ជាតិ
បទយកការណ៍ / បទសម្ភាសន៍
សេដ្ឋកិច្ច
លោក សុង សារ៉ន ប្ដេជ្ញាឲ្យការនាំចេញអង្ករ១លានតោន សម្រេចបានក្នុងរយៈពេល៣ឆ្នាំ រូបពីហ្វេសប៊ុកMC Smile Smile
× ភ្នំពេញ៖ សហព័ន្ធស្រូវអង្ករកម្ពុជា(CRF) ទើបតែបានបោះឆ្នោតជ្រើសរើសគណៈដឹកនាំថ្មីសម្រាប់អាណត្តិទី៣របស់ខ្លួន។ សហព័ន្ធស្រូវអង្ករ ដែលមានលោក សុង សារ៉ន ជាប្រធាននេះ បានដាក់ទិសដៅឲ្យផែនការនាំចេញអង្ករ១លានតោនរបស់រដ្ឋាភិបាល សម្រេចបានក្នុងរយៈពេលបីឆ្នាំ ពោលគឺក្នុងអាណត្តិដែលលោកដឹកនាំនេះ ត្រឹមឆ្នាំ២០២២។
សូមស្ដាប់កិច្ចសម្ភាសតាមប្រព័ន្ធទូរសព្ទរវាងលោក ញ៉ុង ហេង នៃសារព័ត៌មានថ្មីៗ និងលោក សុង សារ៉ន ដូចតទៅនេះ៖
ដើម្បីសម្រេចបានទិសដៅខាងលើនេះ CRF នឹងដោះស្រាយបញ្ហាអាទិភាពមួយចំនួន។ តាមរយៈកិច្ចសម្ភាសខាងលើនេះ លោក សុង សារ៉ន បញ្ជាក់ថា CRF នឹងពង្រីកការនាំចេញទៅទីផ្សារចិន។ លោកមានប្រសាសន៍ដូច្នេះថា៖«យើងត្រូវដោះស្រាយគឺបញ្ហាទីផ្សារដែលត្រូវពង្រីកនិងអនុវត្តកូតាដែលចិនដាក់ឲ្យ៤០ម៉ឺនតោន ដោយយើងនឹងប្រឹងពិនិត្យមើលថាយើងអាចធ្វើអ្វី? ព្រោះយើងនាំចេញទើបបានជាង១០ម៉ឺនតោនប៉ុណ្ណោះ»។
ស្របគ្នានេះ សហព័ន្ធនឹងជំរុញការងារជួយកសិករ។ លោក សុង សារ៉ន ប្រាប់ដូច្នេះថា៖«យើងចង់ឲ្យកសិករប្រើប្រាស់ពូជមួយដែលសុទ្ធតាមតម្រូវការទីផ្សារជាក់ស្ដែង។ ហើយយើងនឹងផលិតស្រូវមួយចំនួនដែលតម្រូវទីផ្សារចិនចង់បាន»។ ក្រៅពីនេះ កសិករនឹងត្រូវជួយគាំទ្រផ្នែកបច្ចេកវិទ្យា ការប្រើបច្ចេកវិទ្យាសម្រាប់ជាប្រយោជន៍ជុំវិញការដាំដុះស្រូវរបស់ខ្លួន ដែលហៅថាកម្មវិធីកសិករវៃឆ្លាត។
ប្រធាន CRF និងជាអគ្គនាយកក្រុម AmruRice រូបនេះ បន្ថែមទៀតថា សហព័ន្ធនឹងខិតខំប្រជុំដោះស្រាយជាមួយស្ថាប័នពាក់ព័ន្ធទីផ្សារ កសិកម្ម ការដឹកជញ្ជូនជាដើម ឲ្យបានភ្លាមៗទាន់ពេល។
ដោយឡែកសហព័ន្ធស្រូវអង្ករអាណត្តិថ្មីនេះ ក៏បានកំណត់បញ្ហាប្រឈមចំពោះទិសដៅនាំចេញអង្ករ១លានតោន។ បើតាមលោក សុង សារ៉ន បញ្ហាទាំងនោះរួមានការប្រែប្រួលអាកាសធាតុ និងគោលនយោបាយឧបត្ថម្ភធន និងការពារនិយមរបស់ប្រទេសមួយចំនួន៕
Tag:
ស្រូវ អង្ករ
សុង សារ៉ន
© រក្សាសិទ្ធិដោយ thmeythmey.com