អន្តរជាតិ
រដ្ឋមន្រ្តីការបរទេសកូរ៉េខាងត្បូង កាង ឃ្យុងវ៉ា (ឆ្វេង), រដ្ឋមន្រ្តីការបរទេសចិន វ៉ាង យី (កណ្ដាល) និងរដ្ឋមន្ត្រីការបរទេសជប៉ុន តារ៉ូ កូណូ (ស្ដាំ) នាសន្និសីទសារព័ត៌មានក្រោយជំនួបត្រីភាគី។ រូបភាព AFP
×![]()
ដោយ: តន ចាន់រិទ្ធារ៉ា
ចិន បានប្រាប់កូរ៉េខាងត្បូង និងជប៉ុនត្រង់ៗថា ខ្លួនប្រឆាំងការពង្រាយមីស៊ីលរបស់អាមេរិកនៅប្រទេសទាំងពីរនេះ។ ចិន មិនសប្បាយចិត្តឡើយនៅពេលឮគម្រោងរបស់អាមេរិកដែលចង់ពង្រាយមីស៊ីលរបស់ខ្លួននៅតំបន់អាស៊ី ព្រោះមីស៊ីលនេះមានគោលដៅតែពីរប៉ុណ្ណោះ គឺចិនផ្ទាល់ និងកូរ៉េខាងជើងដែលនៅជាប់ចិន។ យ៉ាងណាមិញ កូរ៉េខាងត្បូង ក៏បានបដិសេធទទួលមីស៊ីលអាមេរិករួចហើយដែរ ប៉ុន្តែជប៉ុនមិនទាន់ការឆ្លើយតបអ្វីទេ។
ឆ្លៀតឱកាសជំនួបរដ្ឋមន្ត្រីត្រីភាគីនៅថ្ងៃទី២១ ខែសីហា រដ្ឋមន្ត្រីការបរទេសចិន វ៉ាង យី (Wang Yi) បានប្រាប់សមភាគីកូរ៉េខាងត្បូង កាង ឃ្យុងវ៉ា (Kang Kyung-wha) និងសមភាគីជប៉ុន តារ៉ូ កូណូ (Taro Kono) ពីជំហររបស់ចិនពាក់ព័ន្ធគម្រោងរបស់អាមេរិកក្នុងការពង្រាយមីស៊ីលចម្ងាយមធ្យមនៅតំបន់អាស៊ី។ ប្រមុខការពាតជាតិអាមេរិក ម៉ាក អេស្ពើ (Mark Esper) បានបង្ហើបពីគម្រោងនេះអំឡុងពេលដំណើរទស្សនកិច្ចនៅតំបន់អាស៊ីនៅពេលថ្មីៗនេះ។
ជប៉ុន និងកូរ៉េខាងត្បូង ត្រូវគេជឿថា ជាគោលដៅដែលអាមេរិកអាចពង្រាយមីស៊ីលរបស់ខ្លួនក្នុងគោលដៅសម្ញែងអានុភាពយោធារបស់ខ្លួន។ ប៉ុន្តែចិនបានជំទាស់ដាច់ខាត។ នាជំនួបនៅប៉េកាំង លោក វ៉ាង ប្រាប់លោកស្រី កាង និងលោក កូណូ ថា ចិនប្រឆាំងដាច់ណាត់មិនជប៉ុន ឬកូរ៉េខាងត្បូងឡើយលើការទទួលមីស៊ីលអាមេរិកនេះ។ បើតាមទីភ្នាក់ងារព័ត៌មាន Yonhap ប្រមុខការទូតចិនបន្ថែមថា ប៉េកាំង នឹងធ្វើការជាមួយសេអ៊ូល និងតូក្យូក្នុងការធានាពីសន្តិភាព និងសន្តិភាពតំបន់។
មិនមែនតែប្រទេសនៅអាស៊ីប៉ែកបូព៌ានេះទេ សូម្បីតែអូស្ត្រាលីដែលនៅមហាសមុទ្រប៉ាស៊ីហ្វិក ក៏ជាមុខសញ្ញារបស់អាមេរិកដែរ។ យ៉ាងណាមិញ កូរ៉េខាងត្បូង និងអូស្ត្រាលី សុទ្ធតែបានបដិសេធរួចអស់ហើយ នៅតែជប៉ុនដែលមិនទាន់និយាយអ្វីលើបញ្ហានេះ។
បើតាមលោក អេស្ពើ ក្រុងវ៉ាស៊ីនតោន នឹងជជែកជាមួយសម្ព័ន្ធមិត្តមីស៊ីលរបស់អាមេរិកពីការពង្រាយមីស៊ីលនេះ។ ការពង្រាយមីស៊ីលនេះ អាចធ្វើបានក្រោយអាមេរិកដកខ្លួនពីសន្ធិសញ្ញាហាមឃាត់ការសាយភាយមីស៊ីលបាលីស្ទិកចម្ងាយមធ្យម (INF) ជាមួយរុស្ស៊ី។ ក្រោមកិច្ចព្រមព្រៀងនេះ ប្រទេសទាំងពីរ មិនអាចអភិវឌ្ឍ ឬពង្រាយមីស៊ីលចម្ងាយមធ្យមបានទេ។ ប្រធានាធិបតីអាមេរិក ដូណាល់ ត្រាំ មិនពេញចិត្តសន្ធិសញ្ញានេះឡើយ ព្រោះរឹតត្បិតសមត្ថភាពអាមេរិក ហើយក៏ដកអាមេរិកចេញតែម្ដង។
សម្រាប់តំបន់អាស៊ី ក្រៅពីសម្ព័ន្ធមិត្តជិតស្និទ្ធរបស់ខ្លួន អាមេរិកទំនងពិបាករកទីតាំងដែលអាចពង្រាយមីស៊ីលជាអចិន្ត្រៃយ៍បានណាស់ ខណៈដែលប្រទេសឯងក្នុងតំបន់ ក៏ត្រូវពិចារណាឲ្យដិតដល់ពីទំនាក់ទំនងជាមួយចិនដែលផងដែរ។ កោះហ្កាមដែលជាដែនដីរបស់អាមេរិក ជាទីតាំងសមស្របបំផុតសម្រាប់ការទទួលវត្តមានមីស៊ីល ព្រោះនៅក្បែរអាស៊ីស្រាប់ផងដែរ។ ម្យ៉ាងទោះជាចិនខឹង ក៏ទំនងមិនអាចធ្វើអ្វីបានដែរ៕
Tag:
ចិន
ជប៉ុន
កូរ៉េខាងត្បូង
អាមេរិក
វ៉ាង យី
© រក្សាសិទ្ធិដោយ thmeythmey.com
