កីឡាជាតិ
ជាតិ
AFF U18៖ ជាជំនួបបង្គ្រប់កិច្ចសម្រាប់កម្ពុជា តែម្ចាស់ផ្ទះវៀតណាមត្រូវការឈ្នះដាច់ខាត សកម្មភាពប្រកួតរបស់ U18 កម្ពុជា(អាវខៀវ) និងវៀតណាមកន្លងទៅ
× ក្រុមកីឡាករជម្រើសជាតិអាយុក្រោម១៨ឆ្នាំកម្ពុជា ត្រូវតតាំងជាមួយម្ចាស់ផ្ទះវៀតណាម សម្រាប់ជំនួបចុងក្រោយពូល B នៃពានរង្វាន់ AFF U18 Championship នៅម៉ោង៤រសៀលថ្ងៃទី១៥ ខែសីហា នេះ នាកីឡដ្ឋាន Thong Nhat Stadium។ ក្រៅពីជំនួបនេះ ក៏មានការប្រកួតពីរគូទៀតផងដែរ ក្នុងនោះក្រុមម៉ាឡេស៊ី ប៉ះថៃ រីឯអូស្ត្រាលីជួបសិង្ហបុរីនៅម៉ោង៤រសៀលដូចគ្នា។
ក្រោយឈ្នះថៃជាប្រវត្តិសាស្ត្រ ៤-៣ និងចាញ់៣ប្រកួត បានធ្វើឲ្យក្រុមជម្រើសជាតិអាយុក្រោម១៨ឆ្នាំកម្ពុជាធ្លាក់ចេញពីពានរង្វាន់ AFF U18 Championship ដោយស្វ័តប្រវត្តិត្រឹមវគ្គជម្រុះក្នុងពូល។ ដូច្នេះសម្រាប់ការប៉ះជាមួយវៀតណាមនៅម៉ោង៤រសៀលនេះ វាជាជំនួបបង្គ្រប់កិច្ចសម្រាប់ U18 កម្ពុជា តែកម្ពុជាក៏ទាមទារឈ្នះវៀតណាម ដើម្បីកែប្រែកំណត់ត្រាក្នុងព្រឹត្តិការណ៍នេះផងដែរ។
ផ្ទុយទៅវិញ ការប៉ះគ្នានៅកីឡដ្ឋាន Thong Nhat ថ្ងៃនេះ វាជាការប្រកួតមួយដ៏សំខាន់សម្រាប់ម្ចាស់ផ្ទះវៀតណាម ពោលគឺពួកគេត្រូវការឈ្នះកម្ពុជាជាដាច់ខាត ដើម្បីអ៊ុតមើលលទ្ធផលជំនួបរវាងម៉ាឡេស៊ីជាមួយថៃ និងអូស្ត្រាលីជាមួយសិង្ហបុរី ដែលរៀបចំនៅម៉ោង៤រសៀលដំណាលគ្នានេះ។ ក្នុងករណីចាញ់ឬស្មើជាមួយកម្ពុជា នោះពួកគេនឹងធ្លាក់ចេញពីការប្រកួត ទោះលទ្ធផលការប្រកួតរបស់ម៉ាឡេស៊ី និងអូស្ត្រាលីបញ្ចប់ក្នុងលទ្ធផលបែបណាក៏ដោយ។
ក្នុងករណីវៀតណាមអាចយកឈ្នះកម្ពុជា ហើយម៉ាឡេស៊ី ឬអូស្ត្រាលីចាញ់ក្នុងការប្រកួតថ្ងៃនេះ នោះពួកគេនឹងទទួលបានកៅអីឡើងទៅវគ្គ១/២ផ្តាច់ព្រ័ត្រ។ ប៉ុន្តែបើម៉ាឡេស៊ី និងអូស្ត្រាលីបញ្ចប់ក្នុងលទ្ធផលស្មើ ហើយវៀតណាមអាចយកឈ្នះកម្ពុជា នោះឱកាសឡើងទៅវគ្គបន្តរបស់ពួកគេទាំង៣ គឺអាស្រ័យលើគ្រាប់បាល់ចំណេញ។ បច្ចុប្បន្នម៉ាឡេស៊ីឈរកំពូលតារាងមាន៩ ខណៈអូស្ត្រាលីឈរលេខ២មាន៩ពិន្ទុដូចគ្នា រីឯវៀតណាមឈរលេខរៀងទី៣មាន៧ពិន្ទុ។
កម្ពុជាមិនធ្លាប់យកឈ្នះវៀតណាមឡើយសម្រាប់ការជួបគ្នា៣លើកកន្លងមកនេះ។ នាជំនួបបើកឆាកនៅឆ្នាំ២០០២ កម្ពុជាចាញ់វៀតណាម ៣-១ បន្ទាប់មកនៅឆ្នាំ២០០៣ និង ២០០៧ កម្ពុជាចាញ់វៀតណាមក្នុងលទ្ធផល ៥-០ ដូចគ្នា។ ប៉ុន្តែបន្ទាប់ពីនោះមកកម្ពុជាមិនធ្លាប់ជួបវៀតណាមនោះទេ។
U18 ឥណ្ឌូណេស៊ី និងមីយ៉ាន់ម៉ា ជាក្រុមតំណាងឲ្យពូល A ដែលទទួលបានកៅអីឡើងទៅវគ្គ១/២ផ្តាច់ព្រ័ត្រនៃពានរង្វាន់ AFF U18 Championship 2019 នៅទីក្រុងហូជីមិញ ប្រទេសវៀតណាម៕
Tag:
បាល់ទាត់
AFF U18 Championship
© រក្សាសិទ្ធិដោយ thmeythmey.com