អន្តរជាតិ
×![]()
រដ្ឋាភិបាលក្រុងហាណូយ ហួសចិត្តនឹងសកម្មភាពបំពានដដែលៗរបស់រដ្ឋាភិបាលក្រុងប៉េកាំងនៅក្នុងដែនអធិបតេយ្យ នៃសមុទ្រចិនខាងត្បូងឬសមុទ្រខាងកើត(ហៅដោយវៀតណាម)។ ក្រុងហាណូយ បានថ្កោលទោសសកម្មភាពនេះ និងទាមទារដាច់ខាតឲ្យក្រុងប៉េកាំងដកចេញនាវាទាំងនោះឲ្យអស់ពីដែនទឹករបស់ខ្លួន។
ជាថ្មីម្តងទៀតតាមរយៈសន្និសីទសារព័ត៌មានប្រចាំថ្ងៃនៅថ្ងៃ១៦ សីហា អ្នកនាំពាក្យក្រសួងការបរទេសវៀតណាម លោកស្រី Lê Thị Thu Hằng បានឲ្យដឹងថា វៀតណាម បានទាក់ទងទៅភាគីចិនដើម្បីបញ្ជាក់ពីជំហរប្រឆាំងដាច់ខាតលើការបំពានធ្ងន់ធ្ងរដដែលៗរបស់ចិន និងបានទាមទារឲ្យដកនាវាស៊ើបការប្រភេទ Haiyang Dizhi 8 រួមទាំងនាវាហែរហមជាមួយជាច្រើនទៀតចេញពីតំបន់សេដ្ឋកិច្ចផ្តាច់មុខ និងខ្ពស់រាបបាតសមុទ្ររបស់វៀតណាម នៃសមុទ្រចិនខាងត្បូង។
តាមការចុះផ្សាយរបស់ភ្នាក់ងារព័ត៌មានវៀតណាម Vietnam News សេចក្តីថ្លែងការណ៍របស់វៀតណាម ធ្វើឡើងបន្ទាប់ពីបានដឹងថា ក្រុមនាវាស៊ើបការណ៍ជាច្រើនគ្រឿងរបស់ចិន បានវិលត្រលប់មកកាន់ដែនទឹកវៀតណាមសារជាថ្មីនៅថ្ងៃ១៣ សីហាកន្លងទៅ ក្នុងគោលដៅស្រាវជ្រាវ និងស្ទាប់ស្ទង់កន្លែងរុករកប្រេងកាតក្នុងសមុទ្រចិនខាងត្បូង។
ជាមួយនឹងចំណាត់ការផ្នែកការទូតអ្នកនាំពាក្យដដែលរូបនេះ បានសង្កត់ធ្ងន់ថាដើម្បីឆ្លើយតបនឹងសកម្មភាពបំពាននេះ រដ្ឋាភិបាលវៀតណាម ក៏បានដាក់បញ្ជាឲ្យកងកម្លាំងរបស់ខ្លួនបន្តអនុវត្តវិធានការចាំបាច់ដើម្បីការពារ និងធានាដល់អធិបតេយ្យ, សិទ្ធិអធិបតេយ្យ និងយុត្តាធិការរបស់វៀតណាម ដោយយោងតាមច្បាប់ជាតិ និងអន្តរជាតិជាធរមាន។
លោកស្រីអ្នកនាំពាក្យ ក៏បានគូសបញ្ជាក់ជាថ្មីពីគោលជំហររបស់វៀតណាម ដែលតែងតែផ្តល់តម្លៃខ្ពស់ និងចង់លើកកម្ពស់ចំណងមិត្តភាពជាមួយនឹងចិន ដើម្បីការអភិវឌ្ឍប្រទេស និងប្រជាជនទាំងសងខាង ក៏ដូចជាដើម្បីសន្តិភាព ស្ថិរភាព និងសន្តិសុខនៅក្នុងតំបន់ និងពិភលោក។ វៀតណាម ក៏ចង់ឃើញភាគីពាក់ព័ន្ធមានឆន្ទៈបែបនេះផងដែរ។
គួររម្លឹកថា នៅខែកក្កដាកន្លងទៅ វៀតណាម បានចេញសេចក្តីថ្លែងការណ៍មួយម្តងរួចហើយដើម្បីថ្កោលទោស និងទាមទារដូចគ្នាឲ្យចិន បញ្ចប់សកម្មភាពបំពាន និងដកនាវារបស់ខ្លួនចេញពីដែនទឹករបស់ខ្លួន ដែលបានធ្វើសកម្មភាពកាន់តែគឃ្លើនក្នុងការសិក្សាស្រាវជ្រាវតំបន់មានសក្តានុពលប្រេងកាត ដែលជាតំបន់វៀតណាម អះអាងថា មានសិទ្ធិគ្រប់គ្រងផងដែរនោះ៕
© រក្សាសិទ្ធិដោយ thmeythmey.com
