ក្រសួងអប់រំបញ្ជូនហឹបវិញ្ញាសាប្រឡងបាក់ឌុបចំនួន៤០៤ហឹបទៅកាន់ទូទាំងរាជធានី-ខេត្ត

ជាតិ

សង្គមជាតិ

ក្រសួងអប់រំបញ្ជូនហឹបវិញ្ញាសាប្រឡងបាក់ឌុបចំនួន៤០៤ហឹបទៅកាន់ទូទាំងរាជធានី-ខេត្ត

16, Aug 2019 , 9:59 am

រូបភាព

ទិដ្ឋភាព មន្ត្រីនៃក្រសួងអប់រំ កំពុងត្រូតពិនិត្យហឹបវិញ្ញាសាប្រឡងបាក់ឌុប រូបភាពពីក្រសួងអប់រំ យុវជន និងកីឡា

ដោយ:

ភ្នំពេញ៖ ក្រសួងអប់រំ យុវជន និងកីឡា បានប្រគល់ជូនហឹបវិញ្ញាសាចំនួន៤០៤ហឹបដល់គណៈមេប្រយោគ និងគណៈអប្បមាទទូទាំងរាជធានី-ខេត្ត សម្រាប់ដឹកទៅតាមមណ្ឌលនីមួយៗនៅទូទាំងរាជធានី-ខេត្ត ដើម្បីត្រៀមរៀបចំដំណើរប្រឡងបាក់ឌុបនាថ្ងៃទី១៩-២០ ខែសីហាខាងមុខនេះ។ បើតាមលោក រស់ សុវាចា អ្នកនាំពាក្យក្រសួងអប់រំ ដំណើរការដឹកហឹបវិញ្ញាសានេះនឹងទៅដល់គោលដៅនៅថ្ងៃនេះទាំងអស់។

លោក រស់ សុវាចា អ្នកនាំពាក្យក្រសួងអប់រំ បញ្ជាក់ថា ដំណើរការដឹកហឹបវិញ្ញាសានេះកំពុងតែប្រព្រឹត្តិទៅដោយរលូន។ រូបលោកបញ្ជាក់ថាក្រសួងអប់រំ និងក្រសួងមហាផ្ទៃ និងស្ថាប័នពាក់ព័ន្ធ ទាំងសមត្ថកិច្ច បានរួមកម្លាំងគ្នា មកជួយអមដំណើរការដឹកជញ្ជូនហឹបវិញ្ញាសា ដើម្បីធានាបានសុខសុវត្ថិភាព។

បើតាមអ្នកនាំពាក្យរូបនេះ ហឹបវិញ្ញាសាប្រឡងទាំង៤០៤ហឹប នឹងដាក់តាមក្នុងមួយមណ្ឌលប្រឡងចំនួន២ហឹប។ លោក អះអាងថា ហឹបនីមួយៗមានការចាក់សោសុវត្ថិភាពត្រឹមត្រូវ ដែលមានបិទក្រដាសស្តើងៗនៅលើជុំវិញសោ ដើម្បីធានានូវសុក្រឹតភាព ភាពដើមរបស់ហឹបវិញ្ញាសា និងមិនមានករណីបែកឆ្លាយវិញ្ញាសាប្រឡងឡើយ។ អ្នកនាំពាក្យរូបនេះ បញ្ជាក់ទៀតថា អ្នកដែលមានសិទ្ធិចាក់សោហឹបនោះ ទាល់តែអ្នកមានសមត្ថកិច្ច មានដីកាបញ្ជូនត្រឹមត្រូវ ទើបមានសិទ្ធិកាន់ចាក់ និងបិទសោនោះបាន។

ការប្រឡងសញ្ញាបត្រមធ្យមសិក្សាទុតិយភូមិ នឹងប្រព្រឹត្តទៅនៅថ្ងៃទី១៩-២០ ខែសីហា ដោយមានសិស្សប្រឡងសរុបចំនួន១១៧,០២៤ នាក់ ស្រី ៦០៤២១ នាក់ ។ តាមតួលេខពីក្រសួងអប់រំ ឆ្នាំនេះ បេក្ខជនប្រឡងថ្នាក់វិទ្យាសាស្ត្រមាន ៤៤៦៨៣នាក់ ស្រី ២៥២៨៥នាក់ និងថ្នាក់វិទ្យាសាស្ត្រសង្គម មានចំនួន៧២៣៤១នាក់ ស្រី ៣៥១៣៦ នាក់។ មណ្ឌលប្រឡងមានចំនួន ២០២ មណ្ឌល ថ្នាក់វិទ្យាសាស្ត្រមាន៧៥មណ្ឌល និងថ្នាក់វិទ្យាសាស្ត្រសង្គមមាន១២៧មណ្ឌល ចែកចេញជាបន្ទប់សរុបមាន៤៧២៥បន្ទប់៕