កីឡាជាតិ
ជាតិ
«សុភាទន្សាយ» ជានិមិត្តរូប «Mascot» ប្រចាំស៊ីហ្គេមឆ្នាំ២០២៣នៅកម្ពុជា
×![]()
ដោយ: រួបរួម
«សុភាទន្សាយ» ដែលតំណាងឲ្យភាពវៃឆ្លាត ត្រឹមត្រូវ យុត្តិធម៌ ជាពិសេសនៅក្នុងរឿងព្រេងខ្មែរ ត្រូវបានជ្រើសរើសជាតុក្កតានិមិត្តរូប (Mascot» ប្រចាំព្រឹត្តិការណ៍កីឡាស៊ីហ្គេម (SEA Games) ឆ្នាំ២០២៣ នៅពេលដែលកម្ពុជាត្រូវធ្វើជាម្ចាស់ផ្ទះលើកដំបូង។ នេះបើយោងតាមលក្ខខណ្ឌតម្រូវរបស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (CAMSOC) លើកទី៣២ ក្នុងសេចក្តីជួនដំណឹងពីការប្រឡងប្រណាំងជ្រើសរើសគំនូរស្លាកសញ្ញា (Logo) និងគំនូរនិមិត្តរូប «Mascot»។
«ត្រូវយករូប សុភាទន្សាយ ជាសត្វតំណាង»។ CAMSOC បានកំណត់លក្ខខណ្ឌយ៉ាងដូច្នេះ សម្រាប់ការប្រកួតប្រជែងគំនូរនិមិត្តរូប «Mascot» និងស្លាកសញ្ញា «Logo» SEA Games 2023 ។ អគ្គលេខាធិការគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន ក៏បានអះអាងប្រាប់សារព័ត៌មានថ្មីៗ តាម Telegram ផងដែរ ប៉ុន្តែលោកមិនបានផ្តល់ការអធិប្បាយលម្អិតនោះឡើយ។
យោងតាមសេចក្ដីជូនដំណឹងរបស់ CAMSOC បេក្ខជនដែលចង់ចូលរួមប្រឡងប្រណាំងសម្រាប់គំនូរស្លាកសញ្ញា «Logo» និងគំនូរនិមិត្តរូប «Mascot» ជារូប «សុភាទន្សាយ» ត្រូវមានអាយុចាប់ពី១៥ឆ្នាំឡើង និងមានសញ្ជាតិខ្មែរ ហើយផ្តល់សិទ្ធិផ្តាច់មុខដល់ CAMSOC ក្នុងប្រើប្រាស់ផ្លូវការ ក្នុងករណីជាប់ជ័យលាភី។
សម្រាប់បេក្ខជនដែលជឿជាក់លើសមត្ថភាពរបស់ខ្លួន និងចង់ចូលរួមបង្ហាញស្នាដៃជាប្រវត្តិសាស្ដ្រនោះ ត្រូវដាក់ស្នាដៃរបស់ខ្លួន ដែលជាសំណៅដើមដល់លេខាធិការដ្ឋាន CAMSOC ដែលមានទីតាំងនៅអាគារគណៈកម្មាធិការជាតិអូឡាំពិកកម្ពុជាឲ្យបានមុនថ្ងៃទី៣០ ខែវិច្ឆិកា ឆ្នាំ២០១៩៕
Tag:
ស៊ីហ្គេម
© រក្សាសិទ្ធិដោយ thmeythmey.com
