ជាតិ
នយោបាយជាតិ
×![]()
ដោយ: សារព័ត៌មានថ្មីៗ
លោក សម រង្ស៊ី មេដឹកនាំក្រុមប្រឆាំង បានចាត់ទុក ផែនការវិលត្រឡប់មកកម្ពុជា នៅថ្ងៃទី៩ ខែវិច្ឆិកា ឆ្នាំ២០១៩ ថាជាទឹកចុងក្រោយនៃការប្រកួតរវាងលោក ជាមួយសម្តេចនាយករដ្ឋមន្ត្រី ហ៊ុន សែន ក៏ដូចជាគណបក្សកាន់អំណាច។ សម្តីនេះ លោក លើកឡើងក្នុងជំនួបជាមួយអ្នកគាំទ្រ ក្នុងវត្តខ្មែរមួយនៅប្រទេសអូស្ត្រាលី នាថ្ងៃទី១៨ ខែសីហា ឆ្នាំ២០១៩។
លោក សម រង្ស៊ី ថ្លែងថា ស្ថានការណ៍ បានទុំជោរហើយ ហើយពេលវេលាសមគួរ ក៏បានមកដល់ដែរ សម្រាប់ការធ្វើមាតុភូមិនិវត្តរបស់លោក។ លោក ប្រកាសដូច្នេះថា៖«យើងបន្តសកម្មភាពរបស់យើង ហើយបានចូលមកដល់ដំណាក់កាលថ្មីមួយ ដំណាក់កាលចុងក្រោយ ដំណាក់កាលផ្តាច់ព្រ័ត្រ។.....ខ្ញុំបានធ្វើសេចក្តីសម្រេចមួយ សំខាន់ជាងគេបំផុតក្នុងជីវិតរបស់ខ្ញុំ ថាត្រឡប់ទៅស្រុកកំណើតរបស់យើងវិញ ទៅជួយប្រជារាស្ត្រឲ្យទាល់តែបាន»។
មេដឹកនាំក្រុមប្រឆាំង ដែលនិរទេសអស់រយៈពេលប្រមាណជា៤ឆ្នាំមកហើយនោះ បានបន្តថា ការតស៊ូពីក្រៅប្រទេស មិនគ្រប់គ្រាន់ឡើយ ហើយក៏មិនអាចជួយស្រោចស្រង់ប្រទេសជាតិបានដែរ។ លោក យល់ថា លុះត្រាតែលោក ដឹកនាំកម្លាំង ចូលមកក្នុងស្រុក ហើយបំផុសបំផុលកម្លាំងប្រជាពលរដ្ឋ ទើបអាចដណ្តើមយកជ័យជម្នះបាន។ លោក សង្កត់ធ្ងន់ថា៖«បើយើងមិនចូលទៅប្រឡូក មិនទៅស្រោចស្រង់ប្រទេសជាតិទេ ជាតិយើងនឹងរលាយហើយ»។
លោក សម រង្ស៊ី មិនមែនមិនគិតពីគ្រោះថ្នាក់នៃការវិលត្រឡប់មកកម្ពុជានោះទេ។ តែលោក ប្រកាន់ជំហរថា ក្នុងជីវិតរបស់មនុស្ស ត្រូវតែផ្តូរផ្តាច់ និង ត្រូវធ្វើសេចក្តីសម្រេច ដើម្បីអ្វីមួយ។ លោក បញ្ជាក់ថា៖«អ្វីក៏មានហានិភ័យដែរ តែយើងត្រូវហ៊ានប្រឈមមុខ ពីព្រោះអ្វីដែលយើងអាចទទួលមកវិញ គឺស្រោចស្រង់ប្រទេសចាតិ ដែលធានាថាជាតិយើងមិនស្លាប់...អ៊ីចឹងយើងហ៊ានទទួលហានិភ័យហ្នឹងទាំងអស់គ្នា....»។
