អន្តរជាតិ
×![]()
ដោយ៖ ងួន សុភាវត្តី
ថ្ងៃទី២០ ខែសីហា គណៈរដ្ឋមន្ត្រីថៃបានច្រានចោលសំណើរបស់រដ្ឋមន្ត្រីទេសចរណ៍ និងកីឡាជុំវិញការលុបចោលទិដ្ឋាការសំរាប់អ្នកទេសចរចិននិងឥណ្ឌា។ ប៉ុន្តែគណៈរដ្ឋមន្ត្រីថៃ បានយល់ព្រមមិនយកថ្លៃសេវាលើការសុំពន្យាទិដ្ឋាការរបស់ប្រទេសចំនួន១៨ វិញ។
គណៈរដ្ឋមន្ត្រីថៃ បានអនុម័តកញ្ចប់ទឹកប្រាក់៣១៦ពាន់លានបាតចូលទៅក្នុងប្រព័ន្ធសេដ្ឋកិច្ចជាតិ ដើម្បីជំរុញវិស័យទេសចរណ៍។ កញ្ចប់ទឹកប្រាក់នេះ នឹងគ្របដណ្ដប់លើបញ្ហាមួយចំនួនដូចជា ផ្តល់ប្រាក់ជំនួយដល់ជនក្រីក្រ ការលើកទឹកចិត្តទេសចរណ៍ក្នុងស្រុក និងផ្តល់ប្រាក់កម្ចីដែលមានការប្រាក់ថោកដល់កសិករ។ ប៉ុន្តែគម្រោងលើកលែងទិដ្ឋាការ មិនត្រូវបានពិចារណាឡើយក្រោយកិច្ចប្រជុំនេះ នាយករដ្ឋមន្ត្រីថៃ ប្រាយុទ្ធ ចន្ទអូចា និយាយថា គណៈរដ្ឋមន្ត្រីថៃមិនបានអនុម័តលើសំណើលុបចោលទិដ្ឋាការទេសចរចិននិងឥណ្ឌាឡើយ ព្រោះមានការលើកឡើងពីការព្រួយបារម្ភរបស់អង្គភាពមួយចំនួន។ នេះបើតាមការផ្សាយរបស់កាសែតបាងកកប៉ុស្តិ៍។
ទោះជាយ៉ាងណា គណៈរដ្ឋមន្ត្រីថៃបានយល់ព្រមលើការមិនយកថ្លៃសេវាសុំពន្យារទិដ្ឋាការរបស់ទេសចរមកពីប្រទេសចំនួន១៨សម្រាប់រយៈពេលនៅ៦ខែទៀត ឬដល់ខែមេសាឆ្នាំក២០១៩ ។ លោក ប្រាយុទ្ធ សង្ឃឹមថា ការមិនយកថ្លៃសេវាសុំពន្យាទិដ្ឋាការនេះនឹងជួយជំរុញកំណើនអ្នកទេសចរ ដែលគម្រោងនេះនឹងអនុវត្តចំពេលចូលឆ្នាំចិននិងថ្ងៃបុណ្យសង្ក្រានរបស់ថៃ។
គួរបញ្ជាក់ថា ក្រសួងទេសចរណ៍និងកីឡាថៃបានស្នើលុបចោលទិដ្ឋាការទេសចរចិននិងឥណ្ឌាដែលអនុញ្ញាតអោយជនជាតិចិន និងឥណ្ឌាអាចស្នាក់នៅប្រទេសថៃរហូតដល់ទៅ៣០ថ្ងៃ។ យ៉ាងណាមិញ សំណើនេះត្រូវបានជំទាស់ដោយក្រសួងការបរទេសថៃដែលព្រួយបារម្ភពីបញ្ហាសន្តិសុខជាតិ និងការចូលមករស់នៅដោយខុសច្បាប់។
អ្នកនាំពាក្យរដ្ឋាភិបាលលោកស្រី Narumon Pinyosinwat បាននិយាយបញ្ជាក់ថាសំណើនេះត្រូវបានបដិសេធដោយសារមើលឃើញពីបញ្ហាមួយចំនួនដូចជា បញ្ហាសន្តិសុខ ការប្រើប្រាស់ធនធានខ្ជះខ្ជាយ និងបញ្ហាកង្វះខាតហេដ្ឋារចនាសម្ព័ន្ធដែលមិនអាចទទួលភ្ញៀវទេសចរយ៉ាងច្រើនបាន។
ទោះជាយ៉ាងនេះក្តី រដ្ឋមន្ត្រីទេសចរណ៍ និងកីឡា លោក Phiphat Ratchakitprakarn បានបន្តការដាក់ស្នើសំណើផ្សេងៗទៀតដើម្បីទាក់ទាញអ្នកទេសចរណ៍។ នៅជំនួបគណៈរដ្ឋមន្ត្រីសប្តាហ៍ក្រោយ លោក Phiphat នឹងស្នើអោយពន្យារពេលបិទហាងពីម៉ោង២ទាបភ្លឺដល់ម៉ោង៤ទាបភ្លឺវិញ។ លោកបានបន្តថាគម្រោងនេះអាចនឹងមិនអនុវត្តគ្រប់កន្លែងទេ តែនឹងអនុវត្តនៅខេត្តសំខាន់ៗមួយចំនួនដូចជា Phuket, Krabi និង Chiang Mai ជាដើម៕
© រក្សាសិទ្ធិដោយ thmeythmey.com
