ឋានខេត្តសៀមរាប
× ភ្នំពេញ៖ មនុស្ស៤នាក់ ក្នុងនោះមានជនបរទេស២នាក់ បានរងរបួសធ្ងន់ស្រាល ដោយសារផ្ទុះហ្គាសនៅហាងបញ្ចូលហ្គាសរថយន្តមួយកន្លែង នៅម្តុំផ្លូវលោកតាណឺយ ទល់មុខពេទ្យនាគទេព សង្កាត់សាលាកំរើក ក្នុងក្រុងសៀមរាប ខេត្តសៀមរាប កាលពីរសៀលថ្ងៃទី១៤ សីហា។ នេះបើតាមព័ត៌មានបឋម ពីមន្ទីរព័ត៌មានខេត្តសៀមរាប។
បើតាមមន្ទីរព័ត៌មានខេត្តសៀមរាប ជនរងគ្រោះទាំង៤នាក់នោះមាន សន្តិសុខឯកជន ធ្វើការនៅហាងបញ្ចូលហ្កាសរថយន្ត១នាក់ មន្ត្រីនគរបាលខេត្ត១នាក់ ឈ្មោះ ហួត មុនីពិសាខ រងរបួសធ្ងន់ និងជនជាតិបរទេសជាស្ត្រី២នាក់។ជនបរទេសទាំង២នាក់នេះ ជាអ្នកដំណើរជិះម៉ូតូឆ្លងកាត់កន្លែងកើតហេតុ។ បច្ចុប្បន្ន ជនរងគ្រោះកំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប។ ដោយឡែក លោក ហួត មុនីពិសាខ បានបញ្ជូនទៅកាន់មន្ទីរពេទ្យនៅខេត្តអ៊ូប៊ុន ប្រទេសថៃ ព្រោះរងរបួសធ្ងន់។
ប្រភពដដែល បានបញ្ជាក់ថា មុនពេលកើតហេតុមានរថយន្តមួយគ្រឿង បានចូលទៅដាក់ហ្គាសនៅកន្លែងកើតហេតុ ស្រាប់តែមួយសន្ទុះ ក៏ឮសូរផ្ទុះហើយចេញជាអណ្តាតភ្លើងឡើង បណ្តាលឱ្យផ្ទះអ្នកជិតខាងរងការខូចខាត ដោយបែកកញ្ចក់ខ្ទេចនៅក្នុងផ្ទះ ។ ពលរដ្ឋក្បែរនោះក៏បាននាំគ្នាជួយទាញទុយោបាញ់ទឹកពន្លត់អគ្គិភ័យដែរ ប៉ុន្តែដោយសារសន្ទុះនៃហ្គាស ធ្វើឱ្យវាឆាបឆេះកាន់តែខ្លាំង ទើបពួកគាត់នាំគ្នារត់យកឥវ៉ាន់រៀងៗខ្លួនចេញពីផ្ទះ៕
Tag:
ប៉ូលិស
ហ្គាស
សៀមរាប)
© រក្សាសិទ្ធិដោយ thmeythmey.com