នៅថ្ងៃទី១៦ ខែសីហា ឆ្នាំ២០១៩ សមាជិកគណៈកម្មាធិការអចិន្ត្រៃយ៍នៃអតីតគណបក្សប្រឆាំង បានបើកកិច្ចប្រជុំនៅក្រៅប្រទេស ហើយក៏សម្រេចថា មាតុភូមិនិវត្តរបស់លោក សម រង្ស៊ី នឹងធ្វើឡើងនៅថ្ងៃទី៩ ខែវិច្ឆិកា ឆ្នាំ២០១៩ ដែលជាថ្ងៃបុណ្យឯករាជ្យជាតិលើកទី៦៦។
លោក សុខ ឥសាន អ្នកនាំពាក្យគណបក្សកាន់អំណាច សរសេរសារក្នុងបណ្តាញទំនាក់ទំនងតេឡេក្រាម នៅថ្ងៃទី១៨ ខែសីហា ក្នុងន័យព្រមានដូច្នេះថា៖«ទណ្ឌិតរត់ចោលស្រុកត្រៀមខ្លួនចូលស្រុក អាជ្ញាធរកម្ពុជា ក៏បានត្រៀមខ្នោះរួចហើយដែរ»។ យ៉ាងណាក៏ដោយ មន្ត្រីបក្សកាន់អំណាចរូបនេះ នៅតែជឿថា ក្រុមលោក សម រង្ស៊ី នឹងមិនហ៊ានចូលស្រុក តាមកាលកំណត់ឡើយ។
ឧត្តមសេនីយ៍ឯក ឆាយ គឹមខឿន ប្រាប់សារព័ត៌មានថ្មីៗ ក្រោយការប្រកាសរបស់អតីតគណបក្សប្រឆាំងថា ផែនការដាក់កម្លាំង ដើម្បីចាប់លោក សម រង្ស៊ី និង បក្សពួក ត្រូវបានរៀបចំរួចហើយ។ លោក ព្រមានថា មិនថាពួកគេ ចូលមកកម្ពុជា តាមផ្លូវគោក ផ្លូវអាកាស ឬ ផ្លូវទឹកនោះទេ សមត្ថកិច្ច នឹងអនុវត្តតាមដីការបស់តុលាការ ក្នុងការចាប់ពួកគេ។ ប៉ុន្តែ លោកបញ្ជាក់ថា អ្នកដែលគ្មានទោសឬគ្មានឈ្មោះក្នុងដីកា នឹងមិនត្រូវចាប់ខ្លួនឡើយ។
នៅដើមខែកក្កដា ឆ្នាំ២០១៩នេះ នាយឧត្តមសេនីយ៍ នេត សាវឿន អគ្គស្នងការនគរបាលជាតិ និង នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានបើកកិច្ចប្រជុំរួមគ្នា ស្តីពីការត្រៀមកម្លាំង ដើម្បីចាប់អ្នកប្រឆាំង ពេលពួកគេធ្វើមាតុភូមិនិវត្ត។
ចំណែក សម្តេចនាយករដ្ឋមន្ត្រី ហ៊ុន សែន ក៏ធ្លាប់ព្រមានរួចមកហើយដែរថា សមត្ថកិច្ច នឹងវាយខ្នោះលោក សម រង្ស៊ី យកទៅដាក់នៅពន្ធនាគារ ឲ្យតែលោក មកដល់កម្ពុជា។
លោក សម រង្ស៊ី មិនត្រឹមតែអះអាងថា មានពលរដ្ឋខ្មែរនៅក្រៅស្រុក សម្រេចចិត្តរួមដំណើរជាមួយលោកនោះទេ តែលោក ថែមទាំងអះអាងថា ឥស្សរជនបរទេសមួយចំនួន ក៏នឹងរួមដំណើរមកកម្ពុជាជាមួយលោកដែរ៕
Tag:
សម រង្ស៊ី
មាតុភូមិនិវត្ត
© រក្សាសិទ្ធិដោយ thmeythmey.com
