អន្តរជាតិ
កូរ៉េខាងជើង បាញ់កាំជ្រួចពីរគ្រាប់នៅថ្ងៃនេះ ក្រោយបដិសេធចរចាជាមួយកូរ៉េខាងត្បូង កាំជ្រួចដែលកូរ៉េខាងជើងបាញ់នៅថ្ងៃទី១១ ខែសីហាកន្លងទៅ។ រូបភាព KCNA
× កូរ៉េខាងជើង នៅថ្ងៃទី១៦ ខែសីហា បានបាញ់កាំជ្រួចចំនួនពីរគ្រាប់សំដៅសមុទ្រខាងកើត។ នេះជាការបាញ់លើកទី៦ហើយរបស់កូរ៉េខាងជើងក្នុងរយៈពេលបីសប្ដាហ៍មកនេះ។ ការបាញ់នេះ ធ្វើឡើងក្រោយក្រុងព្យុងយ៉ាងបដិសេធការចរចាជាមួយក្រុងសេអ៊ូល។ យោធាកូរ៉េខាងត្បូង មិនទាន់អាចកំណត់អត្តសញ្ញាណកាំជ្រួចដែលបាញ់នេះនៅឡើយទេ។
បើតាមការប្រកាសសេនាធិការចម្រុះកងទ័ពកងទ័ពកូរ៉េខាងត្បូង កូរ៉េខាងជើងបានបាញ់កាំជ្រួចពីរគ្រាប់ចេញពីឆ្នេរភាគខាងកើតក្នុងខេត្ត Kangwon នៅព្រឹកថ្ងៃទី១៦ ខែសីហានេះ។ មិនមានព័ត៌មានលម្អិតទាក់ទងប្រភេទ ចម្ងាយរត់ ឬចម្ងាយហោះឡើងរបស់កាំជ្រួចនេះនៅឡើយទេ ដោយយោធាកូរ៉េខាងត្បូងប្រកាសថា ខ្លួនកំពុងពិនិត្យស្ថានការណ៍ និងការត្រៀមលក្ខណៈទុកមុន។
នេះ ជាការបាញ់លើកទី៦ហើយរបស់កូរ៉េខាងជើងចាប់តាំងពីការបាញ់នៅដំបូងនៅខែកក្កដា។ កាលពីថ្ងៃទី២៥ ខែកក្កដា កូរ៉េខាងជើង បានផ្ដើមបាញ់មីស៊ីលបាលីស្ទិកចម្ងាយខ្លីពីរគ្រាប់ ដែលជាប្រភេទមីស៊ីលទើបអភិវឌ្ឍថ្មីឈ្មោះ KN-23 ។ គេមិនដឹងថា កាំជ្រួចបាញ់នៅថ្ងៃទី១៦ នេះ ដូចគ្នានឹងមីស៊ីលថ្ងៃទី២៥ ឬយ៉ាងណាឡើយ ដ្បិតកន្លងមកកូរ៉េខាងជើងអះអាងថា ខ្លួនធ្លាប់បាញ់សាកល្បងប្រព័ន្ធកាំជ្រួចស៊េរីថ្មីផងដែរ។
ការបាញ់លើកចុងក្រោយនេះទៀតសោត ធ្វើឡើងតែប៉ុន្មានម៉ោងក្រោយក្រុងព្យុងយ៉ាងនិយាយវាយប្រហារកូរ៉េខាងត្បូងខ្លាំង។ គណៈកម្មាធិការសម្រាប់ការបង្រួបបង្រួមដោយសន្តិភាពដែលជាអង្គភាពទទួលបន្ទុកការងារកូរ៉េខាងត្បូងរបស់កូរ៉េខាងជើង បានរិះគន់ប្រធានាធិបតីកូរ៉េខាងត្បូងលោក មូន ចេអ៊ីន ដែលចង់បង្រួបបង្រួមឧបទ្វីបកូរ៉េនៅត្រឹមឆ្នាំ២០៤៥ បើទោះបីអាណត្តិរបស់លោកចប់នៅឆ្នាំ២០២២ ក៏ដោយ។
គណៈកម្មាធិការនេះ បានហៅការប្រើប្រាស់ពាក្យសកម្មភាពគួរឲ្យបារម្ភ ឬការបង្កហេតុសំដៅកូរ៉េខាងជើងដោយលោក មូន ជាសម្ដីព្រហើន។ លើសពីនោះ គណៈកម្មាធិការនេះ ក៏ឆ្លៀតរិះគន់សមយុទ្ធកូរ៉េខាងត្បូង និងអាមេរិក ក៏ដូចជាផែនការការពារជាតិ៥ឆ្នាំរបស់សេអ៊ូលថែមទៀត ដោយចាត់ទុកជាត្រៀមកម្ទេចកូរ៉េខាងជើង។ បើតាមអ្នកនាំពាក្យគណៈកម្មាធិការនេះ កូរ៉េខាងជើងគ្មានអ្វីត្រូវនិយាយជាមួយកូរ៉េខាងត្បូងឡើយ ហើយក៏មិនអង្គុយជជែកគ្នាម្ដងទៀតដែរ៕
Tag:
កូរ៉េខាងជើង
កូរ៉េខាងត្បូង
មូន ចេអ៊ីន
© រក្សាសិទ្ធិដោយ thmeythmey.com