ជាតិ
ស្ថានភាពទឹកជំនន់កន្លងមកនៅខេត្តកោះកុង។ រូបថត រដ្ឋបាលខេត្តកោះកុង
×![]()
ដោយ៖ សុផល រតនៈ
ភ្នំពេញ៖ កម្ពុជានឹងមានភ្លៀងធ្លាក់ច្រើន ចាប់ពីថ្ងៃទី ២២ ដល់ ថ្ងៃទី ២៨ ខែសីហា ដោយសារតែឥទ្ធិពលប្រព័ន្ធសម្ពាធទាប ដែលកំពុងអូសបន្លាយកាត់ពីលើប្រទេសថៃ ឡាវ និងវៀតណាម ជាពិសេសព្យុះនៅសមុទ្រខាងកើតប្រទេសហ្វីលីពីន ឈ្មោះ បៃលូ។ នេះបើតាមក្រសួងធនធានទឹក និងឧតុនិយម ។
ក្រសួងធនធានទឹក បានបញ្ជាក់ថា ស្ថានភាពប្រព័ន្ធសម្ពាធទាបនេះ នឹងធ្វើឱ្យកម្ពុជាមានភ្លៀងធ្លាក់ស្ទើរទូទាំងប្រទេស កម្រិតពីតិចទៅបង្គួរ។ បើតាមក្រសួងធនធានទឹក ខេត្តកោះកុង និងខេត្តព្រះសីហនុ រួមទាំងបណ្ដាខេត្តនៅតំបន់មាត់សមុទ្រ អាចមានភ្លៀងធ្លាក់ពីបង្គួរទៅច្រើន ហើយមានខ្យល់បក់បោកខ្លាំងលើផ្ទៃសមុទ្រ ដែលនាំឱ្យមានរលកសមុទ្រខ្ពស់ ចាប់ពីថ្ងៃទី ២៥ ដល់ ថ្ងៃទី ២៨ សីហា ។
ដោយឡែកបណ្ដាខេត្តចាប់ពីតំបន់វាលទំនាបភាគកណ្ដាលឡើងទៅលើ នឹងមានភ្លៀងធ្លាក់ក្នុងកម្រិតពីបង្គួរទៅច្រើន។ ចំណែករាជធានី និងខេត្តនៅប៉ែកខាងក្រោម នឹងមានភ្លៀងធ្លាក់ពីមធ្យមទៅបង្គួរ ឬភ្លៀងខ្លាំង នៅតំបន់មួយចំនួន។ នេះជាការបញ្ជាក់របស់ក្រសួងធនធានទឹក ដែលស្នើឱ្យពលរដ្ឋប្រុងប្រយ័ត្នខ្ពស់ចំពោះបាតុភូត ខ្យល់ ផ្គរ រន្ទះ និងរលកសមុទ្រ ដែលអាចកើតមានឡើងជាយថាហេតុ។
បើតាមក្រសួងធនធានទឹក ការធ្លាក់ភ្លៀងនេះ នឹងធ្វើឱ្យទឹកទន្លេមេគង្គកើនឡើងជាបន្តបន្ទាប់ ដែលបណ្តាលឱ្យស្ថានីយជលសាស្ត្រនានានៅតាមខេត្តស្ទឹងត្រែង ក្រចេះ និងកំពង់ចាម មានកម្ពស់ទឹកកើនឡើងជាងមុន ប៉ុន្តែកម្ពស់ទឹកនេះ គឺស្ថិតនៅក្រោមកម្រិតកម្ពស់ដែលត្រូវប្រុងប្រយ័ត្នទាំងអស់។ រីឯនៅទន្លេមេគង្គក្រោម ទន្លេសាប និងទន្លេបាសាក់ ទឹកនឹងឡើងជាបន្តបន្ទាប់។
«ក្រសួងស្ថាប័ន អាជ្ញាធរដែនដីពាក់ព័ន្ធ ពិសេសប្រជាកសិករ ដែលប្រកបរបរកសិកម្មនៅអមសងខាងទន្លេទាំងអស់រួសរាន់ឡើងក្នុងការប្រមូលកសិផល និងបង្កើនការយកចិត្តទុកដាក់ប្រុងប្រយ័ត្ន ដើម្បីចៀសវាងគ្រោះថ្នាក់ផ្សេងៗ ដែលអាចកើតមានឡើងជាយថាហេតុ»។ នេះជាការអំពាវនាវរបស់ក្រសួងធនធានទឹក ដែលបានបន្ថែមថា ទឹកទន្លេមេគង្គ តែងតែហក់ឡើង២ដងក្នុងមួយឆ្នាំ ដែលហៅថា អតិបរមាលើកទី១ និងអតិបរមាលើកទី២៕
Tag:
ទឹកជំនន់
អាកាសធាតុ
© រក្សាសិទ្ធិដោយ thmeythmey.com
