ជប៉ុនសុំឯកសារអំពី«ផ្លូវបុរាណចក្រភពខ្មែរ» យកទៅបោះពុម្ពបង្រៀនសិស្សរបស់ខ្លួន

ជាតិ

បទសម្ភាសន៍

ជប៉ុនសុំឯកសារអំពី«ផ្លូវបុរាណចក្រភពខ្មែរ» យកទៅបោះពុម្ពបង្រៀនសិស្សរបស់ខ្លួន

18, Aug 2019 , 6:29 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ប្រទេសជប៉ុន តាមរយៈគ្រឹះស្ថានបោះពុម្ព THISHUKAN (តៃស៊ូកាន់) កាលពីថ្ងៃទី២៩ កក្កដា បានដាក់សំណើសុំបោះពុម្ពអត្ថបទស្រាវជ្រាវអំពីផ្លូវបុរាណ ជាភាសាជប៉ុនសម្រាប់សិស្សវិទ្យាល័យជប៉ុន។ អត្ថបទដែលជប៉ុនស្នើយកទៅបកប្រែនិងបោះពុម្ពនេះ គឺបានផ្សព្វផ្សាយនៅប្រទេសសិង្ហបុរីនៅឆ្នាំ២០១៦ មានចំណងជើងជាភាសាអង់គ្លេសថា «From Living Angkor Road Project to Cultural Relationship Study in Mainland Southeast Asia Research Center: Cross Culture and Cross Border ឬជាភាសាខ្មែរមានន័យថា ពីបណ្ដាញផ្លូវសម័យអង្គរទៅកាន់ទំនាក់ទំនងវប្បធម៌ក្នុងតំបន់អាស៊ីអាគ្នេយ៍ដីគោក៖ គម្រោងស្រាវជ្រាវទំនាក់ទំនងវប្បធម៌និងការអភិវឌ្ឍឆ្លងព្រំដែន។

ដើម្បីជ្រាបច្បាស់ពីរឿងរ៉ាវនេះ សូមស្ដាប់បទសម្ភាសរវាងអ្នកស្រី អ៊ីសា រ៉ហានី នៃសារព័ត៌មានថ្មីៗប្រចាំខេត្តសៀមរាប និងលោក អ៊ឹម សុខរិទ្ធី សហប្រធាននៃគម្រោងស្រាវជ្រាវផ្លូវបុរាណរបស់អាជ្ញាធរជាតិអប្សរាដូចតទៅ៖

គម្រោងស្រាវជ្រាវបណ្ដាញផ្លូវបុរាណសម័យអាណាចក្រអង្គរបានចាប់ផ្តើមនៅឆ្នាំ២០០៥ ដែលជាគម្រោងស្រាវជ្រាវឆ្លងប្រទេស ដែលមានកម្ពុជានិងថៃ ជាសហប្រធាន។ នេះជាគម្រោងដែលធ្វើឡើងដោយជាតិទាំងពីរ គឺ១០០ឆ្នាំក្រោយដែលបរទេសជាអ្នកដឹកនាំសុទ្ធសាធ។ លោក អ៊ឹម សុខរិទ្ធី បង្ហាញពីមោទកភាពនៃគម្រោងស្រាវជ្រាវដ៏អស្ចារ្យនេះ ដោយក្នុងនោះនៅឆ្នាំ២០១៣ គម្រោងនេះទទួលបានរង្វាន់ឆ្នើមក្នុងចំណោមគម្រោងជាង១ម៉ឺនដែលបានដាក់ប្រកួតក្នុងប្រទេស ជាគម្រោងស្រាវជ្រាវប្រកបដោយវិទ្យាសាស្ដ្រ មានលក្ខណៈត្រឹមត្រូវពិតប្រាកដ និងប្រើប្រាស់ទិន្នន័យសម្រាប់ផ្សព្វផ្សាយ និងការអប់រំបណ្ដុះបណ្ដាលយុវជនក្នុងវិស័យបេតិកភណ្ឌ។

ជប៉ុនជាប្រទេសទី១ដែលយកលទ្ធផលនៃគម្រោងស្រាវជ្រាវផ្លូវបុរាណចក្រភពអង្គរយកទៅបកប្រែនិងបោះពុម្ពបញ្ចូលក្នុងកម្មវិធីសិក្សារបស់ខ្លួន។ នៅកម្ពុជាមិនទាន់មានការបញ្ចូលក្នុងកម្មវិធីអប់រំជាតិទេ តែចាប់ពីតាំងពីឆ្នាំ២០០៧មក គេបានយកទៅបង្រៀនដល់សិស្សានុសិស្សក្នុងគម្រោងអប់រំបេតិកភណ្ឌនៅតាមបណ្ដាខេត្តមួយចំនួនដែរ ដូចជានៅបន្ទាយឆ្មារ ខេត្តបន្ទាយមានជ័យ សៀមរាប និងតំបន់សម្បូរព្រៃគុក ខេត្តកំពង់ធំ។

ជារៀងរាល់ឆ្នាំ គ្រឹះស្ថានបោះពុម្ព THISHUKAN តែងធ្វើបច្ចុប្បន្នភាពបន្ថែមលើអត្ថបទស្រាវជ្រាវថ្មីៗសម្រាប់វិស័យអប់រំនៅប្រទេសជប៉ុន។ អត្ថបទដែលស្ថាប័ននេះជ្រើសរើសជាអត្ថបទស្រាវជ្រាវវិទ្យាសាស្ដ្រ មានលក្ខណៈត្រឹមត្រូវពិតប្រាកដ ហើយផ្តល់ចំណេះដឹងជាទូទៅដល់មនុស្សក្នុងតំបន់។ អត្ថបទស្រាវជ្រាវផ្លូវបុរាណនេះ គឺមានការទទួលស្គាល់ដោយសាកលវិទ្យាល័យ ក្យូតូ ដ៏ល្បីល្បាញរបស់ជប៉ុនផងដែរ៕