អន្តរជាតិ
×![]()
ដោយ: ធៀន ភារិន្ទ
ករណីភ្លើងឆេះព្រៃអាម៉ាហ្សូនរបស់ប្រេស៊ីល បានកើនឡើងដល់កំណត់ថ្មីក្នុងឆ្នាំ២០១៩។ នេះបើផ្អែកទៅតាមទិន្នន័យមកពីទីភ្នាក់ងារស្រាវជ្រាវអវកាសរបស់ប្រទេសអាមេរិកខាងត្បូងមួយនេះ។
ការស្រាវជ្រាវរបស់វិទ្យាស្ថានជាតិស្រាវជាវផ្នែកអាវកាស ទិន្នន័យផ្កាយរណប បង្ហាញថាភ្លើងឆេះព្រៃមានការកើនឡើង ៨៣ភាគរយក្នុងឆ្នាំ២០១៩ បើធៀបទៅនឹងឆ្នាំ២០១៨។ ការស្រាវជ្រាវនេះធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីលោកប្រធានាធិបតី Jair Bolsonaro បានដកតំណែងប្រធានទីភ្នាក់ងារស្រាវជ្រាវផ្នែកអាវកាស ខណៈពេលមានការខ្វែងគំនិតគ្នាលើទិន្នន័យនៃការដុតបំផ្លាញព្រៃឈើ។
កាលពីថ្ងៃទី១៩ ខែសីហា ផ្សែងបានហុយមកដល់ទៅក្រុង Sao Paulo នៅពេលថ្ងៃ ដោយសារមានខ្យល់ខ្លាំង ដែលបាននាំផ្សែងមកពីតំបន់មានភ្លើងឆេះព្រៃក្នុងរដ្ឋ Amazonas និង Rondonia ដែលមានចំងាយច្រើនជាង២៧០០គីឡូម៉ែត្រឯណោះ។ ការស្រាវជ្រាវដដែលបានបង្ហាញថា ភ្លើងឆេះព្រៃកើតឡើងនៅរដូវក្តៅ ហើយភាគច្រើនជាសកម្មភាពរបស់មនុស្សដែលកាប់ឆ្ការព្រៃយកដីចិញ្ចឹមសត្វ។
តាមចុះផ្សាយរបស់ទីភ្នាក់ងារសារព័ត៌មាន Reuters លោកប្រធានាធិបតី Bolsonaro បានច្រានចោលនូវទិន្ន័យ ៨៣ភាគរយរបស់វិទ្យាស្ថានជាតិស្រាវជ្រាវផ្នែកអាវកាស ហើយនិយាយថា វាជារដូវកាលនៃការកាប់ឆ្ការព្រៃ ដែលកសិករប្រើភ្លើងសម្រាប់ដុតព្រៃដើម្បីយកដីចិញ្ចឹមសត្វ។
អ្នកវិទ្យាសាស្ត្របានរិះគន់លោកប្រធានាធិបតីរូបនេះ ខណៈអត្រាបាត់បង់ព្រៃឈើបានកើនឡើងក្រោយលោកចូលកាន់តំណែងដែលធ្វើព្រៃអាម៉ាហ្សូនទទួលរងនូវការរងគ្រោះ ពិសេស ជំហររបស់លោកដែលយកអភិវឌ្ឍធំជាងអភិរក្សព្រៃឈើ។
សូមបញ្ជាក់ថា ការស្រាវជ្រាវរបស់វិទ្យាស្ថានជាតិស្រាវជាវផ្នែកអាវកាសរកឃើញ ការដុតព្រៃមាន៧២០០០ករណី ចន្លោះពីខែមករា ដល់ខែសីហា ដែលតួលេខនេះខ្ពស់ជាងឆ្នាំណាៗទាំងអស់ចាប់ពីឆ្នាំ២០១៣។ ព្រៃអាម៉ាហ្សូនគឺជាកន្លែងផ្ទុកសារធាតុកាបូនច្រើនជាងគេបំផុតលើពិភពលោក ដែលជួយបន្ថយការកើនឡើងកម្តៅផែនដី៕
Tag:
ប្រេស៊ីល
© រក្សាសិទ្ធិដោយ thmeythmey.com
